ಬೆನ್ನ ತುಂಬ ಚಿತ್ರನಟ ದರ್ಶನ್‌ ಟ್ಯಾಟು!

Team Udayavani, May 28, 2019, 2:38 PM IST

ರಾಮನಗರ: ಲೋಕಸಭೆ ಚುನಾವಣೆಯಲ್ಲಿ ಕುತೂಹಲದ ಕ್ಷೇತ್ರವಾಗಿದ್ದ ಮಂಡ್ಯದಲ್ಲಿ ಪಕ್ಷೇತರ ಅಭ್ಯರ್ಥಿ ಸುಮಲತಾ ಅಂಬರೀಷ್‌ ಗೆಲುವಿಗೆ ಕಾರಣವಾದ ನಟ ದರ್ಶನ್‌ ಅಭಿಮಾನಿ ಕಾರ್ತಿಕ್‌ ಎಂಬ ಯುವಕ ತನ್ನ ಬೆನ್ನ ಮೇಲೆ ಅವರ ಭಾವಚಿತ್ರವನ್ನು ಟ್ಯಾಟೂ ಹಾಕಿಸಿಕೊಂಡು ಅಭಿಮಾನ ಮೆರೆದಿದ್ದಾರೆ. ತಾನು ದರ್ಶನ್‌ ಅಭಿಮಾನಿ, ಸುಲಮತಾ ಗೆಲುವಿಗೆ ಕಾರಣರಾದ ನಟ ದರ್ಶನ್‌ ನೆನಪು ಸದಾ ಉಳಿಯಬೇಕು ಎಂಬ ಕಾರಣಕ್ಕೆ ಟ್ಯಾಟು ಹಾಕಿಸಿಕೊಂಡಿರುವುದಾಗಿ ಕಾರ್ತಿಕ್‌ ಹೇಳಿದ್ದಾನೆ.

ಸಂಗೂಳಿ ರಾಯಣ್ಣ ಚಿತ್ರದ ಪೋಸ್ಟರ್‌ನಲ್ಲಿ ಇರುವಂತೆ ದರ್ಶನ್‌ ಅವರ ಮುಖದ ಟ್ಯಾಟುವನ್ನು ತನ್ನ ಬೆನ್ನತುಂಬಾ ಹಾಕಿಸಿಕೊಂಡಿದ್ದಾನೆ. ಟ್ಯಾಟು ಸುಮಾರು 30 ಸೆ.ಮಿ. ಉದ್ದ ಹಾಗೂ 16ಸೆ.ಮಿ ಅಗಲವಿದೆ. ದರ್ಶನ್‌ ಚಿತ್ರದ ಅಡಿಯಲ್ಲಿ ಡಿ ಬಾಸ್‌ ಎಂದು ಬರೆಸಿಕೊಂಡಿದ್ದಾನೆ. ಬೆನ್ನ ಮೇಲೆ ಟ್ಯಾಟು ಮೂಡಿಸಲು ಕಲಾವಿದ ಮಧು ಅವರಿಗೆ ಸುಮಾರು 7 ಗಂಟೆಯ ಕಾಲಾವಧಿ ಬೇಕಾಯಿತು.

ಅಭಿಮಾನಿಗಳ ಕ್ರೇಜ್‌: ಕಳೆದ ವರ್ಷ ನಡೆದ ವಿಧಾನಸಭೆ ಚುನಾವಣೆ ಸಮಯದಲ್ಲಿ ಕೆಲವರು ತಮ್ಮ ತಲೆ ಕೂದಲಿನಲ್ಲಿ ಪಕ್ಷಗಳ ಚಿಹ್ನೆಯನ್ನು ಮೂಡಿಸಿದ್ದರು. ಮತ್ತು ಕೆಲವರು ತಮ್ಮ ಇಷ್ಟದ ನಾಯಕರ ಟ್ಯಾಟುಗಳನ್ನು ಹಾಕಿಸಿಕೊಂಡಿದ್ದುಂಟು. ಇದೀಗ ಮಂಡ್ಯ ಲೋಕಸಭಾ ಕ್ಷೇತ್ರದ ಫ‌ಲಿತಾಂಶದ ಕ್ರೇಜ್‌ ಹಬ್ಬುತ್ತಿದೆ. ಇದಕ್ಕೆ ಕಾರ್ತಿಕ್‌ ಉದಾಹರಣೆ.