ಬಜೆ: ನದಿಯಲ್ಲಿ ಮುಳುಗಿ ಇಬ್ಬರ ಸಾವು

Team Udayavani, Mar 28, 2019, 6:18 AM IST

ಉಡುಪಿ: ನದಿ ನೀರಿನಲ್ಲಿ ಮುಳುಗಿ ಇಬ್ಬರು ಮೃತಪಟ್ಟ ಘಟನೆ ಬುಧವಾರ ಸಂಜೆ ಹಿರಿಯಡಕ ಸಮೀಪದ ಬಜೆ ಸ್ವರ್ಣಾ ನದಿಯಲ್ಲಿ ಸಂಭವಿಸಿದೆ.

ಹಿರಿಯಡಕ ಬಜೆ ಮೂಡುಕಂಗಣ ನಿವಾಸಿ ಕೃಷ್ಣ ಅವರ ಪತ್ನಿ ಪುಷ್ಪಾ (48) ಮತ್ತು ಮಂಜುನಾಥ-ಸುಜಾತಾ ದಂಪತಿಯ ಪುತ್ರಿ ಅಶ್ವಿ‌ನಿ (13) ಮೃತಪಟ್ಟವರು. ಪುಷ್ಪಾ ಅವರು ಪತಿ, ಪುತ್ರ, ಪುತ್ರಿಯನ್ನು ಅಗಲಿದ್ದಾರೆ.

ಅವರು ಸಂಜೆ 5.30ರ ವೇಳೆಗೆ ಬಟ್ಟೆ ಒಗೆಯಲೆಂದು ನದಿಗೆ ಇಳಿದಿದ್ದರು. ಮೊದಲಿಗೆ ಅಶ್ವಿ‌ನಿ ಅವರು ಆಯತಪ್ಪಿ ನೀರಿನಲ್ಲಿ ಮುಳುಗಿದ್ದು, ಅವರನ್ನು ರಕ್ಷಿಸಲೆಂದು ಧಾವಿಸಿದ ಪುಷ್ಪಾ ಕೂಡ ಆಯ ತಪ್ಪಿ ನೀರಿನಲ್ಲಿ ಮುಳುಗಿದರು.

ತತ್‌ಕ್ಷಣ ಸ್ಥಳೀಯರು ಇಬ್ಬರನ್ನೂ ನೀರಿನಿಂದ ಮೇಲಕ್ಕೆತ್ತಿ ಮಣಿಪಾಲದ ಆಸ್ಪತ್ರೆಗೆ ಸಾಗಿಸಿದರು. ಪುಷ್ಪಾ ಅವರು ಮಾರ್ಗ ಮಧ್ಯೆ ಹಾಗೂ ಅಶ್ವಿ‌ನಿ ಅವರು ಆಸ್ಪತ್ರೆಯಲ್ಲಿ ಮೃತಪಟ್ಟರು.ಹಿರಿಯಡಕ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.