ಗುಬ್ಬಿ: ಪತ್ನಿ ಮತ್ತು ನಾಲ್ಕು ವರ್ಷದ ಮಗುವನ್ನು ಬರ್ಬರವಾಗಿ ಹತ್ಯೆಗೈದ ಕ್ರೂರಿ

Team Udayavani, Oct 19, 2022, 7:16 PM IST

ಗುಬ್ಬಿ : ತಾಲೂಕಿನ ನಿಟ್ಟೂರು ಹೋಬಳಿ ಮಾವಿನಹಳ್ಳಿ ಯಲ್ಲಿ ವ್ಯಕ್ತಿಯೊಬ್ಬ ಪತ್ನಿ ಹಾಗೂ ತನ್ನ ನಾಲ್ಕು ವರ್ಷದ ಮಗುವನ್ನು ಬರ್ಬರವಾಗಿ ಕಬ್ಬಿಣದ ಅರೆಕೋಲಿನಿಂದ ಹೊಡೆದು ಹತ್ಯೆಗೈದಿರುವ ಘಟನೆ ಬುಧವಾರ ಮುಂಜಾನೆ ನಡೆದಿದೆ.

ಕೊಲೆಯಾದ ದುರ್ದೈವಿಗಳಾದ ಕಾವ್ಯ (25) ಹಾಗೂ ಜೀವನ್ (4) ಕಬ್ಬಿಣದ ಅರೆಕೋಲಿನಿಂದ ಹೊಡೆದ ತಕ್ಷಣವೇ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಬದುಕನ್ನು ಕಟ್ಟಿಕೊಳ್ಳಬೇಕಾಗಿದ್ದ ಮುದ್ದಾದ ನಾಲ್ಕು ವರ್ಷದ ಮಗು ರಕ್ತದ ಮಡುವಿನಲ್ಲಿ ಬಿದ್ದಿರುವುದನ್ನು ಕಂಡ ಇಡೀ ಗ್ರಾಮವೇ ಮಮ್ಮಲ ಮರುಗಿದೆ. ಮೋಹನ್ ಕುಮಾರ್ ಎಂಬಾತ ಹತ್ಯೆ ಮಾಡಿದ ಆರೋಪಿ.

ಕಳೆದ ಐದು ವರ್ಷಗಳಿಂದಲೂ ಕಾವ್ಯ ಹಾಗೂ ಮೋಹನ್ ಕುಮಾರ್ ನಡುವೆ ವಾದವಿವಾದಗಳು, ಜಗಳ ನಿರಂತರವಾಗಿದ್ದು ಕುಟುಂಬ ಕಲಹದಿಂದಾಗಿ ಮೋಹನ್ ಕುಮಾರ್ ಜತೆ ಕಾವ್ಯ ಸುಮಾರು ವರ್ಷಗಳಿಂದ ದೂರವಿದ್ದರು.ಕಳೆದ ಎರಡು ದಿನದ ಹಿಂದೆ ಗಂಡನ ಮನೆಗೆ ಆಗಮಿಸಿದಂತಹ ಕಾವ್ಯ ಹಾಗೂ ಮಗು ಜೀವನ್ ಬುಧವಾರ ಮುಂಜಾನೆ ಹೆಣವಾಗಿ ಬಿದ್ದಿರುವುದು ನೋಡಿ ಇಡೀ ಗ್ರಾಮವೇ ಭಯ ಬಿದ್ದಿದೆ.

ಮೋಹನ್ ಕುಮಾರ್ ಕಳೆದ ಐದಾರು ವರ್ಷಗಳ ಹಿಂದೆ ಅದೇ ಗ್ರಾಮದ ಶ್ರೀ ಕರಿಯಮ್ಮ ದೇವಾಲಯದ ದೇವಸ್ಥಾನದಲ್ಲಿ ಹಣ ಕದ್ದು ಸಿಕ್ಕಿಬಿದ್ದಿದ್ದ. ಗ್ರಾಮಸ್ಥರೆಲ್ಲಾ ಸೇರಿ ಆತನ ಬಳಿ ಮುಚ್ಚಳಿಕೆ ಪತ್ರ ಬರೆಸಿಕೊಂಡು ಪೊಲೀಸರಿಂದ ಬಿಡಿಸಿಕೊಂಡು ಬಂದಿದ್ದರು. ಮದುವೆಯಾದ ನಂತರ ಕುಟುಂಬದಲ್ಲಿ ಸಾಕಷ್ಟು ಕಲಹಗಳು ನಿರ್ಮಾಣವಾಗಿ ಹಾಗಾಗಿ ಕುಟುಂಬದಲ್ಲಿ ಜಗಳ ಮಾಡುತ್ತಲೇ ಇದ್ದರು.

15 ದಿನ ಗಂಡನ ಮನೆಯಲ್ಲಿದ್ದರೆ ಇನ್ನ 15 ದಿನ ತವರು ಮನೆಯಲ್ಲಿ ಇರುತ್ತಿದ್ದು ಕಾವ್ಯ ಎರಡು ದಿನದ ಹಿಂದೆ ತವರು ಮನೆ ಚಿಕ್ಕನಾಯಕನಹಳ್ಳಿಯಿಂದ ಗಂಡನ ಮನೆಗೆ ಬಂದಿದ್ದರು. ಬುಧವಾರ ಬೆಳ್ಳಂಬೆಳಗ್ಗೆ ಪತ್ನಿ ಜೊತೆ ಗಲಾಟೆ ತೆಗೆದಿದ್ದು  ವಿಕೋಪಕ್ಕೆ ತಿರುಗಿ ಕೊಲೆ ನಡೆದಿದೆ.

ಆರೋಪಿ ತಪ್ಪಿಸಿಕೊಂಡು ಹೋಗದಂತೆ ಗ್ರಾಮದ ಜನರು ಹಗ್ಗದಿಂದ ಕೈ ಕಾಲು ಕಟ್ಟಿ ಹಾಕಿ ಪೊಲೀಸರಿಗೆ ಹಿಡಿದು ಒಪ್ಪಿಸಿದ್ದಾರೆ. ಸದ್ಯ ಆರೋಪಿಯನ್ನ ಬಂಧಿಸಿರುವ ಚೇಳೂರು ಪೊಲೀಸರು ತನಿಖೆ ಕೈಗೊಂಡಿದ್ದಾರೆ. ಸ್ಥಳಕ್ಕೆ ಸಿಪಿಐ ನದಾಫ್, ಚೇಳೂರು ಪಿಎಸ್ಐ ನವೀನ್ ಕುಮಾರ್ ಸೇರಿದಂತೆ ಪೊಲೀಸ್ ಸಿಬ್ಬಂದಿಗಳು ಹಾಜರಿದ್ದರು.