New Method: ಕಾಣೆಯಾದ ಹೋರಿ ಹುಡುಕಲು “ಜಿಪಿಎಸ್‌’!

Team Udayavani, Jan 11, 2025, 7:35 AM IST

ಶಿವಮೊಗ್ಗ: ಹೋರಿ ಹಬ್ಬ ಎಂದರೆ ಮಧ್ಯ ಕರ್ನಾಟಕ, ಉತ್ತರ ಕರ್ನಾಟಕದ ಜನರ ಮೈನವಿರೇಳುತ್ತದೆ. ಹೋರಿ ಸಾಕುವುದು ಪ್ರತಿಷ್ಠೆಯ ಪ್ರಶ್ನೆಯಾಗಿದ್ದು ಲಕ್ಷ ಲಕ್ಷ ಹಣ ಕೊಟ್ಟು ಖರೀದಿ ಮಾಡುತ್ತಾರೆ. ಇಂತಹ ಹೋರಿಗಳು ಕೆಲವೊಮ್ಮೆ ಸ್ಪರ್ಧೆ ವೇಳೆ ಕಾಡುಮೇಡು ಸೇರಿಕೊಳ್ಳುತ್ತವೆ. ಲಕ್ಷ ಲಕ್ಷ ಹಣ ಕೊಟ್ಟು ತಂದವರು ಹುಡುಕಲು ಸಾವಿರಾರು ರೂ. ಖರ್ಚು ಮಾಡಬೇಕು. ಇದನ್ನೆಲ್ಲ ಪರಿಹರಿಸಲೆಂದೇ ಈಗ ಹೋರಿ ಸಾಕಣೆದಾರರು ತಂತ್ರಜ್ಞಾನದ ಮೊರೆ ಹೋಗುತ್ತಿದ್ದಾರೆ. ಅದರಂತೆ, ವಾಹನಗಳಿಗೆ ಬಳಸುತ್ತಿದ್ದ ಜಿಪಿಎಸ್‌ ಸಾಧನವನ್ನೇ ಹೋರಿಗಳಿಗೆ ಬಳಸುವಂತೆ ಅಪ್‌ಡೇಟ್‌ ಮಾಡಲಾಗಿದೆ. ಇದನ್ನು ಮಾಡಿದ್ದು ಶಿಕಾರಿಪುರದ ಕಾರು ಮೆಕ್ಯಾನಿಕ್‌ ಇದಾಯತ್‌!

ಮೆಕ್ಯಾನಿಕ್‌ ಹಾಗೂ ಆಟೋ ಮೊಬೈಲ್‌ ಎಲೆಕ್ಟ್ರಿಶಿಯನ್‌ ಆಗಿರುವ ಇದಾಯತ್‌ ಜಿಪಿಎಸ್‌ ಸಾಧನ ಅಪ್‌ಡೇಟ್‌ ಮಾಡಿ ಹೋರಿಗಳಿಗೆ ಬಳಸುವಂತೆ ಮಾಡಿದ್ದಾನೆ. 6ರಿಂದ 10 ದಿನಗಳ ಬ್ಯಾಟರಿ ಬ್ಯಾಕಪ್‌ ಹೊಂದಿರುವ ಈ ಸಾಧನವನ್ನು ಹೋರಿಯ ಕೊರಳಿಗೆ ಅಳವಡಿಸಲಾಗುತ್ತದೆ. ಹೋರಿ ಎಲ್ಲೇ ಇದ್ದರೂ ಅದನ್ನು ಜಿಪಿಎಸ್‌ ಆ್ಯಪ್‌ ಮೂಲಕ ಕಂಡುಹಿಡಿಯಬಹುದು. ಯಾವುದೇ ಒಂದೇ ಸ್ಥಳದಲ್ಲಿ ತುಂಬಾ ಹೊತ್ತು ಇರಲು ಸಾಧ್ಯವಿಲ್ಲ. ಆದ್ದರಿಂದ ನೆಟ್‌ವರ್ಕ್‌ ಇಲ್ಲದಿರುವ ಜಾಗದಲ್ಲಿ ಆತಂಕಪಡುವ ಅಗತ್ಯವಿಲ್ಲ ಎನ್ನುತ್ತಾರೆ ಇದಾಯತ್‌.

ಸಾವಿರಾರು ಜನರ ಮಧ್ಯೆ ಓಡುವ ಹೋರಿಗಳು ಯಾರ ಕೈಗೂ ಸಿಗದೆ ಕಾಡುಮೇಡು ಸೇರುತ್ತವೆ. ಪ್ರತಿ ಹೋರಿ ಹಬ್ಬದಲ್ಲೂ ಇಂತಹ ನಾಲ್ಕೈದು ಪ್ರಕರಣಗಳು ಸಿಗುತ್ತವೆ. ಇಂತಹ ಹೋರಿಗಳನ್ನು ಹುಡುಕುವುದೇ ಹರಸಾಹಸ. ಬೇರೆ ಬೇರೆ ಜಿಲ್ಲೆ, ರಾಜ್ಯದಿಂದ ಬಂದಿರುವ ಹೋರಿಗಳು ಬೇರೆ ಹೋರಿಗಳ ಜತೆ ಬೆರೆತಿರುವುದಿಲ್ಲ. ಬೇರೆ ಬೇರೆ ಊರುಗಳಲ್ಲಿ ಹೋರಿ ಹಬ್ಬ ಮಾಡುವುದರಿಂದ ಅವುಗಳು ವಾಪಸ್‌ ಬರುವುದೂ ತಿಳಿಯುವುದಿಲ್ಲ.

ಈ ರೀತಿ ತಪ್ಪಿಸಿಕೊಳ್ಳುವ ಹೋರಿಗಳ ಫೋಟೋಗಳನ್ನು ವಾಟ್ಸ್‌ಆ್ಯಪ್‌ ಗ್ರೂಪ್‌ಗ್ಳಲ್ಲಿ ಹಾಕಿ ಸ್ಥಳೀಯರ ಸಹಕಾರ ಕೇಳುತ್ತಿದ್ದರು. ದೇವರಿಗೆ ಹರಕೆ ಕಟ್ಟಿಕೊಳ್ಳುತ್ತಿದ್ದರು. ಹೋರಿಗಳು ಕಾಣಿಸಿಕೊಂಡಾಗ ಮಾಹಿತಿ ಸ್ಥಳೀಯರು ಹಂಚಿಕೊಳ್ಳುತ್ತಿದ್ದರು. ಈವರೆಗೆ ಈ ರೀತಿಯೇ ಹೋರಿಗಳನ್ನು ಹುಡುಕಲಾಗುತ್ತಿತ್ತು. 10ರಿಂದ 20 ಜನ ಊರೂರು ಸುತ್ತಬೇಕಿತ್ತು. ಹಗಲು-ರಾತ್ರಿ ಸುತ್ತುವುದಷ್ಟೇ ಅಲ್ಲದೆ ಊಟ, ತಿಂಡಿ ಇತರೆ ವ್ಯವಸ್ಥೆ ಮಾಡಬೇಕಿತ್ತು. ಇದರ ಮೊತ್ತವೇ ದೊಡ್ಡದಾಗುತ್ತಿತ್ತು. ಈಗ ಜಿಪಿಎಸ್‌ ತಂತ್ರಜ್ಞಾನ ದೊರೆತಿರುವುದರಿಂದ ಈ ಸಮಸ್ಯೆಗೆ ಪರಿಹಾರ ದೊರೆತಂತಾಗಿದೆ.

ಏನಿದು ತಂತ್ರಜ್ಞಾನ?
– ಕಾರಿನಲ್ಲಿ ಬಳಸುವ ಜಿಪಿಎಸ್‌ ಡಿವೈಸ್‌ ಅಪ್‌ಡೇಟ್‌
– 6-10 ದಿನ ಬ್ಯಾಟರಿ ಬ್ಯಾಕಪ್‌ ಇರುವ ಸಾಧನ
– ಇದನ್ನು ಹೋರಿಯ ಕೊರಳಿಗೆ ಕಟ್ಟಲಾಗುತ್ತದೆ
– ಇದಕ್ಕೆ 10 ಸಾವಿರ ಎಂಎಎಚ್‌ ಬ್ಯಾಟರಿ ಬಳಕೆ
– ಹೋರಿ ಎಲ್ಲೇ ಇದ್ದರೂ ಜಿಪಿಎಸ್‌ ಆ್ಯಪ್‌ ಮೂಲಕ ಪತ್ತೆ ಸಾಧ್ಯ
– ಸದ್ಯಕ್ಕೆ 7,200 ರೂ.ಗಳಿಗೆ ಈ ಸಾಧನ ಮಾರಾಟ

 – ಶರತ್‌ ಭದ್ರಾವತಿ