ಕುಸಿದ ಬಾವಿ: ಪುನರ್‌ರಚನೆಗೆ ಜಿಲ್ಲಾಧಿಕಾರಿಗಳಿಗೆ ಮನವಿ

Team Udayavani, Jul 3, 2019, 5:07 AM IST

ಹೆಬ್ರಿ: ಸುಮಾರು 150 ವರ್ಷಗಳಿಂದ ಜನರಿಗೆ ನೀರಿನ ಸಂಪನ್ಮೂಲವೆನಿಸಿದ್ದ ಹಿರಿಯಡಕ ಮಧ್ಯ ಪೇಟೆಯಲ್ಲಿರುವ ಬಾವಿ ಕಳೆದ 4 ದಿನಗಳ ಹಿಂದೆ ಆವರಣ ಗೋಡೆ ಸಹಿತ ಸಂಪೂರ್ಣ ಕುಸಿದಿದ್ದು ಗ್ರಾಮಸ್ಥರ ವಿನಂತಿ ಮೇರೆಗೆ ಮಳೆಗಾಲದ ಅನಂತರ ಬಾವಿಯ ಪುನರ್‌ರಚನೆ ಮಾಡುವಂತೆ ಉಡುಪಿ ಜಿಲ್ಲಾಧಿಕಾರಿ ಅವರಿಗೆ ಜಿ.ಪಂ. ಸದಸ್ಯೆ ಚಂದ್ರಿಕಾ ಕೇಲ್ಕರ್‌ ಜು. 1ರಂದು ಮನವಿ ಸಲ್ಲಿಸಿದ್ದಾರೆ.

ಈ ಬಾರಿ ತೀರ ಜಲಕ್ಷಾಮವಿದ್ದು ಎಲ್ಲೆಡೆ ನೀರು ಬತ್ತಿ ಹೋಗಿದ್ದರೂ ಈ ಬಾವಿ ಬತ್ತಿರಲಿಲ್ಲ. ಆಸುಪಾಸಿನ ಸುಮಾರು 20ಕ್ಕೂ ಹೆಚ್ಚು ಅಂಗಡಿ, ಹೊಟೇಲ್ ಹಾಗೂ ಸುತ್ತಮುತ್ತಲಿನ ಸುಮಾರು 20 ಮನೆಗಳು ಈ ಬಾವಿಯ ನೀರಿಗೆ ಅವಲಂಬಿತರಾಗಿದ್ದರು. ಬಾವಿ ಕುಸಿದಿರುವುದರಿಂದ ಗಂಭೀರವಾದ ನೀರಿನ ಸಮಸ್ಯೆ ಉಂಟಾಗಲಿದ್ದು, ಜನತೆ ತೀವ್ರ ಆತಂಕಕ್ಕೆ ಒಳಗಾಗಿದ್ದಾರೆ. ಅಂತರ್ಜಲ ಮಟ್ಟ ವ್ಯಾಪಕವಾಗಿ ಕುಸಿಯುತ್ತಿರುವ ಸನ್ನಿವೇಶದಲ್ಲಿ ಮುಚ್ಚಿದ ಬಾವಿಯನ್ನು ತುರ್ತಾಗಿ ಪುನಾರಚನೆ ಮಾಡಿದಲ್ಲಿ ಜನರಿಗೆ ಪ್ರಯೋಜನವಾಗಲಿದೆ ಎಂದು ಮನವಿಯಲ್ಲಿ ತಿಳಿಸಲಾಗಿದೆ.

ಈ ಸಂದರ್ಭ ತಾ.ಪಂ. ಸದಸ್ಯೆ ಸಂಧ್ಯಾ ಶೆಟ್ಟಿ, ಗ್ರಾ.ಪಂ. ಸದಸ್ಯ ವಿನೋದ್‌ ಕುಮಾರ್‌, ಕೊಡಿಬೆಟ್ಟು ಶಿವರಾಮ ಶೆಟ್ಟಿ ಮತ್ತಿತರರು ಉಪಸ್ಥಿತರಿದ್ದರು.