ಗುಬ್ಬಿ: ಶಾಸಕರ ಕಾರು ಅಡ್ಡಗಟ್ಟಿ ರಸ್ತೆ ಸರಿಪಡಿಸಲು ಗ್ರಾಮಸ್ಥರ ಪಟ್ಟು

Team Udayavani, Oct 17, 2022, 9:59 PM IST

ಗುಬ್ಬಿ: ತಾಲೂಕಿನ ಹಾಗಲವಾಡಿ ಹೋಬಳಿ ಯಕ್ಕಲಕಟ್ಟೆ ಗ್ರಾಮದಲ್ಲಿನ ಕಾರ್ಯಕ್ರಮಕ್ಕೆ ತೆರಳುವ ಮಾರ್ಗ ಮಧ್ಯೆ ದೇವರಹಟ್ಟಿ ಗ್ರಾಮದ ಗ್ರಾಮಸ್ಥರು ಉನಗನಾಲ ಗ್ರಾಮದ ಮುಖ್ಯ ರಸ್ತೆಯಲ್ಲಿ ಶಾಸಕ ಎಸ್. ಆರ್. ಶ್ರೀನಿವಾಸ್ ಅವರ ಕಾರನ್ನು ಅಡಗಟ್ಟಿ ತಡೆದು ನಿಲ್ಲಿಸಿ ದ್ಯಾವರನಹಟ್ಟಿ ಗ್ರಾಮದ ರಸ್ತೆಯು ಸಂಪೂರ್ಣ ಹಾಳಾಗಿದ್ದು, ಸರಿಪಡಿಸಿ ಎಂದು ಆಗ್ರಹಿಸಿದರು.

ಈ ಸಂದರ್ಭದಲ್ಲಿ ಗ್ರಾಮಸ್ಥರು ಶಾಸಕರಿಗೆ ಹೂವಿನ ಹಾರವನ್ನು ಹಾಕಲು ಬಂದಾಗ ಅದನ್ನು ಕಿತ್ತೊಗೆದು ಗ್ರಾಮಸ್ಥರ ಮೇಲೆ ಆಕ್ರೋಶ ವ್ಯಕ್ತಪಡಿಸಿದರು.

ಪಟ್ಟು ಬಿಡದ ಗ್ರಾಮಸ್ಥರು ನಮ್ಮ ಗ್ರಾಮದ ರಸ್ತೆಯ ಅವ್ಯವಸ್ಥೆಯನ್ನು ನೋಡಿ ಎಂದು ಪಟ್ಟು ಹಿಡಿದರು. ನಂತರ ಶಾಸಕ ಶ್ರೀನಿವಾಸ್ ಕಾರ್ಯಕರ್ತರ ಬೈಕ್ ನಲ್ಲಿ ದ್ಯಾವರನಹಟ್ಟಿಗೆ ಭೇಟಿ ನೀಡಿ ಬಂದರು. ಇದೇ ಸಂದರ್ಭದಲ್ಲಿ ಶಾಸಕರ ಜತೆ ಬಂದಿದ್ದ ವಿಧಾನ ಪರಿಷತ್ ಸದಸ್ಯ ಅರ್ ರಾಜೇಂದ್ರ ಅವರು ಸುಮಾರು 30 ನಿಮಿಷಗಳಿಗೂ ಹೆಚ್ಚು ಸಮಯ ಉನಗನಾಲ ಗ್ರಾಮದಲ್ಲಿ ಕಾಯುವಂತಹ ಪರಿಸ್ಥಿತಿ ಎದುರಾಯಿತು.