ವೈನ್‌ ರುಚಿ ಕಂಡ ಹಿರಿಯರು,ಮಹಿಳೆಯರು

Team Udayavani, Sep 29, 2018, 6:45 AM IST

ಮಲ್ಪೆ : ಸ್ಲೋ ಅಗಿ ಮತ್ತೇರಿಸುವ ಸಿಹಿಮದ್ಯವನ್ನು ಮಹಿಳೆಯರೂ ಸೇರಿದಂತೆ ಎಲ್ಲರೂ ಇಷ್ಟ ಪಡುತ್ತಾರೆ. ಅಂತವರಿಗೆ ಮಲ್ಪೆ ಬೀಚ್‌ನಲ್ಲಿ ವೈನ್‌ ಫೆಸ್ಟಿವಲ್‌ ಆಯೋಜಿಸಲಾಗಿದೆ.

ಮಲ್ಪೆ ಕಡಲ ಕಿನಾರೆಯಲ್ಲಿ ಜಿಲ್ಲಾಡಳಿತ, ಪ್ರವಾಸೋದ್ಯಮ ಇಲಾಖೆ ಸಹಿತ ವಿವಿಧ ಇಲಾಖೆಗಳು ಸಂಘಟನೆಗಳ ಸಹಯೋಗದಲ್ಲಿ ಹಮ್ಮಿಕೊಳ್ಳಲಾದ 4 ದಿನಗಳ ವರೆಗೆ ನಡೆಯುವ ಪರ್ಯಟನ ಪರ್ವ, ವಿಶ್ವ ಪ್ರವಾಸೋದ್ಯಮ ದಿನಾಚರಣೆ ಪ್ರಯುಕ್ತ ಬೆಂಗಳೂರಿನ ದ್ರಾಕ್ಷರಸ ಮಂಡಳಿಯ ಸಹಯೋಗದಲ್ಲಿ ಪ್ರಥಮ ಬಾರಿಗೆ ವೈನ್‌ ಫೆಸ್ಟಿವಲ್‌ ಆಯೋಜಿಸಲಾಗಿದೆ. ವೈನ್‌ ಪ್ರದರ್ಶಿಸುವ ಮೂಲಕ ದೇಶೀಯ ವೈನ್‌ ಪರಂಪರೆಯನ್ನು ತೆರೆದಿಡಲಾಗಿದ್ದು, ಪ್ರಥಮ ದಿನದಲ್ಲೆ ವೈನ್‌ ಉತ್ಸವಕ್ಕೆ ಅಭೂತಪೂರ್ವ ಸ್ಪಂದನೆಯೂ ದೊರೆತ್ತಿದೆ.ವಿದ್ಯಾರ್ಥಿಗಳು, ಹಿರಿಯ ನಾಗರಿ ಕರು, ಮಹಿಳೆಯರೂ ಸೇರಿದಂತೆ ನೂರಾರು ವೈನ್‌ ಪ್ರಿಯರು ಭೇಟಿ ನೀಡಿ ರುಚಿ ಆಸ್ವಾದಿಸಿದರು. ವೈನ್‌ ಫೆಸ್ಟಿವಲ್‌ ಪ್ರವೇಶಕ್ಕೆ ಯಾವುದೇ ಪ್ರವೇಶ ಶುಲ್ಕ ಇರಲಿಲ್ಲ. ಬಂದವರಿಗೆ ಟೇಸ್ಟ್‌ ನೋಡಲು ಉಚಿತವಾಗಿ ವೈನ್‌ ಕೊಡುತ್ತಿದ್ದರು.

ಪ್ರಥಮ ದಿನವೇ ಉತ್ತಮ ಸ್ಪಂದನೆ ದೊರಕಿದೆ. ಇನ್ನುಳಿದ ಮೂರು ದಿನವೂ ಒಳ್ಳೆ ಪ್ರತಿಕ್ರಿಯೆ ಸಿಗುವ ನಿರೀಕ್ಷೆ ಇದೆ. ಕಳೆದ ವರ್ಷ ಮಂಗಳೂರಿನಲ್ಲಿ ನಡೆದ ವೈನ್‌ ಮೇಳದಲ್ಲಿ ಸುಮಾರು 35 ಲಕ್ಷ ರೂ. ವ್ಯವಹಾರ ಆಗಿದೆ. ದ್ರಾಕ್ಷಿ ಬೆಳೆಗಾರರಿಗೆ ಇದೊಂದು ಒಳ್ಳೆಯ ವೇದಿಕೆಯಾಗಿದ್ದು, ಈ ಮೇಳ ರಾಜ್ಯಾದ್ಯಂತ ವಿಸ್ತರಣೆಯಾಗಬೇಕು ಎಂದು ಕರ್ನಾಟಕ ವೈನ್‌ಬೋರ್ಡ್‌ನ ಮ್ಯಾನೇಜರ್‌ ತಿಳಿಸಿದ್ದಾರೆ.

ಆಕರ್ಷಿಸಿದ ಬ್ರಾಂಡ್‌ಗಳು
ರೋಸ್‌, ಸೂಲ, ಕಾಡು, ಫÅಟೇಲ್ಲಿ, ಗ್ರೋವರ್‌, ಎಸ್‌ಡಿಯು, ಎಲೈಟ್‌, ಸೀಸನ್‌, ಕೃಷ್ಣವಲ್ಲಿ, ರಿಕೋ, ಬ್ಲಾಕ್‌ಬಕ್‌, ವೇಲ್‌ದಿ ಇಂಡೀಸ್‌ ಒಳಗೊಂಡ ಹೆಸರಾಂತ ಕಂಪೆನಿಯ ವೈನ್‌ಗಳ ಪ್ರದರ್ಶನ ಮತ್ತು ಮಾರಾಟದಲ್ಲಿ ಶೇ. 10 ರಿಂದ 20ರವರೆಗೆ ರಿಯಾಯಿತಿ ದರವೂ ಇದೆ. ಸೂಲ ಕಂಪೆನಿಯ ಮದಿರಾ, ಹಿಂಡೋಲಿ, ಬ್ರೂಟ್‌, ಸತೋರಿ, ದೇಶಿಯ ವೈನ್‌ಗಳಾದ ದಿಯಾ, ಮದಿ, ರಾಝಾ, ಕ್ಯಾಬಿನೆಟ್‌ ಶಿರಾಜ್‌ ಮೊದಲಾದವ ಬ್ರಾಂಡ್‌ಗಳು ಮೇಳದಲ್ಲಿ ಇದ್ದವು. 100ರಿಂದ ಹಿಡಿದು 1500 ರೂ. ವರೆಗಿನ ವೈನ್‌ಗಳು ಮಾರಾಟಕ್ಕೆ ಇದ್ದವು.