ಪೊಲೀಸರು ಜನಸ್ನೇಹಿಯಾಗಿ ಕಾರ್ಯನಿರ್ವಹಿಸಿ

Team Udayavani, Jun 11, 2020, 6:48 AM IST

ತುಮಕೂರು: ಜಿಲ್ಲೆಯಲ್ಲಿ ಕಾನೂನು ಸುವ್ಯವಸ್ಥೆಯನ್ನು ಇನ್ನೂ ಉತ್ತಮಪಡಿಸಬೇಕು. ಜೂಜಾಟ, ಮಟ್ಕಾ, ಗಾಂಜಾ, ಡ್ರಗ್ಸ್‌ ಮಾರಾಟ ಗಾರರ ಬಗ್ಗೆ ಈ ದಂಧೆಗಳ ಕಿಂಗ್‌ಪಿನ್‌ ಪತ್ತೆ ಹಚ್ಚುವ ಕಾರ್ಯ ಮಾಡಬೇಕು ಎಂದು ಪೊಲೀಸರಿಗೆ  ಗೃಹ ಸಚಿವ ಬಸವರಾಜ ಬೊಮ್ಮಾಯಿ ಸೂಚನೆ ನೀಡಿದರು. ನಗರದಲ್ಲಿ ನಡೆದ ಜಿಲ್ಲಾ ಪೊಲೀಸ್‌ ಅಧಿಕಾರಿಗಳ ಸಭೆ ನಡೆಸಿದ ನಂತರ ಸುದ್ದಿ ಗಾರರೊಂದಿಗೆ ಮಾತನಾಡಿ, ಪೊಲೀಸರು ಚುರುಕಾಗಿ ಜನಸ್ನೇಹಿಯಾಗಿ ಕೆಲಸ ಮಾಡಬೇಕು  ಎಂದರು.

ಆರೋಪಿಗಳ ಪತ್ತೆಗೆ ಸೂಚನೆ: ಕೊಲೆ, ಅತ್ಯಾಚಾರ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಆರೋಪಿಗಳ ಪತ್ತೆ ಕಾರ್ಯ ಮತ್ತಷ್ಟು ಚುರುಕಾಗಬೇಕು. ಈ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಚಾರ್ಜ್‌ ಶೀಟ್‌ ಹಾಕಲು ವಿಳಂಬ ಮಾಡದೆ ಶೀಘ್ರವಾಗಿ  ಹಾಕುವಂತೆ ಸೂಚನೆ ನೀಡಿದ್ದೇನೆ ಎಂದು ನುಡಿದರು. ವಿವಿಧ ಹುದ್ದೆಗಳ ನೇಮಕಾತಿ: ರಾಜ್ಯ ಪೊಲೀಸ್‌ ಇಲಾಖೆಯಲ್ಲಿ 192 ಕಾನ್ಸ್‌ಟೇಬಲ್‌, ಪಿಎಸ್‌ಐಗಳ ನೇಮಕಾತಿ ಅವಶ್ಯಕತೆ ಇದೆ. ಈ ವರ್ಷ ನೇಮಕಾತಿಗೆ ಆದೇಶ ನೀಡಿದ್ದೇವೆ.

ಈಗಾಗಲೇ ನೇಮಕಾತಿಯಾದವರ ದಾಖಲಾತಿಗಳ ಪರಿಶೀಲನೆ ನಡೆಯುತ್ತಿದೆ. ಇವ ರೆಡೂ ನೇಮಕಾತಿ ಸೇರಿದರೆ ಆ ಹುದ್ದೆಗಳಿಗೆ ಶೇ.75 ರಷ್ಟು ಸಿಬ್ಬಂದಿ ನೇಮಕಾತಿ ವ್ಯವಸ್ಥೆ ಮಾಡುತ್ತಿದ್ದೇವೆ. ಜತೆಗೆ ಪಿಎಸ್‌ಐ ನೇಮಕಾತಿ ಮಾಡುವ  ಕೆಲಸವೂ ನಡೆಯುತ್ತಿದೆ ಎಂದರು. ಕಾಮಗಾರಿ ಕುಂಠಿತ: ಕೊರಟಗೆರೆ ಸಮೀಪ ಕೆಎಸ್‌ಆರ್‌ಪಿ ಬೆಟಾಲಿಯನ್ನು ಕಟ್ಟಡ ಕಾಮಗಾರಿ ಕುಂಠಿತವಾಗಿದೆ.

ಈ ಸಂಬಂಧ ರಾಜ್ಯಮಟ್ಟದ ಸಭೆಯಲ್ಲಿ ಚರ್ಚಿಸಿದ್ದು, ಈ ಕಾಮಗಾರಿಯನ್ನು  ಚುರುಕುಗೊಳಿಸುವಂತೆ ಸಂಬಂಧಪಟ್ಟವರಿಗೆ ಸೂಚನೆ ನೀಡಿರುವು ದಾಗಿ ತಿಳಿಸಿದರು. ಜಿಲ್ಲಾ ಕೇಂದ್ರದಲ್ಲಿ ಪೊಲೀಸ್‌ ಠಾಣೆಗಳ ಕಟ್ಟಡ ನಿರ್ಮಾಣಕ್ಕೆ ಈ ವರ್ಷ ಚಾಲನೆ ನೀಡಲಾಗುವುದು. ಹಂತ ಹಂತವಾಗಿ ಎಲ್ಲ ಪೊಲೀಸ್‌ ಠಾಣೆಗಳಿಗೆ ಹೊಸ ರೂಪ ಕೊಡಲು ಇರುವ ಹಣಕಾಸಿನಲ್ಲೇ ಕ್ರಮ ಕೈಗೊಳ್ಳಲಾಗುವುದು  ಎಂದರು.

ಶರತ್‌ಚಂದ್ರ ಭರವಸೆ: ಹೋಬಳಿ ಮಟ್ಟದಲ್ಲಿ ವಸತಿಗೃಹಗಳ ನಿರ್ಮಾಣಕ್ಕೂ ಕ್ರಮ ಕೈಗೊಳ್ಳುವುದಾಗಿ ಹೇಳಿದ ಅವರು, ಅಪರಾಧ ಪ್ರಕರಣ ತಡೆಯಲು ರಾಜ್ಯದ ಪೊಲೀಸರು ಇನ್ನೂ ಉತ್ತಮ ರೀತಿಯಲ್ಲಿ ಕೆಲಸ ಮಾಡಲು ಕಾಯೊನ್ಮುಖರಾಗುತ್ತಾರೆ ಎಂದು ಐಜಿಪಿ  ಶರತ್‌ಚಂದ್ರ, ಭರವಸೆ ನೀಡಿದ್ದಾರೆ ಎಂದು ತಿಳಿಸಿದರು.

ಪೊಲೀಸರ ಸೇವೆಗೆ ಮೆಚ್ಚುಗೆ: ಕೋವಿಡ್‌ 19 ಸಂದರ್ಭದಲ್ಲಿ ನಿರ್ವಹಣೆ ಸೇರಿದಂತೆ ಕಾನೂನು ಮತ್ತು ಸುವ್ಯವಸ್ಥೆ ಕಾಪಾಡುವಲ್ಲಿ ತುಮಕೂರು ಪೊಲೀಸರು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಸಚಿವ ಬೊಮ್ಮಾಯಿ ಪ್ರಶಂಸೆ  ವ್ಯಕ್ತಪಡಿಸಿದರು. ಕಂಟೈನ್ಮೆಂಟ್‌ ವಲಯ, ಕ್ವಾರಂಟೈನ್‌ ಕೇಂದ್ರಗಳ ನಿರ್ವಹಣೆ, ತಬ್ಲೀ ಜಮಾತ್‌ ನಿಂದ ಬಂದವರನ್ನು ಕ್ವಾರಂಟೈನ್‌ ಮಾಡಿ ನೋಡಿಕೊಳ್ಳುವ ಕೆಲಸ ಸೇರಿದಂತೆ ಚೆಕ್‌ ಪೋಸ್ಟ್‌ಗಳ ನಿರ್ವಹಣೆ ಕಾರ್ಯವನ್ನು  ಅತ್ಯುತ್ತಮ ವಾಗಿ ಮಾಡಿದ್ದಾರೆ ಎಂದು ಸಚಿವರು ಶ್ಲಾ ಸಿದರು.ಎಡಿಜಿಪಿ ಅಮರಕುಮಾರ್‌ ಪಾಂಡೆ, ಕೇಂದ್ರ ವಲಯ ಐಜಿಪಿ ಶರತ್‌ಚಂದ್ರ, ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಡಾ.ಕೆ.ವಂಸಿಕೃಷ್ಣ, ಅಡಿಷನಲ್‌ ಎಸ್ಪಿ ಉದೇಶ್‌ ಇದ್ದರು.

ತುಮಕೂರು ಪೊಲೀಸರು ಕೋವಿಡ್‌-19 ಸಂದರ್ಭ ವನ್ನು ಬಹಳ ಅತ್ಯುತ್ತಮವಾಗಿ ನಿರ್ವಹಣೆ ಮಾಡಿದ್ದಾರೆ. ಪ್ರಾರಂಭದಲ್ಲಿ ದೆಹಲಿಯ ನಿಜಾಮುದ್ದೀನ್‌ ನಿಂದ ಬಂದ ಶಿರಾ ವ್ಯಕ್ತಿ ಕೋವಿಡ್‌ 19 ಸೋಂಕಿನಿಂದ ಸಾವನ್ನಪ್ಪಿದ ನಂತರ  ಜಾಗೃತಗೊಂಡು ವಿಶೇಷ ದಳವನ್ನು ರಚನೆ ಮಾಡಿಕೊಂಡು ಉತ್ತಮ ರೀತಿಯಲ್ಲಿ ಕೆಲಸ ಮಾಡಿದ್ದಾರೆ.
-ಬಸವರಾಜ ಬೊಮ್ಮಾಯಿ, ಗೃಹ ಸಚಿವ