ದೈಹಿಕ-ಮಾನಸಿಕ ಸದೃಢತೆಗಾಗಿ ‘ಫಿಟ್ ಇಂಡಿಯಾ ಅಭಿಯಾನ’ ಶೀಘ್ರದಲ್ಲಿ ಆರಂಭ: ಕಿರಣ್ ರಿಜಿಜು

Team Udayavani, Feb 21, 2021, 12:54 PM IST

ಶಿವಮೊಗ್ಗ: ಸಹ್ಯಾದ್ರಿ ಕಾಲೇಜಿನಲ್ಲಿ ಒಳಾಂಗಣ ಕ್ರೀಡಾಂಗಣ ನಿರ್ಮಾಣಕ್ಕೆ ಕೇಂದ್ರ ಯುವಜನ ವ್ಯವಹಾರ ಮತ್ತು ಕ್ರೀಡಾ ಖಾತೆ ರಾಜ್ಯ ಸಚಿವ ಕಿರಣ್ ರಿಜಿಜು ಶಂಕುಸ್ಥಾಪನೆ ನೆರವೇರಿಸಿದರು.

ಖೇಲೋ ಇಂಡಿಯಾ ಅಭಿಯಾನದಡಿ, ಶಿವಮೊಗ್ಗ ಸಹ್ಯಾದ್ರೀ ಕಲಾ ಮತ್ತು ವಾಣಿಜ್ಯ ಕಾಲೇಜಿನ ಆವರಣದಲ್ಲಿ 4 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸುತ್ತಿರುವ ಕ್ರೀಡಾಂಗಣ ಇದಾಗಿದೆ.

ನಂತರ ಮಾತನಾಡಿದ ಕಿರಣ್ ರಿಜಿಜು, ಒಳ್ಳೆಯ ಉದ್ದೇಶಕ್ಕಾಗಿ ಶಿವಮೊಗ್ಗಕ್ಕೆ ಬಂದಿರುವ ಬಗ್ಗೆ ಹೆಮ್ಮೆ ಇದೆ. 2028ರ ಲಾಸ್ ಎಂಜಲೀಸ್ ಒಲಂಪಿಕ್ ನಲ್ಲಿ ಭಾರತ ಟಾಪ್ 10 ರೊಳಗೆ ಇರಬೇಕು ಎಂಬುದು ನನ್ನ ಗುರಿ. ಭಾರತದ ಜನಸಂಖ್ಯೆ ಹೆಚ್ಚಿದೆ. ಅದರಲ್ಲೂ ಶೇಕಡಾ 30 ರಷ್ಟು ಯುವಜನರೇ ಇದ್ದಾರೆ. ಆದರೆ ಒಲಂಪಿಕ್ ನಲ್ಲಿ ನಮಗೆ ಹೆಚ್ಚಿನ ಪದಕಗಳು ಬರುತ್ತಿಲ್ಲದಿರುವುದು ಬೇಸರದ ಸಂಗತಿ.

ಇದನ್ನೂ ಓದಿ: ‘ಪೊಗರು’ ಚಿತ್ರದಲ್ಲಿ ಅರ್ಚಕ-ಪುರೋಹಿತರ ಅವಹೇಳನಕಾರಿ ಚಿತ್ರಣ: ಸಚ್ಚಿದಾನಂದ ಮೂರ್ತಿ ಖಂಡನೆ

ಜುಲೈನಲ್ಲಿ‌ ಟೋಕಿಯೋದಲ್ಲಿ ನಡೆಯಲಿರುವ ಒಲಂಪಿಕ್‌ನಲ್ಲಿ ಭಾರತಕ್ಕೆ ಹೆಚ್ಚಿನ ಪದಕ ಬರುವ ವಿಶ್ವಾಸವಿದೆ. 2025 ರಲ್ಲಿ ಪ್ಯಾರೀಸ್ ನಲ್ಲಿ‌ ನಡೆಯಲಿರುವ ಒಲಂಪಿಕ್ ನಲ್ಲೂ ಹೆಚ್ಚಿನ ಪದಕ ಗೆಲ್ಲಲಿದ್ದೇವೆ. ಒಲಂಪಿಕ್ ನಲ್ಲಿ ಭಾರತ ಟಾಪ್ ಟೆನ್ ಪಟ್ಟಿಯಲ್ಲಿರಬೇಕು. ಅದರಲ್ಲೂ ಕರ್ನಾಟಕದವರು ಹೆಚ್ಚಿನ ಗೋಲ್ಡ್ ಮೆಡಲ್ ಪಡೆಯಬೇಕು. ಹೀಗಾಗಿ‌ ಕರ್ನಾಟಕದಲ್ಲಿ ಹೆಚ್ಚಿನ ವರ್ಲ್ಡ್ ಕ್ಲಾಸ್ ಕ್ರೀಡಾಂಗಣಗಳನ್ನು ನಿರ್ಮಿಸಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ದೇಶದಲ್ಲಿ ಶಿವಮೊಗ್ಗ ಕ್ರೀಡಾ ಕೇಂದ್ರವಾಗುವುದರಲ್ಲಿ ಅನುಮಾನವೇ ಇಲ್ಲ. ಶಿವಮೊಗ್ಗದ ವಾತಾವರಣವೂ ಕ್ರೀಡೆಗೆ ಪೂರಕವಾಗಿದೆ. ಇಲ್ಲಿ ಬಿಸಿಯಾದ ವಾತಾವರಣವೂ ಇಲ್ಲ ಹಾಗೆಯೇ ತುಂಬಾ ತಣ್ಣನೆಯ ವಾತಾವರಣವೂ ಇಲ್ಲ.

ಮುಂದಿನ ದಿನಗಳಲ್ಲಿ ಪ್ರಧಾನಿ ಮೋದಿ ಅವರು ಫಿಟ್ ಇಂಡಿಯಾ ಅಭಿಯಾನ ಆರಂಭಿಸಲಿದ್ದಾರೆ. ಭಾರತದ ಯುವ ಜನತೆ ದೈಹಿಕವಾಗಿ ಹಾಗೂ ಮಾನಸಿಕವಾಗಿ ಸದೃಢವಾಗಿರಬೇಕು. ಹೀಗಾಗಿ ಫಿಟ್ ಇಂಡಿಯಾ ಅಭಿಯಾನ ಆರಂಭಿಸಲಾಗುತ್ತಿದೆ. ಇದಕ್ಕಾಗಿ ಸಿದ್ದತೆಗಳೂ ಆರಂಭಗೊಂಡಿವೆ.

ಇದನ್ನೂ ಓದಿ ಹಾಸನ: ಟಾಟಾಸುಮೋ ಗೆ ಕ್ವಾಲಿಸ್ ಡಿಕ್ಕಿ; 5 ಜನ ದುರ್ಮರಣ, 13 ಮಂದಿಗೆ ಗಂಭೀರ ಗಾಯ

ಭಾರತದಲ್ಲಿ ಶೇಕಡಾ 70 ರಷ್ಟು ಜನರು ಕ್ರೀಡೆ‌ಸೇರಿದಂತೆ ವ್ಯಾಯಾಮದಲ್ಲಿ ತೊಡಗುವುದಿಲ್ಲ. ಇದರಿಂದ ಅನಾರೋಗ್ಯಕ್ಕೆ ತುತ್ತಾಗುತ್ತಿರುವವರ ಸಂಖ್ಯೆಯೂ ಹೆಚ್ಚುತ್ತಿದೆ. ಅದೇ ಪಾಶ್ಚಿಮಾತ್ಯ ದೇಶಗಳಲ್ಲಿ ಪ್ರತಿಯೊಬ್ಬರೂ ವ್ಯಾಯಾಮ ಮಾಡಿ ಸದೃಢರಾಗಿದ್ದಾರೆ. ಹೀಗಾಗಿ ಭಾರತದಲ್ಲಿ ಫಿಟ್ ಇಂಡಿಯಾ ಅಭಿಯಾನ ಆರಂಭಿಸಲಾಗುತ್ತಿದೆ ಎಂದರು.

ಕಾರ್ಯಕ್ರಮದಲ್ಲಿ  ಕೇಂದ್ರ ಸಚಿವರಿಗೆ,  ಗ್ರಾಮೀಣಾಭಿವೃದ್ಧಿ ಸಚಿವ ಕೆ.ಎಸ್. ಈಶ್ವರಪ್ಪ, ಕ್ರೀಡಾ ಸಚಿವ ನಾರಾಯಣಗೌಡ, ಸಂಸದ ಬಿ.ವೈ.ರಾಘವೇಂದ್ರ ಸಾಥ್‌ ನೀಡಿದರು.

ಇದನ್ನೂ ಓದಿ ಕಾಸ್ ಗಂಜ್ ಪ್ರಕರಣದ ಪ್ರಮುಖ ಆರೋಪಿಯನ್ನು ಎನ್ ಕೌಂಟರ್ ಮೂಲಕ ಹತ್ಯೆಗೈದ ಯುಪಿ ಪೊಲೀಸರು