ಐರಬೈಲು: ಕಾರು ಢಿಕ್ಕಿ ಹೊಡೆದು ಕಾಡುಕೋಣ ಸಾವು

Team Udayavani, Apr 30, 2019, 6:20 AM IST

ಸಿದ್ದಾಪುರ: ಶಂಕರ ನಾರಾಯಣ ಸಿದ್ದಾಪುರ ಮುಖ್ಯ ರಸ್ತೆಯ ಐರಬೈಲು ಬಳಿ ರಸ್ತೆ ದಾಟುತ್ತಿದ್ದ ಸುಮಾರು 20 ವರ್ಷ ಪ್ರಾಯದ ಕಾಡುಕೋಣವೊಂದು ಕಾರು ಢಿಕ್ಕಿ ಹೊಡೆದು ಸಾವನಪ್ಪಿದ ಘಟನೆ ಸೋಮವಾರ ಸಂಭವಿಸಿದೆ.

ಕಾರು ಶಂಕರನಾರಾಯಣದಿಂದ ಹೊಸನಗರದ ಕಡೆಗೆ ಸಾಗುತ್ತಿದ್ದಾಗ, ಸಿದ್ದಾಪುರ ಗ್ರಾಮದ ಐರಬೈಲು ಬಳಿ ರಸ್ತೆ ದಾಟುತ್ತಿದ್ದ ಕಾಡುಕೋಣಕ್ಕೆ ಢಿಕ್ಕಿ ಹೊಡೆದಿದೆ. ಪರಿಣಾಮ ಕಾಡುಕೋಣದ ಹಿಂಭಾಗಕ್ಕೆ ಬಲವಾದ ಪೆಟ್ಟು ಬಿದ್ದು ಅದು ಸ್ಥಳದಲ್ಲಿಯೇ ಮೃತ ಪಟ್ಟಿದೆ.

ಕಾಡುಕೋಣದ ದೇಹವನ್ನು ಅರಣ್ಯ ಇಲಾಖೆಯ ಹಾರ್ದಳ್ಳಿ ಮಂಡಳ್ಳಿ ಡಿಪೋಗೆ ಸಾಗಿಸಿ, ಅಲ್ಲಿಯೇ ಮರಣೋತ್ತರ ಪರೀಕ್ಷೆ ನಡೆಸಿ ಬಳಿಕ ದಹನ ಮಾಡಲಾಯಿತು. ಬೆಳ್ವೆ ಪಶು ಚಿಕಿತ್ಸೆಯ ವೈದ್ಯಾಧಿಕಾರಿ ಡಾ| ಸಂತೋಷ್‌ ಅವರು ಮರಣೋತ್ತರ ಪರೀಕ್ಷೆ ನಡೆಸಿದರು. ಕಾರು ಚಾಲಕ ಸತೀಶ ವಿರುದ್ಧ ವನ್ಯಜೀವಿ ಕಾಯ್ದೆ ಪ್ರಕಾರ ಕೇಸು ದಾಖಲಿಸಲಾಗಿದ್ದು, ಕಾರನ್ನು ವಶಕ್ಕೆ ಪಡೆಯಲಾಗಿದೆ.

ಶಂಕರನಾರಾಯಣ ವಲಯ ಅರಣ್ಯಾಧಿಕಾರಿ ಎ. ಗೋಪಾಲ್‌ ಮಾರ್ಗದರ್ಶನದಲ್ಲಿ ವನಪಾಲಕರಾದ ಹರೀಶ್‌, ವೀರಣ್ಣ ಮಾಯಾ ಚಾರ್‌, ವಲಯ ರಕ್ಷಕರಾದ ಆನಂದ ಬಳೆಗಾರ್‌, ಗುರುರಾಜ್‌ ಹಾಗೂ ಅರಣ್ಯ ವೀಕ್ಷಕರು ಕಾರ್ಯಾ ಚರಣೆಯಲ್ಲಿ ಭಾಗವಹಿಸಿದ್ದರು.