ಅಂಗವಿಕಲ ಯುವಕನ ವರಿಸಿದ ಹಾಲಾಡಿಯ ಯುವತಿ

Team Udayavani, Mar 20, 2018, 8:05 AM IST

ಕುಂದಾಪುರ: ಮನೆಯವರ ವಿರೋಧದ ನಡುವೆಯೂ ಹಾಲಾಡಿಯ ಯುವತಿಯೊಬ್ಬರು ಸೋಮವಾರ  ಅಂಗವಿಕಲ  ಯುವಕನನ್ನು ಮದುವೆಯಾಗಿದ್ದಾರೆ. 

ಸಾಲಿಗ್ರಾಮದ ಮೊಗವೀರ ಸಮುದಾಯದ ಶೋಭನ್‌ ಬಿ. (30) ಅವರ ಜತೆ ಹಾಲಾಡಿಯ ಅದೇ ಸಮುದಾಯದ ಸಂಗೀತಾ (24) ಅವರ ವಿವಾಹವು ಕುಂದಾಪುರದ ಮಹಿಳಾ ಸಾಂತ್ವನ ಕೇಂದ್ರದ ಕಚೇರಿಯಲ್ಲಿ, ಕೇಂದ್ರದ ಮುಖ್ಯಸ್ಥೆ ರಾಧಾದಾಸ್‌  ಅವರ ನೇತೃತ್ವದಲ್ಲಿ  ನೆರವೇರಿತು. ಭೋಜರಾಜ್‌ ಹಾಗೂ ವಿಮಲಾ ದಂಪತಿಯ ಪುತ್ರ ಶೋಭನ್‌ ಅವರು ಎಸ್‌ಆರ್‌ಎಂ ಎನ್ನುವ ಖಾಸಗಿ ಕಂಪೆನಿಯಲ್ಲಿ ಕೆಲಸ ಮಾಡುತ್ತಿದ್ದು, ಹಾಲಾಡಿಯ  ಮಹಾಬಲ ಹಾಗೂ ಗುಲಾಬಿ ದಂಪತಿಯ ಪುತ್ರಿ ಸಂಗೀತಾ ಅವರು ಬಿ.ಕಾಂ. ಪದವೀಧರೆಯಾಗಿದ್ದಾರೆ. 

ಇವರಿಬ್ಬರೂ  ಕಳೆದ ಒಂದೂವರೆ ವರ್ಷದಿಂದ ಪ್ರೀತಿಸುತ್ತಿದ್ದು, ಯುವಕ  ಅಂಗವಿಕಲ ಎನ್ನುವ ಕಾರಣಕ್ಕೆ ಯುವತಿ ಮನೆಯವರಿಂದ ವಿರೋಧ ವ್ಯಕ್ತವಾಗಿತ್ತು. 

ಮಹಿಳಾ ಸಾಂತ್ವನ ಕೇಂದ್ರ ಇವರಿಗೆ ಮಾನಸಿಕ ಧೈರ್ಯ ತುಂಬುವ ಮೂಲಕ ನವಜೀವನಕ್ಕೆ  ಕಾಲಿಡುವಂತೆ ಮಾಡಿದೆ. ಸ್ವ ಇಚ್ಛೆಯಿಂದ ವಿವಾಹವಾಗಿರುವುದಾಗಿ ಯುವತಿ ಹೇಳಿದ್ದಾರೆ.