Ramanagar: ಪತ್ನಿ, ಪ್ರಿಯಕರ ಸೇರಿ ಮಗುವಿನ ಮೇಲೆ ಹಲ್ಲೆ: ದೂರು ದಾಖಲು

Team Udayavani, Jun 23, 2024, 11:20 AM IST

ರಾಮನಗರ: ಗಂಡನನ್ನು ಬಿಟ್ಟು ಪ್ರಿಯಕರನ ಜೊತೆ ಓಡಿ ಹೋಗಿದ್ದ ಮಹಿಳೆ, ತನ್ನ 2 ವರ್ಷ ವರ್ಷದ ಕಂದಮ್ಮನ ಮೇಲೆ ಹಲ್ಲೆ ಮಾಡಿ ಗಾಯಗೊಳಿಸಿದ್ದು, ಈ ಸಂಬಂಧ ಮಗುವಿನ ತಾಯಿ ಮತ್ತು ಆಕೆಯ ಪ್ರಿಯಕರನ ಮೇಲೆ ಮಹಿಳಾ ಠಾಣೆಯಲ್ಲಿ ದೂರು ದಾಖಲಾಗಿದೆ.

ತಾಲೂಕಿನ ಜಯಪುರ ಗ್ರಾಮದ ವ್ಯಕ್ತಿಗೆ ಹಿರಿಯ ಪತ್ನಿ ನಿಧನ ಹೊಂದಿದ ಹಿನ್ನೆಲೆಯಲ್ಲಿ ಮತ್ತೂಬ್ಬ ಯುವತಿ ಮದುವೆಯಾಗಿತ್ತು. ಇವರಿಬ್ಬರಿಗೂ 2 ವರ್ಷದ ಗಂಡು ಮಗು ಇತ್ತು. ಮೇ.1 ರಂದು ನಿನ್ನ ಜತೆ ನಾನು ಬಾಳುವುದಿಲ್ಲ ಎಂದು ಮಹಿಳೆ ಪ್ರಿಯಕರನ ಜೊತೆಗೂಡಿ ಮಗುವಿನೊಂದಿಗೆ ಓಡಿ ಹೋಗಿದ್ದಳು. ಕೆಲ ದಿನಗಳ ಹಿಂದೆ ಮಗುವಿಗೆ ಹಲ್ಲೆ ಮಾಡಿರುವ ಫೋಟೋ ಸಂಬಂಧಿಕರ ವಾಸ್ಟ್‌ ಆಪ್‌ನಲ್ಲಿ ಹರಿದಾಡಿದೆ. ಇದನ್ನು ನೋಡಿದ ಮಗುವಿನ ತಂದೆ, ನನ್ನ ಹೆಂಡತಿ ಮತ್ತು ಆಕೆಯ ಪ್ರಿಯಕರ ನನ್ನ ಮಗುವನ್ನು ಕೊಲೆ ಮಾಡಲು ಹಿಂಸೆ ನೀಡುತ್ತಿದ್ದಾರೆ. ದಿನ ನಿತ್ಯ ಹಲ್ಲೆ ಮಾಡುತ್ತಿದ್ದಾರೆ, ನನ್ನ ಮಗುವನ್ನು ರಕ್ಷಿಸಿ ಎಂದು ಆರೋಪಿಸಿ ಮಹಿಳಾ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.