ತುಮಕೂರಿನಲ್ಲಿ ಇಂದು ಮಕಳ “ಹಕ್ಕಿ ಕಥೆ’ ನಾಟಕ

Team Udayavani, Nov 12, 2021, 4:25 PM IST

ತುಮಕೂರು: ತುಮಕೂರಿನ ಝೆನ್‌ ಟೀಮ್‌ ನ. 12ರಂದು ಶುಕ್ರವಾರ ಸಂಜೆ 6.45ಕ್ಕೆ ತುಮಕೂರಿನ ಗುಬ್ಬಿ ವೀರಣ್ಣ ಕಲಾಕ್ಷೇತ್ರದಲ್ಲಿ ಶಿವಮೊಗ್ಗ ರಂಗಾಯಣ ಕಲಾವಿದರು ಪ್ರಸ್ತುತಪಡಿಸುತ್ತಿರುವ “ಹಕ್ಕಿ ಕಥೆ’ ಎಂಬ ವಿನೂತನ ಮಕ್ಕಳ ಪಪ್ಪೆಟ್‌ ನಾಟಕ ಆಯೋಜಿಸುತ್ತಿದೆ ಎಂದು ಝೆನ್‌ ಟೀಮ್‌ನ ಉಗಮ ಶ್ರೀನಿವಾಸ್‌ ತಿಳಿಸಿದ್ದಾರೆ.

ಈ ಕುರಿತು ಮಾಹಿತಿ ನೀಡಿದ ಅವರು, ಪಪ್ಪೆಟ್‌ ಹಾಗೂ ಅಭಿನಯ ಮಾದರಿಯಲ್ಲಿ ನಡೆಯುವ ಈ ನಾಟಕ ಮಕ್ಕಳನ್ನು ಬೇರೆಯದ್ದೇ ಲೋಕಕ್ಕೆ ಕರೆದುಕೊಂಡು ಹೋಗುವುದಲ್ಲದೆ ಸಿನಿಮಾದ ಅನುಭವವನ್ನು ಕೊಡುತ್ತದೆ. 20 ಮಂದಿ ಅಭಿನಯಿಸುವ ಈ ನಾಟಕ ಮಕ್ಕಳ ಮನೋವಿಕಾಸ ಹಾಗೂ ಅವರ ಆಲೋಚನಾ ಕ್ರಮಗಳನ್ನು ವಿಸ್ತರಿಸುತ್ತದೆ. ಒಂದು ಗಂಟೆ 20 ನಿಮಿಷ ಅವಧಿಯ ಈ ನಾಟಕಲ್ಲಿ ಮಕ್ಕಳಿಗೆ ಕಚಗುಳಿ ಇಡುವ ಅನೇಕ ದೃಶ್ಯಗಳಿವೆ. ಈ ನಾಟಕ ಮಿಸ್‌ ಮಾಡಿಕೊಂಡರೆ ಏನನ್ನೋ ಕಳೆದುಕೊಂಡಂತಾಗುತ್ತದೆ. ಎಂದರು.

ಇದನ್ನೂ ಓದಿ:- ಮೇಲ್ಮನೆ ಚುನಾವಣೆಯ 25 ಸ್ಥಾನಗಳಲ್ಲಿ ಬಿಜೆಪಿ 15ರಲ್ಲಿ ಗೆಲ್ಲುತ್ತೇವೆ: ರವಿ ಕುಮಾರ್

ಈ ಮಕ್ಕಳ ನಾಟಕವನ್ನು ರೋಟರಿ 3190 ಸಹಾಯಕ ರಾಜ್ಯಪಾಲ ಬೆಳ್ಳಿ ಲೋಕೇಶ್‌ ಉದ್ಘಾಟಿಸಲಿದ್ದಾರೆ. ಮುಖ್ಯ ಅತಿಥಿಯಾಗಿ ಪಾಲಿಕೆ ಸದಸ್ಯೆ ಗಿರಿಜಾ ಧನಿಯಾಕುಮಾರ್‌, ನೇತ್ರತಜ್ಞ ಡಾ. ಕೆ.ಆರ್‌. ಮಂಜುನಾಥ್‌, ಛಾಯಾಗ್ರಾಹಕ ಟಿ. ಎಚ್‌. ಸುರೇಶ್‌ ಪಾಲ್ಗೊಳ್ಳಲಿದ್ದಾರೆ. ಈ ನಾಟಕವನ್ನು ಗಣೇಶ್‌ ಮಂದಾರ್ತಿ, ಶ್ರವಣ್‌ ಹೆಗ್ಗೊàಡು ನಿರ್ದೇಶಿಸಿದ್ದಾರೆ. ಹಿರಿಯ ಸಾಹಿತಿ ನಾ. ಡಿಸೋಜಾ ಅವರ ಕಾದಂಬರಿ ಆಧಾರಿತ ಹಕ್ಕಿ ಕಥೆ ಎಂಬ ಮಕ್ಕಳ ನಾಟಕವನ್ನು ಶಿವಮೊಗ್ಗ ರಂಗಾಯಣದ ಕಲಾವಿದರು ಅಭಿನಯಸಿದ್ದಾರೆ.

ಪ್ರಕೃತಿಯ ಇತರ ಜೀವಿಗಳ ಸಹಜ ಬದುಕಿನ ಮೇಲೆ ಮನುಷ್ಯನ ಹಸ್ತಕ್ಷೇಪ ಎಂಥದ್ದು ಮತ್ತು ಅದಕ್ಕೆ ಪ್ರಕೃತಿ ಕೊಡುವ ತಿರುಗೇಟು ಏನು ಎಂಬುದು ಈ ನಾಟಕದಲ್ಲಿ ಅಡಕವಾಗಿದೆ. ಆಧುನಿಕ ಬದುಕಿನ ಕ್ರೌರ್ಯ ಬಿಂಬಿತ: ಪಶ್ಚಿಮಘಟ್ಟಗಳ ಮೇಲಾಗುವ ಮನುಷ್ಯನ ಯಂತ್ರದಾಳಿಗೆ ಹೆದರಿ ಹಕ್ಕಿಗಳು ಕಾಡನ್ನು ತೊರೆಯುತ್ತವೆ. ಅಲ್ಲಿಂದ ಶುರುವಾಗುವ ಆ ಜೀವಿಗಳ ಬದುಕು ದಾರುಣವಾಗುತ್ತಾ ಬರುವ ಚಿತ್ರಣ ಈ ನಾಟಕದಲ್ಲಿದೆ.

ಕಾರ್ಖಾನೆಯ ವಿಷದ ಹೊಗೆ, ಡೈನಾಮೈಟ್‌ಗಳ ಸ್ಫೋಟ, ಮುಳುಗಡೆಯ ಪ್ರದೇಶಗಳಿಂದಾಗುವ ಅವಾಂತರ ಹೀಗೆ ಒಂದಾದ ಮೇಲೊಂದು ಅವಘಡಗಳಿಗೆ ಸಿಲುಕಿ ಹಕ್ಕಿಗಳು ಸಾಯುತ್ತವೆ. ಕೊನೆಯಲ್ಲಿ ಮರಗಳ ಕೇಡಿಗೆ ಹೆದರಿ ಮೊಬೈಲ್‌ ಟವರ್‌ಗಳ ಮೇಲೆ ಗೂಡು ಕಟ್ಟುವ ಸ್ಥಿತಿ, ಮನುಷ್ಯನ ಆಧುನಿಕ ಬದುಕಿನ ಕ್ರೌರ್ಯವನ್ನು ವ್ಯಂಗ್ಯವಾಗಿ ತೋರಿಸುತ್ತದೆ. ಅಲ್ಲಿಗೂ ಬರುವ ಮನುಷ್ಯನ ಸ್ವಾರ್ಥ ಬುದ್ದಿಗೆ ಪ್ರಕೃತಿ ತನ್ನದೇ ರೀತಿಯಲ್ಲಿ ಉತ್ತರಿಸಿ ಬಿಡುತ್ತದೆ. ಇಂತಹ ಸನ್ನಿವೇಶಗಳು ನಾಟಕದಲ್ಲಿ ಚಿತ್ರಿತವಾಗಿದೆ ಎಂದರು.