“ಬಾಕ್ಕೂಟಲೆ ಬ್ಯಾಗ್‌’ ಲೋಕಾರ್ಪಣೆ   

Team Udayavani, Apr 18, 2017, 3:27 PM IST

ಉಡುಪಿ: ಮಣಿಪಾಲದ ಕೊಂಕಣಿ ಸಂಸಾರ್‌ ಪ್ರತಿಷ್ಠಾನ ಪ್ರಸ್ತುತಿ ಪಡಿಸಿದ ಕೊಂಕಣಿ ಹಾಸ್ಯ ಪ್ರಧಾನ ಸಾಮಾಜಿಕ ನಾಟಕ ಬಾಕ್ಕೂಟಲೆ ಬ್ಯಾಗ್‌ ಶನಿವಾರ ಎಂಜಿಎಂ ಕಾಲೇಜಿನ ನೂತನ ರವೀಂದ್ರ ಮಂಟಪದಲ್ಲಿ ಲೋಕಾರ್ಪಣೆಗೊಂಡಿತು. 

ಕೆಎಂಸಿಯ ನಿವೃತ್ತ ವೈದ್ಯ ಡಾ| ನಾಗೇಶ್‌ ಕುಮಾರ್‌ ರಾವ್‌ ಅವರು ರಚಿಸಿ, ಸಂಭಾಷಣೆ, ನಿರ್ಮಾಣ, ನಿರ್ದೇಶನ ಮತ್ತು ರಂಗವಿನ್ಯಾಸ ಮಾಡಿದ ನಾಟಕ “ಬಾಕ್ಕೂಟಲೆ ಬ್ಯಾಗ್‌’ ಉದ್ಘಾಟನಾ ಕಾರ್ಯಕ್ರಮದ ನಂತರ ಪ್ರಸ್ತುತಗೊಂಡಿತು. “ತರಂಗ’ ವಾರ ಪತ್ರಿಕೆಯ ವ್ಯವಸ್ಥಾಪಕ ಸಂಪಾದಕರಾದ ಡಾ| ಸಂಧ್ಯಾ ಎಸ್‌. ಪೈ ಸಭಾ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿ, ಜೀವನವೇ ಒಂದು ನಾಟಕ ರಂಗ. ನಾವೆಲ್ಲ ಕಲಾವಿದರು. ಆದರೆ ನಾಟಕದ ಪಾತ್ರಧಾರಿಗಳಾಗಿ ನಡೆಸುವ ಕೆಲಸ ಅವಿಸ್ಮರಣೀಯವೆಂದರು. 

ಮಾಹಿತಿ ತಂತ್ರಜ್ಞಾನ ಮತ್ತು ಅಧುನಿಕ ಸಮಾಜದ ಸವಾಲುಗಳ ತೆಕ್ಕೆಗೆ ಸಿಲುಕಿರುವ ರಂಗಕಲೆಗಳು ಮಾಯವಾಗುತ್ತಿರುವುದು ಖೇದಕರ. ಆದರೆ ಯುವ ಸಮುದಾಯ ಈ ಬಗ್ಗೆಯೂ ಕಾಳಜಿ ವಹಿಸುತ್ತದೆ ಎಂಬ ದೃಢವಿಶ್ವಾಸ  ತಮಗಿದೆ ಎಂದು ಮಣಿಪಾಲ ವಿ.ವಿ.ಯ ಸಹ ಕುಲಪತಿ ಡಾ| ಜಿ.ಕೆ. ಪ್ರಭು ಹೇಳಿದರು. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಯ ರಿಜಿಸ್ಟ್ರಾರ್‌ ಡಾ| ದೇವದಾಸ್‌ ಪೈ ಕೃತಿ ಲೋಕಾರ್ಪಣೆಗೊಳಿಸಿದರು. ಸಾಹಿತಿ ಕೋಣಿ ಶೇಷಗಿರಿ ನಾಯಕ್‌ ಕೃತಿ ಪರಿಚಯಮಾಡಿದರು. ಕೊಂಕಣಿ ಸಂಸಾರ ಪ್ರತಿಷ್ಠಾನದ ಗೌರವಾಧ್ಯಕ್ಷ ಡಾ| ಎಚ್‌. ಶಾಂತಾರಾಮ್‌ ಅಧ್ಯಕ್ಷತೆ ವಹಿಸಿದ್ದರು. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಯ ವಿಶ್ರಾಂತ ಅಧ್ಯಕ್ಷ ನಾರಾಯಣ ಖಾರ್ವಿ, ಪ್ರತಿಷ್ಠಾನದ ಕಾರ್ಯದರ್ಶಿ ಗಣೇಶ್‌ ಪೈ, ಕಾರ್ಯಾಧ್ಯಕ್ಷ ಕೆ. ಮಾಧವರಾಯ್‌ ಕಾಮತ್‌, ಖಜಾಂಚಿ ಡಾ| ನಿರ್ಮಲಾ ರಾವ್‌, ಮತ್ತಿತರರು ಉಪಸ್ಥಿತರಿದ್ದರು. ಕೃತಿ ಕತೃì ಡಾ| ನಾಗೇಶ್‌ ಕುಮಾರ್‌ ರಾವ್‌ ಸ್ವಾಗತಿಸಿದರು.