ರಕ್ತದಾನ ಮಾಡಲು ಎಲ್ಲರೂ ಮುಂದಾಗಿ

Team Udayavani, Jan 5, 2019, 6:44 AM IST

ಮಹಾನಗರ : ಜಿಲ್ಲೆಯ ಬ್ಲಡ್‌ ಬ್ಯಾಂಕ್‌ಗಳಲ್ಲಿ ರಕ್ತದ ಅಭಾವ ಕಾಡುತ್ತಿದೆ. ನಗರದ ಪ್ರಮುಖ ಬ್ಲಡ್‌ ಬ್ಯಾಂಕ್‌ಗಳಲ್ಲಿ ಅಪರೂಪದ ರಕ್ತ ಗುಂಪುಗಳ ಕೊರತೆ ಹೆಚ್ಚಾಗಿವೆ. ಇದರಿಂದ ರೋಗಿಗಳು ಪರದಾಡುವ ಸ್ಥಿತಿ ನಿರ್ಮಾಣವಾಗಿದೆ.

ರಕ್ತದಾನದ ಬಗ್ಗೆ ವಿವಿಧ ಸಂಘ – ಸಂಸ್ಥೆಗಳು, ಸರಕಾರ ಜಾಗೃತಿ ಮೂಡಿ ಸುವ ಕೆಲಸ ಮಾಡಿದರೂ ವರ್ಷಾಂತ್ಯಕ್ಕೆ ಬಹುತೇಕ ಆಸ್ಪತ್ರೆಗಳು ರಕ್ತದ ಅಭಾವ ಎದುರಿಸುತ್ತಿವೆ. ಸಾಲು ಸಾಲು ಹಬ್ಬಗಳು, ರಕ್ತದಾನದ ಬಗ್ಗೆ ಭಯ ಮೊದಲಾದ ಕಾರಣಗಳಿಂದ ಪ್ರಮುಖ ರಕ್ತಗಳ ಕೊರತೆಯಿಂದ ರೋಗಿಗಳು ಕಷ್ಟ ಅನುಭವಿಸುವಂತಾಗಿದೆ.

ಕ್ಯಾಂಪ್‌ ಗಳ ಸಂಖ್ಯೆ ಇಳಿಮುಖ
ಶೇ. 60ರಷ್ಟು ರಕ್ತ ಸಂಗ್ರಹವಾಗುವುದು ರಕ್ತದಾನ ಶಿಬಿರಗಳಲ್ಲಿ. ಆದರೆ ಕೆಲವು ತಿಂಗಳಿನಿಂದ ಜಿಲ್ಲೆಯ ವಿವಿಧ ಭಾಗಗಳಲ್ಲಿ ಆಯೋಜನೆಗೊಳ್ಳುವ ರಕ್ತದಾನ ಶಿಬಿರಗಳ ಸಂಖ್ಯೆ ಇಳಿಮುಖವಾಗಿದೆೆ. ಇದು ರಕ್ತದ ಅಭಾವ ಕಾಡಲು ಪ್ರಮುಖ ಕಾರಣ. ಇದರೊಂದಿಗೆ ರಿಪ್ಲೇಸ್‌ಮೆಂಟ್‌ಗೆ ರಕ್ತ ಸರಿಯಾಗಿ ದೊರೆಯದೇ ಇರುವುದು ಕೂಡ ರಕ್ತದ ಕೊರತೆಗೆ ಕಾರಣ ಎನ್ನಲಾಗುತ್ತಿದೆ.

ಶೇ. 50ರಷ್ಟು ರಕ್ತದ ಅಭಾವ
ಜಿಲ್ಲೆಯ ಬಹುತೇಕ ಬ್ಲಡ್‌ ಬ್ಯಾಂಕ್‌ಗಳಲ್ಲಿ ಅಪರೂಪದ ಬ್ಲಡ್‌ ಗ್ರೂಪ್‌ ಗಳಾದ ಎ ಪೊಸೆಟಿವ್‌, ಎಬಿ ಪೊಸಿಟಿವ್‌, ಒ ಪೊಸಿಟಿವ್‌ ಹಾಗೂ ಕೆಲವು ನೆಗೆಟಿವ್‌ ಬ್ಲಡ್‌ ಗ್ರೂಪ್‌ಗ್ಳ ಕೊರತೆ ಕಾಡುತ್ತಿದೆ. ಡಿಸೆಂಬರ್‌ ತಿಂಗಳಲ್ಲಿ ಶೇ. 50ರಷ್ಟು ರಕ್ತದ ಕೊರತೆ ಎದುರಾಗಿತ್ತು. ಡಿಸೆಂಬರ್‌ನಲ್ಲಿ ಪ್ರತಿ ವರ್ಷ ರಕ್ತದ ಕೊರತೆ ಇರುತ್ತದೆ. ಕೆಲವೇ ದಿನಗಳಲ್ಲಿ ಇದನ್ನು ಸರಿದೂಗಿಸಿಕೊಂಡು ಹೋಗಲಾಗುತ್ತದೆ ಎಂದು ಬ್ಲಡ್‌ ಬ್ಯಾಂಕ್‌ ಅಧಿಕಾರಿಗಳು ತಿಳಿಸುತ್ತಾರೆ.

13 ಬ್ಲಡ್‌ ಬ್ಯಾಂಕ್‌ಗಳು
ಜಿಲ್ಲೆಯಲ್ಲಿ ಎ.ಜೆ. ಆಸ್ಪತ್ರೆ ಮತ್ತು ರಿಸರ್ಚ್‌ ಸೆಂಟರ್‌, ಸಿಟಿ ಆಸ್ಪತ್ರೆ, ಜ್ಯೋತಿ ಆಸ್ಪತ್ರೆ ಬೆಳ್ತಂಗಡಿ, ಕೆ.ವಿ.ಜಿ. ಮೆಡಿಕಲ್‌ ಕಾಲೇಜು ಮತ್ತು ಆಸ್ಪತ್ರೆ, ನಾಕೋ ಜಿಲ್ಲಾ ವೆನ್ಲಾಕ್‌ ಆಸ್ಪತ್ರೆ, ನಾಕೋ- ಫಾದರ್‌ ಮುಲ್ಲರ್‌ ಆಸ್ಪತ್ರೆ, ನಾಕೋ- ಇಂಡಿಯನ್‌ ರೆಡ್‌ ಕ್ರಾಸ್‌ ಸೊಸೈಟಿ, ನಾಕೋ- ಕೆಎಂಸಿ ಆಸ್ಪತ್ರೆ ಮಂಗಳೂರು, ನಾಕೋ- ರೋಟರಿ ಕ್ಯಾಂಪ್ಕೋ, ನಿಟ್ಟೆ ಎಜುಕೇಶನ್‌ ಟ್ರಸ್ಟ್‌, ಎಸ್‌ಐಎಂಎಸ್‌ ಆರ್‌ಸಿ ಬ್ಲಿಡ್‌ಬ್ಯಾಂಕ್‌, ತೇಜಸ್ವಿನಿ ಆಸ್ಪತ್ರೆ- ಲಯನ್ಸ್‌ ಬ್ಲಡ್‌ ಬ್ಯಾಂಕ್‌, ಯೇನಪೊಯ ಮೆಡಿಕಲ್‌ ಕಾಲೇಜು ಬ್ಲಿಡ್‌ ಬ್ಯಾಂಕ್‌ಗಳಿವೆ.

ರಕ್ತದ ಮಹತ್ವ
ರಕ್ತಕ್ಕೆ ಪರ್ಯಾಯವಾದ ವಸ್ತುವಿಲ್ಲ ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯ. ಯಾಕೆಂದರೆ ರಕ್ತವನ್ನು ಕೃತಕವಾಗಿ ಉತ್ಪಾದಿಸಲು ಸಾಧ್ಯವಿಲ್ಲ. ದಾನದಿಂದ ಮಾತ್ರ ರಕ್ತ ಪಡೆಯಬಹುದು. ರಕ್ತದಾನ ಮಾಡಿದ ಕೆಲವೇ ಕ್ಷಣಗಳಲ್ಲಿ, ದಾನಿಯ ದೇಹದಲ್ಲಿ ರಕ್ತದ ಉತ್ಪತ್ತಿ ಪ್ರಾರಂಭವಾಗಿ 24 ಗಂಟೆಯ ಒಳಗಾಗಿ ದಾನ ಮಾಡಿದ ಪ್ರಮಾಣದ ರಕ್ತ ಪುನರುತ್ಪತ್ತಿಯಾಗುತ್ತದೆ. ಒಂದೆರಡು ವಾರಗಳಲ್ಲಿ ರಕ್ತದ ಎಲ್ಲ ಅಂಶಗಳು ತುಂಬಿಕೊಳ್ಳುತ್ತವೆ. ಈ ನಿಟ್ಟಿನಲ್ಲಿ ರಕ್ತದಾನ ಮಾಡಲು ಎಲ್ಲರೂ ಮುಂದಾಗಬೇಕಾಗಿದೆ.

ಯಾರು ರಕ್ತದಾನ ಮಾಡಬಹುದು?
18ರಿಂದ 60 ವರ್ಷದ ಒಳಗಿರುವ ಎಲ್ಲ ಆರೋಗ್ಯವಂತ ವ್ಯಕ್ತಿಗಳು ರಕ್ತದಾನ ಮಾಡಬಹುದು. ಗಂಡಸರು 3, ಹೆಂಗಸರು 4 ತಿಂಗಳಿಗೊಮ್ಮೆ ರಕ್ತದಾನ ಮಾಡಬಹುದು. ದಾನಿಯ ದೇಹದ ತೂಕ 45 ಕೆಜಿಗಿಂತ ಹೆಚ್ಚಿರಬೇಕು ಮತ್ತು ರಕ್ತದಲ್ಲಿ ಹಿಮೋಗ್ಲೋಬಿನ್‌ ಅಂಶ 12.5 ಗ್ರಾಂ ಗಿಂತ ಹೆಚ್ಚಿರಬೇಕು.

ರಕ್ತದಾನದ ಪ್ರಯೋಜನ
ರಕ್ತದಾನ ಮಾಡುವುದರಿಂದ ದಾನಿಯ ದೇಹದಲ್ಲಿ ಹೊಸ ರಕ್ತ ಉತ್ಪತ್ತಿಯಾಗಲು ಪ್ರಚೋದನೆ ಲಭಿಸುತ್ತದೆ. ದೇಹದಲ್ಲಿ ಹೊಸ ರಕ್ತ ಚಾಲನೆಯಿಂದ ಕಾರ್ಯತತ್ಪರತೆ, ಜ್ಞಾಪನ ಶಕ್ತಿ ವೃದ್ಧಿಯಾಗುತ್ತದೆ. ರಕ್ತದಲ್ಲಿ ಕೊಬ್ಬಿನಾಂಶ ಕಡಿಮೆ ಮಾಡಲು ಸಹಾಯವಾಗುತ್ತದೆ. ಹೃದಯಾಘಾತವನ್ನು ಶೇ.80 ಕ್ಕಿಂತಲೂ ಜಾಸ್ತಿ ತಡೆಯಲು, ರಕ್ತದ ಒತ್ತಡ, ಇತರೆ ಕೆಲವು ರೋಗಗಳನ್ನು ತಡೆಗಟ್ಟಲು ಸಹಾಯವಾಗುತ್ತದೆ.

ಕ್ಯಾಂಪ್‌ ಗಳಲ್ಲೂ ರಕ್ತದಾನ ಕಡಿಮೆ
ರಕ್ತದಾನ ಮಾಡುವ ಬಗ್ಗೆ ಸರಕಾರ ಹಾಗೂ ಸಂಬಂಧಪಟ್ಟ ಇಲಾಖೆಗಳು ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುತ್ತಿವೆ. ಬ್ಲಿಡ್‌ ಬ್ಯಾಂಕ್‌ ಗಳು, ಸಂಘ ಸಂಸ್ಥೆಗಳು ಕ್ಯಾಂಪ್‌ ಗಳನ್ನು ಆಯೋಜಿಸುತ್ತಿದೆ. ವರ್ಷದಲ್ಲಿ ಕೆಲವೊಮ್ಮೆ ಅಪರೂಪದ ರಕ್ತಗಳ ಕೊರತೆ ಕಾಡುತ್ತದೆ. ಕ್ಯಾಂಪ್‌ ಗಳಲ್ಲೂ ರಕ್ತದ ಸಂಗ್ರಹವೂ ಕ್ಷೀಣಿಸುತ್ತಿದೆ.
– ಡಾ| ಶರತ್‌ ಕುಮಾರ್‌,
ವೆನ್ಲಾಕ್‌ ಬ್ಲಡ್‌ ಬ್ಯಾಂಕ್‌ ಆಫೀಸರ್‌