ಕರ್ನಾಟಕ ಸಂಘದ ಪುಸ್ತಕ ಬಹುಮಾನ ಪ್ರಕಟ

Team Udayavani, Jul 6, 2017, 3:45 AM IST

ಶಿವಮೊಗ್ಗ: ಇಲ್ಲಿನ ಕರ್ನಾಟಕ ಸಂಘದಿಂದ 2016ನೇ ಸಾಲಿನ ಪುಸ್ತಕ ಬಹುಮಾನ ಪ್ರಕಟಿಸಲಾಗಿದ್ದು, ಜು. 29ರಂದು ಕರ್ನಾಟಕ ಸಂಘ ಸಭಾಂಗಣದಲ್ಲಿ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆಯಲಿದೆ. ನಾಡಿನ ಹಿರಿಯ ಸಾಹಿತಿಗಳ ಹೆಸರಿನಲ್ಲಿ ನೀಡಲಾಗುವ ಪ್ರಶಸ್ತಿಯು ತಲಾ 10 ಸಾವಿರ ರೂ. ನಗದು ಪುರಸ್ಕಾರ ಮತ್ತು ಪ್ರಶಸ್ತಿ ಪತ್ರ ಹೊಂದಿದೆ.

ಪ್ರೊ| ಎಸ್‌.ವಿ. ಪರಮೇಶ್ವರ ಭಟ್ಟರ ಹೆಸರಿನಲ್ಲಿ ನೀಡಲಾಗುವ ಅನುವಾದಿತ ಕೃತಿಗೆ ಡಿ.ಎನ್‌. ಶ್ರೀನಾಥ್‌ ಅವರ ಅಸ್ಸಾಮಿ ಕತೆಗಾರ್ತಿಯರ ಆಯ್ದ ಕಥೆಗಳು ಕೃತಿ ಆಯ್ಕೆಯಾಗಿದೆ. ಕುವೆಂಪು ಪ್ರಶಸ್ತಿ ರೇಖಾ ಕಾಖಂಡಕಿ ಅವರ ವೈವಸ್ವತ ಕಾದಂಬರಿ, ಎಂ. ಕೆ. ಇಂದಿರಾ ಪ್ರಶಸ್ತಿ ಮಧುರಾ ಕರ್ಣಮ್‌ ಅವರ ಆಲದ ನೆರಳು ಕೃತಿ, ಪಿ. ಲಂಕೇಶ್‌ ಪ್ರಶಸ್ತಿ ಡಾ| ಮಿರ್ಜಾ ಬಷೀರ್‌ ಅವರ ಜಿನ್ನಿ ಕೃತಿ, ಡಾ| ಜಿ. ಎಸ್‌. ಶಿವರುದ್ರಪ್ಪ ಪ್ರಶಸ್ತಿ ವಾಸುದೇವ ನಾಡಿಗ್‌ರವರ ಅಲೆ ತಾಕಿದರೆ ದಡ ಕವನ ಸಂಕಲನ, ಡಾ| ಹಾ.ಮಾ. ನಾಯಕ ಪ್ರಶಸ್ತಿ ಡಾ| ಜಿ.ಎಸ್‌.ಭಟ್ಟರವರ ಮಲೆಯ ಮಾತು ಅಂಕಣ ಬರಹ, ಡಾ| ಯು. ಆರ್‌. ಅನಂತಮೂರ್ತಿ ಪ್ರಶಸ್ತಿ ಎಚ್‌.ಬಿ.ಇಂದ್ರಕುಮಾರ್‌ ಅವರ ಕಾಣದ ಕಡಲು ಸಣ್ಣ ಕಥಾ ಸಂಕಲನಕ್ಕೆ ದೊರಕಿದೆ.

ಡಾ| ಕೆ.ವಿ.ಸುಬ್ಬಣ್ಣ ಪ್ರಶಸ್ತಿ ಸುಬ್ರಾವ ಕುಲಕರ್ಣಿ ಅವರ ಓಕುಳಿ ಹಾಗೂ ಇತರ ನಾಟಕಗಳು , ಕುಕ್ಕೆ ಸುಬ್ರಹ್ಮಣ್ಯ
ಪ್ರಶಸ್ತಿ ಎಂ.ಜಾನಕಿ ಬ್ರಹ್ಮಾವರ ಅವರ ನೈಲ್‌ ನದಿಯ ನಾಡಿನಲ್ಲಿ ಪ್ರವಾಸ ಕಥನ, ಹಸೂಡಿ ವೆಂಕಟಶಾಸಿOಉ ಪ್ರಶಸ್ತಿ ಡಾ| ಎ.ಎಸ್‌.ಕುಮಾರಸ್ವಾಮಿ ಅವರ ಅಂತರ್ಜಲ ಬಳಕೆ ವಿಜ್ಞಾನ ಕೃತಿ, ನಾ. ಡಿಸೋಜ ಪ್ರಶಸ್ತಿ ಮತ್ತೂರು ಸುಬ್ಬಣ್ಣ ಅವರ ಮಕ್ಕಳ ಕಥಾ ಲೋಕ ಮಕ್ಕಳ ಸಾಹಿತ್ಯ, ಡಾ| ಎಚ್‌. ಡಿ. ಚಂದ್ರಪ್ಪ ಗೌಡ ಪ್ರಶಸ್ತಿ ಡಾ| ಎಚ್‌.ಎಸ್‌.ಮೋಹನ್‌ ಅವರ ವೈದ್ಯ ವಿನೂತನ ಕೃತಿಗೆ ಲಭಿಸಿದೆ.