ಇವಿಎಂ ಕೂಡ “ಮಾಹಿತಿ’!

Team Udayavani, Feb 25, 2019, 12:30 AM IST

ಹೊಸದಿಲ್ಲಿ: ವಿದ್ಯುನ್ಮಾನ ಮತಯಂತ್ರ(ಇವಿಎಂ) ಕೂಡ ಮಾಹಿತಿ ಹಕ್ಕು ಕಾಯ್ದೆ ವ್ಯಾಪ್ತಿಯಲ್ಲಿ “ಮಾಹಿತಿ’ ಎಂದು ಪರಿಗಣಿಸಲ್ಪಟ್ಟಿದ್ದು, ಅಗತ್ಯವಿದ್ದರೆ ಅರ್ಜಿದಾರನು 10 ರೂ.ಗಳನ್ನು ನೀಡಿ ಇವಿಎಂ ಅನ್ನು ಪಡೆಯಬಹುದಾಗಿದೆ ಎಂದು ಕೇಂದ್ರ ಮಾಹಿತಿ ಆಯೋಗ ತಿಳಿಸಿದೆ. 

ಯಾರಾದರೂ ಇವಿಎಂ ಕುರಿತು ಮಾಹಿತಿ ಕೋರಿ ಅರ್ಜಿ ಸಲ್ಲಿಸಿದರೆ, ಇವಿಎಂ ಅನ್ನು ಅರ್ಜಿದಾರನಿಗೆ ನೀಡುವ ಅಥವಾ ಸೂಕ್ತ ಕಾರಣಗಳನ್ನು ನೀಡಿ ಅದನ್ನು ನಿರಾಕರಿಸುವ ಅಧಿಕಾರ ಚುನಾವಣಾ ಆಯೋಗಕ್ಕಿರುತ್ತದೆ. ನಿರಾಕರಿಸಿದರೆ, ಅದನ್ನು ಪ್ರಶ್ನಿಸಿ ಸಿಐಸಿ ಮೆಟ್ಟಿಲೇರುವ ಅವಕಾಶವೂ ಅರ್ಜಿದಾರನಿಗಿದೆ ಎಂದು ಆಯೋಗ ತಿಳಿಸಿದೆ. ಇತ್ತೀಚೆಗೆ ಅರ್ಜಿದಾರರೊಬ್ಬರು ಇವಿಎಂವೊಂದನ್ನು ಕೋರಿ ಚುನಾವಣಾ ಆಯೋಗಕ್ಕೆ ಆರ್‌ಟಿಐ ಅಡಿ ಅರ್ಜಿ ಸಲ್ಲಿಸಿದ್ದರು. ಆದರೆ, ಇವಿಎಂ “ಮಾಹಿತಿ’ ವ್ಯಾಪ್ತಿಗೆ ಬರಲ್ಲ ಎಂದು ಹೇಳಿ ಆಯೋಗವು ಅರ್ಜಿಯನ್ನು ನಿರಾಕರಿಸಿತ್ತು.