ಸುಗಮ ಸಂಚಾರಕ್ಕೆ ಬಂತು ಆಪತ್ತು

Team Udayavani, Oct 29, 2019, 3:53 PM IST

ಹೊಸನಗರ: ಭೀಕರ ಮಳೆಗೆ ರಾಣಿಬೆನ್ನೂರು-ಕೊಲ್ಲೂರು, ಬೈಂದೂರು ಹೆದ್ದಾರಿ ಮಾರ್ಗದ ಮಡೋಡಿ ಸೇತುವೆ ದಂಡೆ ಕೊಚ್ಚಿಹೋಗಿ ಸಂಪರ್ಕ ಕಡಿತಗೊಂಡಿದ್ದು, ಈಗಾಗಲೇ ದುರಸ್ತಿಗೊಂಡಿದೆ. ಆದರೆ ಆ ವೇಳೆ ಪರ್ಯಾಯ ಮಾರ್ಗವಾಗಿ ಕಂಡುಬಂದ ಮತ್ತಿಕೈಯಿಂದ ಮಡೋಡಿ ಗ್ರಾಮೀಣ ರಸ್ತೆ ಸಂಪೂರ್ಣ ಹಾಳಾಗಿದ್ದು, ವಾಹನ ಸಂಚಾರವೇ ಕಷ್ಟ ಎಂಬಂತಾಗಿದೆ.

2012ರಲ್ಲಿ ರಾಜ್ಯ ಸರ್ಕಾರದ ಅನುದಾನದಲ್ಲಿ ಅಭಿವೃದ್ಧಿ ಹೊಂದಿದ ಹೊಸನಗರ ತಾಲೂಕಿನ ಹೊಸೂರು ಗ್ರಾಪಂ ವ್ಯಾಪ್ತಿಯ ಮತ್ತಿಕೈ-ಮಡೋಡಿ ವರೆಗಿನ ಮೂರುವರೆ ಕಿಮೀ ರಸ್ತೆಯ ಹದಗೆಟ್ಟ ವ್ಯವಸ್ಥೆ ಇದು.

ಮಡೋಡಿ ಎಫೆಕ್ಟ್: ನಗರ ಹೋಬಳಿಯಲ್ಲಿ ಸುರಿದ ಭೀಕರ ಮಳೆಯಿಂದಾಗಿ ರಾತ್ರೋರಾತ್ರಿ ರಾಣಿಬೆನ್ನೂರು-ಬೈಂದೂರು ರಾಷ್ಟ್ರೀಯ ಹೆದ್ದಾರಿಯ ಮಡೋಡಿ ಸೇತುವೆ ದಂಡೆ ಸುಮಾರು 60 ಮೀ ನಷ್ಟು ಕೊಚ್ಚಿಹೋಗಿ ಪ್ರಮುಖ ಸಂಪರ್ಕ ಕಡಿತವಾಗಿತ್ತು. ಅಲ್ಲದೆ ಕೊಲ್ಲೂರು, ಸಿಗಂದೂರು ಸಂಪರ್ಕಕ್ಕೂ ಸಂಚಕಾರ ಬಂದಿದ್ದು, ಈ ವೇಳೆ ಪರ್ಯಾಯ ಮಾರ್ಗವಾಗಿ ಉಪಯೋಗಕ್ಕೆ ಬಂದಿದ್ದು ಕಟ್ಟಿನಹೊಳೆ-ಗೌರಿಕೆರೆ ಮಾರ್ಗ ಮತ್ತು ಮತ್ತಿಕೈ-ಮಡೋಡಿ ಮಾರ್ಗ. ಸುಮಾರು ಎರಡು ತಿಂಗಳ ಕಾಲ ವಾಹನಗಳ ನಿರಂತರ ಸಂಚಾರದಿಂದಾಗಿ ಇದೀಗ ಮಾರ್ಗಕ್ಕೆ ಕುತ್ತು ತಂದಿದೆ.

ಸ್ಥಳೀಯರ ಸಂಪರ್ಕ ಕೊಂಡಿ: ಮತ್ತಿಕೈ ಮಡೋಡಿ ಗ್ರಾಮೀಣ ರಸ್ತೆ ನೂರಾರು ಕುಟುಂಬಗಳ ಸಂಪರ್ಕ ಸೇತುವಾಗಿದೆ. 2012ರಲ್ಲಿ ಅಭಿವೃದ್ಧಿಗೊಂಡು 7 ವರ್ಷ ಕಳೆದರೂ ರಸ್ತೆ ಉತ್ತಮವಾಗಿತ್ತು. ಸುತ್ತಮುತ್ತಲಿನ ಹಳ್ಳಿಗರಿಗೆ ಪ್ರಮುಖ ಮಾರ್ಗವಾಗಿತ್ತು. ಇದೀಗ ಮಾರ್ಗ ಹದಗೆಟ್ಟಿದ್ದು ರಸ್ತೆಯನ್ನು ದುರಸ್ತಿಗೊಳಿಸುವಂತೆ ಆಗ್ರಹಿಸಿದ್ದಾರೆ.