ಫೇಸ್‌ಬುಕ್‌ ಸುಂದರಿ ಮೋಹಕ್ಕೆ 41ಲಕ್ಷ ಕಳಕೊಂಡ ಯುವಕ!

Team Udayavani, Aug 1, 2023, 9:12 PM IST

ರಾಮನಗರ: ಫೇಸ್‌ಬುಕ್‌ ಸುಂದರಿಯ ಮೋಹಕ್ಕೆ ಸಿಲುಕಿದ ಯುವಕ 41 ಲಕ್ಷ ರೂ. ಹಣವನ್ನು ಕಳೆದುಕೊಂಡಿರುವ ಪ್ರಕರಣ ಇದೀಗ ಜಿಲ್ಲಾ ಸಿಇಎನ್‌ ಠಾಣೆ ಮೆಟ್ಟಿಲೇರಿದೆ.

6 ತಿಂಗಳ ಹಿಂದೆ ಜಿಲ್ಲೆಯ ಯುವಕನೊಬ್ಬ “ಗೀತಾಸೆಕ್ಸಿ’ ಎಂಬ ಫೇಸ್‌ಬುಕ್‌ ಖಾತೆ ಸುಂದರ ಯುವತಿಯ ಫೋಟೋ ನೋಡಿ ಫ್ರೆಂಡ್ಸ್‌ ರಿಕ್ವೆಸ್ಟ್‌ ಕಳುಹಿಸಿದ್ದಾನೆ. ಬಳಿಕ ಆಕೆಯಿಂದ ಫೇಸ್‌ಬುಕ್‌ ಪೇಜ್‌ನಲ್ಲಿದ್ದ ಯುವತಿ ಮತ್ತು ಈತನ ನಡುವೆ ಆನ್‌ಲೈನ್‌ ಚಾಟಿಂಗ್‌, ವಿಡಿಯೋಕಾಲ್‌ ಮೂಲಕ ಸಂಭಾಷಣೆ ನಡೆದಿದೆ. ಅಪರಿಚಿತ ಫೇಸ್‌ಬುಕ್‌ ಖಾತೆಯಿಂದ ನಿನಗೆ ಯಾವ ಹುಡುಗಿ ಬೇಕೋ ಆಯ್ಕೆಮಾಡಿಕೋ ಎಂದು ಕೆಲ ಹುಡುಗಿಯರ ಫೋಟೋವನ್ನು ಕಳುಹಿಸಿದ್ದಾರೆ.

ಯುವತಿಯನ್ನು ಆಯ್ಕೆ ಮಾಡಿಕೊಂಡು 800 ರೂ. ಹಣವನ್ನು ಫೋನ್‌ ಪೇ ಮೂಲಕ ಕಳುಹಿಸಿದ್ದಾನೆ.

ಇದಾದ ಕೆಲ ದಿನಗಳ ಬಳಿಕ ಈತನ ಮೊಬೈಲ್‌ ಫೋನ್‌ನ ವ್ಯಾಟ್ಸಪ್‌ ಖಾತೆಗೆ ಅಪರಿಚಿತ ದೂರವಾಣಿ ಸಂಖ್ಯೆಯಿಂದ ಈತನದ್ದೇ ಅಶ್ಲೀಲ ಫೋಟೋವೊಂದನ್ನು ಕಳುಹಿಸಿ ಕಳೆದ 6 ತಿಂಗಳ ಅವಧಿಯಲ್ಲಿ ಫೋನ್‌ ಪೇ ಮೂಲಕ 41 ಲಕ್ಷ ರೂ. ಹಣವನ್ನು ಪಡೆದು ವಂಚಿಸಿದ್ದಾರೆ.

ಈ ಸಂಬಂಧ ಜಿಲ್ಲಾ ಸಿಇಎನ್‌ ಠಾಣೆಗೆ ದೂರು ದಾಖಲಿಸಿರುವ ಯುವಕ, ನನ್ನ ಫೇಸ್‌ ಬುಕ್‌ ಪೇಜ್‌ನಲ್ಲಿನ ಫೋಟೋವನ್ನು ಎಡಿಟ್‌ ಮಾಡಿ ನನಗೆ ಬೆದರಿಸಿ ಹಣ ಪಡೆದಿದ್ದಾರೆ ಎಂದು ಆರೋಪಿಸಿದ್ದಾನೆ. ಈ ಸಂಬಂಧ ದೂರು ದಾಖಲಿಸಿಕೊಂಡಿರುವ ಪೊಲೀಸರು ವಂಚಕಿ ಪತ್ತೆಗೆ ಬಲೆ ಬೀಸಿದ್ದಾರೆ.