ಬ್ಯಾಂಕ್‌ ಉದ್ಯೋಗಿ ಸೇರಿ ಇಬ್ಬರಿಗೆ ಕೋವಿಡ್

Team Udayavani, Jul 20, 2020, 1:37 PM IST

ಭದ್ರಾವತಿ: ತಾಲೂಕಿನಲ್ಲಿ ಭಾನುವಾರ ಇಬ್ಬರಲ್ಲಿ ಕೋವಿಡ್ 19 ಪಾಸಿಟಿವ್‌ ಕಂಡುಬಂದಿದೆ.

ಕನಕನಗರ: ಹಳೇನಗರ ವ್ಯಾಪ್ತಿಯಲ್ಲಿರುವ ಕನಕ ನಗರದಲ್ಲಿ 62 ವರ್ಷದ ಮಹಿಳೆಯಲ್ಲಿ ಕೋವಿಡ್ ಪಾಸಿಟಿವ್‌ ಕಾಣಿಸಿಕೊಂಡಿದೆ. ಕಳೆದ ವಾರ ಈಕೆಯ ಮಗಳಿಗೆ ಪಾಸಿಟಿವ್‌ ಬಂದಿತ್ತು. ಈಗಾಗಲೇ ಈಕೆಯ ನಿವಾಸದ ಬೀದಿ ಸೀಲ್‌ಡೌನ್‌ ಆಗಿದೆ.

ಹಳೇ ಬುಳ್ಳಾಪುರ: ತಾಲೂಕಿನ ಹಳೇಬುಳ್ಳಾಪುರದ ನಿವಾಸಿಯಾಗಿರುವ ಭದ್ರಾವತಿ ಹಾಲಪ್ಪ ವೃತ್ತದ ಬಳಿಯಿರುವ ಸಿಂಡಿಕೇಟ್‌ ಬ್ಯಾಕಿನ ಉದ್ಯೋಗಿ 23 ವರ್ಷ ವಯಸ್ಸಿನ ಯುವಕನಲ್ಲಿ ಕೋವಿಡ್ ಸೋಂಕು ದೃಢಪಟ್ಟಿದೆ. ಬ್ಯಾಂಕಿನಲ್ಲಿ ಆತನೊಂದಿಗೆ ಕಾರ್ಯ ನಿರ್ವಹಿಸುತ್ತಿದ್ದ ಐವರು ಉದ್ಯೋಗಿಗಳನ್ನು ಹೋಂ ಕ್ವಾರಂಟೈನ್‌ ಮಾಡಿ ಸದ್ಯಕ್ಕೆ ಅಲ್ಲಿಗೆ ಬೇರೆ ಐವರು ಉದ್ಯೋಗಿಗಳನ್ನು ಕೆಲಸಕ್ಕೆ ನಿಯೋಜಿಸುವಂತೆ ಸೂಚಿಸಲಾಗಿದೆ.

ಸೋಂಕಿತರ ನಿವಾಸದ ಸ್ಥಳಕ್ಕೆ ನಗರಸಭೆ ಆಯುಕ್ತ ಮನೋಹರ್‌, ತಾಲೂಕು ಆರೋಗ್ಯಾಧಿಕಾರಿ ಡಾ| ಗಾಯತ್ರಿ, ಆರೋಗ್ಯ ಇಲಾಖೆ ಸಿಬ್ಬಂದಿ ನೀಲೇಶ್‌ರಾಜ್‌ ಹಾಗೂ ಇತರ ಅಧಿಕಾರಿಗಳು ಭೇಟಿ ನೀಡಿ, ಸೋಂಕಿತರಿಬ್ಬರನ್ನೂ ಕೋವಿಡ್‌ ಚಿಕಿತ್ಸಾ ಕೇಂದ್ರಕ್ಕೆ ದಾಖಲಿಸಿ ಸೋಂಕಿತರ ನಿವಾಸದ ಬೀದಿಗಳನ್ನು ಸೀಲ್‌ಡೌನ್‌ ಮಾಡಿದರು.