ವಿದ್ಯುತ್‌ ಸ್ಪರ್ಶಿಸಿ ಬಿಹಾರ ಮೂಲದ ಕಾರ್ಮಿಕ ಸಾವು

Team Udayavani, Jul 15, 2023, 6:20 AM IST

ಕಾರ್ಕಳ: ವಿದ್ಯುತ್‌ ಶಾಕ್‌ ತಗುಲಿ ಯುವಕನೋರ್ವ ಮೃತಪಟ್ಟ ಘಟನೆ ನಿಟ್ಟೆ ಗ್ರಾಮದಲ್ಲಿ ಶುಕ್ರವಾರ ಸಂಜೆ ಸಂಭವಿಸಿದೆ.

ಬಿಹಾರ ಮೂಲದ ಯುವಕ ಸೌರವ್‌ ಕುಮಾರ್‌ (20) ಮೃತರು. ಕೆಲವು ವರುಷಗಳ ಹಿಂದೆ ಕೂಲಿಕಾರ್ಮಿಕನಾಗಿ ಬಂದಿದ್ದ ಆತ ನಿಟ್ಟೆ ಕಾಲೇಜು ಮುಂಭಾಗದ ಕಟ್ಟಡದಲ್ಲಿ ಬಾಡಿಗೆ ಕೊಠಡಿ ಪಡೆದು ನೆಲೆಸಿದ್ದ. ಆತ ವಾಸವಿದ್ದ ಕಟ್ಟಡದ ಬಳಿ ಮಂಗಗಳ ಉಪಟಳವಿತ್ತು. ಆತ ಹಾಗೂ ಜತೆಗಿದ್ದವರು ತಂಗಿದ್ದ ಜಾಗದಿಂದ ಅವರು ಬಳಸುತ್ತಿದ್ದ ಸಾಬೂನು ಬಟ್ಟೆ ಇತ್ಯಾದಿಗಳನ್ನು ಮಂಗಗಳು ಕೊಂಡೊಯ್ಯುತ್ತಿದ್ದವು. ಅದರಂತೆ ಶುಕ್ರವಾರ ಕೆಲವು ಸೊತ್ತುಗಳು ಕಾಣಿಸುತ್ತಿಲ್ಲ ಎಂದು ಯುವಕರು ಹುಡುಕಾಡಲು ಮೇಲಿನ ಮಹಡಿಗೆ ಏಣಿ ಹಿಡಿದುಕೊಂಡು ಹೋಗಲು ಏಣಿ ಎತ್ತಿದಾಗ ಅಲ್ಲೆ ಹಾದು ಹೋದ ವಿದ್ಯುತ್‌ ತಂತಿಗೆ ಏಣಿ ಸ್ಪರ್ಶಿಸಿದೆ. ಏಣಿ ಹಿಡಿದಿದ್ದ ಸೌರವ್‌ ವಿದ್ಯುತ್‌ ತಗುಲಿ ಅಲ್ಲೇ ಬಿದ್ದು ಮೃತಪಟ್ಟಿದ್ದಾನೆ.

ಘಟನೆ ಕುರಿತು ಕಾರ್ಕಳ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.