ಡಾ| ವೆಂಕಟೇಶ್‌ “ಮಾಹೆ” ನೂತನ ಕುಲಪತಿ ; ಕಾರ್ಯನಿರ್ವಾಹಕ ಉಪಾಧ್ಯಕ್ಷರಾಗಿ ಡಾ| ವಿನೋದ ಭಟ್‌

Team Udayavani, Jun 17, 2020, 10:42 AM IST

ಉಡುಪಿ: ಮಣಿಪಾಲ ಅಕಾಡೆಮಿ ಆಫ್ ಹೈಯರ್‌ ಎಜುಕೇಶನ್‌ (ಮಾಹೆ)ನ ನೂತನ ಕುಲಪತಿಗಳಾಗಿ ನಿವೃತ್ತ ಲೆಫ್ಟಿನೆಂಟ್‌ ಜನರಲ್‌ ಡಾ| ಎಂ.ಡಿ. ವೆಂಕಟೇಶ್‌ ಅವರು ಜವಾಬ್ದಾರಿ ವಹಿಸಿಕೊಳ್ಳಲಿದ್ದಾರೆ. ಹಾಲಿ ಕುಲಪತಿ ಡಾ| ವಿನೋದ ಭಟ್‌ ಅವರನ್ನು ಮಾಹೆಯ ಕಾರ್ಯನಿರ್ವಾಹಕ ಉಪಾಧ್ಯಕ್ಷರನ್ನಾಗಿ ನೇಮಿಸಲಾಗಿದ್ದು, ಅವರಿಬ್ಬರು ಜು. 1ರಂದು ಅಧಿಕಾರ ವಹಿಸಿಕೊಳ್ಳಲಿದ್ದಾರೆ.

ಮಾಹೆ ವಿ.ವಿ.ಯು ಪರಿಗಣಿತ ವಿ.ವಿ.ಗಳ ಪೈಕಿ ಕೇಂದ್ರ ಸರಕಾರದ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯದಿಂದ ಇನ್‌ಸ್ಟಿಟ್ಯೂಟ್‌ ಆಫ್ ಎಮಿನೆನ್ಸ್‌ ಎಂದು ಗುರುತಿಸಲ್ಪಟ್ಟಿದ್ದು, ಮಾಹೆಯನ್ನು ಈ ಸ್ಥಾನಕ್ಕೆ ಎತ್ತರಿಸಲು ಬಹುವಾಗಿ ಶ್ರಮಿಸಿದ ಡಾ| ವಿನೋದ ಭಟ್‌ ಅವರ ಕೊಡುಗೆಯನ್ನು ಈ ಸಂದರ್ಭದಲ್ಲಿ ಮಾಹೆಯ ಕುಲಾಧಿಪತಿ ಡಾ| ರಾಮದಾಸ್‌ ಪೈ ಅವರು ಶ್ಲಾಘಿಸಿದ್ದಾರೆ.

ಡಾ| ರಾಮದಾಸ್‌ ಎಂ. ಪೈ ಅವರು ಹೊರಡಿಸಿರುವ ಪ್ರಕಟನೆಯ ಪ್ರಕಾರ ಆಯ್ಕೆ ಸಮಿತಿಯು ಕುಲಪತಿ ಸ್ಥಾನಕ್ಕೆ ಡಾ| ಎಂ.ಡಿ. ವೆಂಕಟೇಶ್‌ ಅವರ ಹೆಸರನ್ನು ಅಂತಿಮ ಗೊಳಿಸಿದೆ. ಡಾ| ವೆಂಕಟೇಶ್‌ ಅವರು ಸಿಕ್ಕಿಂ-ಮಣಿಪಾಲ ವಿ.ವಿ.ಯ ಕುಲಪತಿಯಾಗಿ ಮೂರು ವರ್ಷಗಳ ಯಶಸ್ವಿ ಅಧಿಕಾರಾವಧಿಯನ್ನು ಜೂ. 30ರಂದು ಪೂರ್ಣಗೊಳಿಸಲಿದ್ದಾರೆ. ಅವರು ಶಿಕ್ಷಣ ಕ್ಷೇತ್ರದಲ್ಲಿ ಅಪಾರ ಅನುಭವ ಪಡೆದವರು. ಅವರ ಅಧಿಕಾರಾವಧಿಯಲ್ಲಿ ಸಿಕ್ಕಿಂ- ಮಣಿಪಾಲ ವಿ.ವಿ. ಸರ್ವಾಂಗೀಣ ಅಭಿವೃದ್ಧಿಯನ್ನು ಸಾಧಿಸಿದೆ. ಅವರು ಹೊಂದಿರುವ ವಿಶೇಷ ಆಡಳಿತ ಪರಿಣತಿಯಿಂದಾಗಿ ಸಿಕ್ಕಿಂ-ಮಣಿಪಾಲ ವಿ.ವಿ.ಯು ದೇಶದ ಖಾಸಗಿ ವಿ.ವಿ.ಗಳ ಪೈಕಿ ಉಚ್ಚ ಸ್ಥಾನದಲ್ಲಿ ಗುರುತಿಸಿಕೊಳ್ಳುವಂತಾಗಿದೆ.

ಡಾ| ಎಂ.ಡಿ. ವೆಂಕಟೇಶ್‌ ಅವರು ಮೈಸೂರು ಮೆಡಿಕಲ್‌ ಕಾಲೇಜಿನಲ್ಲಿ 1978ರಲ್ಲಿ ಎಂಬಿಬಿಎಸ್‌ ಪದವಿ ಮುಗಿಸಿ ಸೇನೆಯ ವೈದ್ಯಕೀಯ ವಿಭಾಗ ಸೇರಿದರು. 1986ರಲ್ಲಿ ಮುಂಬಯಿ ವಿ.ವಿ.ಯಲ್ಲಿ ಇಎನ್‌ಟಿ ವಿಭಾಗದಲ್ಲಿ ಎಂಎಸ್‌ ಪದವಿ ಪಡೆದ ಅವರು ಕೊಕ್ಲಿಯರ್‌ ಇಂಪ್ಲಾಂಟೇಶನ್‌ ಮತ್ತು ನ್ಯೂರೊಟಾಲೊಜಿ
ಯಲ್ಲಿ ದೇಶ-ವಿದೇಶದಲ್ಲಿ ತರಬೇತಿ ಪಡೆದಿದ್ದಾರೆ. 38 ವರ್ಷಗಳ ಕಾಲ ಸೇನಾ ಪಡೆಯ ಶೈಕ್ಷಣಿಕ ಸಂಸ್ಥೆಗಳಲ್ಲಿ ದುಡಿದ ಡಾ| ವೆಂಕಟೇಶ್‌ ಅವರು ಅನೇಕ ಆಡಳಿತಾತ್ಮಕ ಜವಾಬ್ದಾರಿಗಳನ್ನು ನಿರ್ವಹಿಸಿದ್ದಾರೆ. ಈ ಅವಧಿಯಲ್ಲಿ ವೈದ್ಯಕೀಯ ಶಿಕ್ಷಣ ಕ್ಷೇತ್ರಕ್ಕೆ ಅಪೂರ್ವ ಕೊಡುಗೆ ನೀಡಿದ್ದಾರೆ. ಪದವಿ, ಸ್ನಾತಕೋತ್ತರ ಪದವಿಗೆ ಆನ್‌ಲೈನ್‌ ಪ್ರವೇಶ ಪ್ರಕ್ರಿಯೆಯನ್ನು ಪರಿಚಯಿಸಿದ್ದಾರೆ. ಅವರು ಎಂಸಿಐ, ಐಸಿಎಂಆರ್‌ ಸೇರಿದಂತೆ ಹಲವಾರು ಸಮಿತಿಗಳ ಸದಸ್ಯರಾಗಿ ಕಾರ್ಯನಿರ್ವಹಿಸಿದ್ದಾರೆ. ಡಾ| ವೆಂಕಟೇಶ್‌ ಅವರ ಪತ್ನಿ ಕುಸುಮಾ ವೆಂಕಟೇಶ್‌ ಅವರೂ ಪರಿಣತ ಶಿಕ್ಷಣ ತಜ್ಞೆ. ಓರ್ವ ಪುತ್ರಿ ಅಮೆರಿಕ, ಇನ್ನೋರ್ವ ಪುತ್ರಿ ಮುಂಬಯಿಯಲ್ಲಿ ನೆಲೆಸಿದ್ದಾರೆ.