ಗೌಡಗಾಂವದಲ್ಲಿ ಮಾರುತಿ ಜನ್ಮೋತ್ಸವ ಸಂಭ್ರಮ

Team Udayavani, Apr 20, 2019, 12:34 PM IST

ಸೊಲ್ಲಾಪುರ: ಅಕ್ಕಲಕೋಟ ತಾಲೂಕಿನ ಗೌಡಗಾಂವದ ಜಾಗೃತ ಮಾರುತಿ ಮಂದಿರದಲ್ಲಿ ಶುಕ್ರವಾರ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳೊಂದಿಗೆ ಹನುಮ ಜನ್ಮೋತ್ಸವ ಆಚರಿಸಲಾಯಿತು.

ಶುಕ್ರವಾರ ಮಾರುತಿ ಜನ್ಮದಿನದ ಅಂಗವಾಗಿ ದೇಗುಲದಲ್ಲಿ ಬೆಳಗ್ಗೆ ಮಹಾರುದ್ರಾಭಿಷೇಕ, ಕಾಕಡಾರತಿ, ನವಗೃಹ ಪೂಜೆ, ಶನಿ ಪೂಜೆ, ಲಕ್ಷ್ಮೀ ಪೂಜೆ, ಲಿಂಗ ಪೂಜೆ ಹಾಗೂ ಹೋಮಯಜ್ಞ ಇನ್ನಿತರ ಧಾರ್ಮಿಕ ಕಾರ್ಯಕ್ರಮಗಳನ್ನು ಆಚರಿಸಲಾಯಿತು. ನಂತರ ಭಕ್ತರಿಗೆ ದರ್ಶನದ ವ್ಯವಸ್ಥೆ ಮಾಡಲಾಯಿತು. ಬೆಳಗ್ಗೆ 7:30ಗಂಟೆಗೆ
ಭಕ್ರು ಗುಲಾಲ ಹಾರಿಸುವ ಮೂಲಕ ಮಾರುತಿಯ ತೊಟ್ಟಿಲೋತ್ಸವ ಆಚರಿಸಲಾಯಿತು.

ಮಧ್ಯಾಹ್ನ 12 ಗಂಟೆಗೆ ಮಾರುತಿಗೆ ವಿಶೇಷ ಪೂಜೆ ಸಲ್ಲಿಸಲಾಯಿತು. ಸೊಲ್ಲಾಪುರ ಅಕ್ಷಯ ಬ್ಲಿಡ್‌ ಬ್ಯಾಂಕ್‌ನಿಂದ ರಕ್ತದಾನ ಶಿಬಿರ ಏರ್ಪಡಿಸಲಾಗಿತ್ತು. ಬಡ ಮತ್ತು ಆರ್ಥಿಕ ಹಿಂದುಳಿದ ಮಹಿಳೆಯರಿಗೆ ಮಂದಿರ ಸಮಿತಿ ವತಿಯಿಂದ ಸೀರೆ ವಿತರಿಸಲಾಯಿತು. ಉದ್ಯಮಿ ಅಶೋಕ ಬಲದೋಟಾ ಮಹಾಪ್ರಸಾದ ವ್ಯವಸ್ಥೆ ಕಲ್ಪಿಸಿದ್ದರು.ನಂತರ ಪಲ್ಲಕ್ಕಿ ಉತ್ಸವ ನಡೆಯಿತು.