ತಡವಾಗಿಯಾದರೂ ಎಚ್ಚೆತ್ತ ಕುಂದಾಪುರ ಪುರಸಭೆ

Team Udayavani, Jun 7, 2018, 2:05 AM IST

ಕುಂದಾಪುರ: ಒಂದು ಬದಿ ಮಾತ್ರ ಚರಂಡಿ ಇದೆ. ಇನ್ನೊಂದು ಬದಿ ರಸ್ತೆಗೆ ಚರಂಡಿಯೇ ಇಲ್ಲ. ಮಳೆಗಾಲದ ನೀರಂತಲ್ಲ ತ್ಯಾಜ್ಯ ನೀರೂ ಹೋಗುವುದು ಕಷ್ಟ ಕೆಲ ಬಾರಿ. ಮಳೆ ಆರಂಭವಾಗಿ ದಿನಗಳು ಅದೆಷ್ಟೋ ಆಗಿದೆ. ಆದರೆ ಬುಧವಾರವಷ್ಟೇ ಜೆಸಿಬಿ  ತಂದು ಕಾಮಗಾರಿ ಆರಂಭಿಸಲಾಗಿದೆ. ಇದು ಕುಂದಾಪುರ ಪುರಸಭೆಯ ವಾರ್ಡ್‌ ಸಂಖ್ಯೆ 10ರ ಸ್ಥಿತಿ.

ಒಂದೇ ಬದಿ ಚರಂಡಿ
ಪುರಸಭೆಯ ಕಂದಾಯ ವಾರ್ಡ್‌ 5 ಹಾಗೂ ಜನಪ್ರತಿನಿಧಿ ವಾರ್ಡ್‌ 10ನ್ನು ಉದಯವಾಣಿ ಮಳೆಗಾಲದ ಸಿದ್ಧತೆ ವೀಕ್ಷಣೆಗೆ ಆಯ್ಕೆ ಮಾಡಲಾಗಿತ್ತು. ಚರ್ಚ್‌ ಕ್ರಾಸ್‌ನಿಂದ ಆರಂಭವಾಗುತ್ತದೆ. ಇಲ್ಲಿನ ಮುಖ್ಯರಸ್ತೆಯ ಪಾರಿಜಾತ ಸರ್ಕಲ್‌ ನ ಚರ್ಚ್‌ ರಸ್ತೆಯಿಂದ ಬರೆಕಟ್ಟೆವರೆಗೆ ಈ ವಾರ್ಡ್‌ನ ವ್ಯಾಪ್ತಿ ಇದೆ. ಮನೆಗಳು, ವಾಣಿಜ್ಯ ಮಳಿಗೆಗಳು ಎಲ್ಲ ಇವೆ. ಆದರೆ ಚರಂಡಿ ಮಾತ್ರ ಒಂದೇ ಬದಿ ಇದೆ. ಆದರೆ ಈವರೆಗೆ ಅಂತಹ ದೊಡ್ಡ ಪ್ರಮಾಣದ ಸಮಸ್ಯೆ ಆಗಿಲ್ಲ.

12 ಲಕ್ಷ ರೂ. ಮಂಜೂರು 
ಮಳೆಗಾಲ ಆರಂಭವಾಗುವ ಮುನ್ನ ನಡೆಸಬೇಕಿದ್ದ ಕಾಮಗಾರಿಯನ್ನು ಮಳೆ ಆರಂಭವಾದ ಬಳಿಕ ಮಾಡಲಾಗಿದೆ. ಇಷ್ಟಾದರೂ ಆಗಿದೆ ಎಂಬ ಸಮಾಧಾನ ಇಲ್ಲಿನ ಜನರದ್ದು. ಚರಂಡಿ ಕಾಮಗಾರಿಗಾಗಿ 12 ಲಕ್ಷ ರೂ. ಮಂಜೂರಾಗಿದ್ದು ಕಾಮಗಾರಿಗೆ ಚಾಲನೆ ನೀಡಲಾಗಿದೆ.

ನೀರಿನ ಸಮಸ್ಯೆ ಇದೆ
ಈ ಭಾಗದಲ್ಲಿ ಒಂದಷ್ಟು ಕುಡಿಯುವ ನೀರಿನ ಸಮಸ್ಯೆ ಇದೆ. ಕುಡಿಯಲು ಪುರಸಭೆಯ ನಳ್ಳಿ ನೀರು. ಆದರೆ ಕೆಂಪು ನೀರು ಬರುತ್ತದೆ. ಇದಕ್ಕೆ ಇನ್ನೂ ಪರಿಹಾರ ಸಿಕ್ಕಿಲ್ಲ. ಕೆಲವರು ಬಾವಿ ತೋಡಲು ಯತ್ನಿಸಿದರೂ ತೈಲಮಿಶ್ರಿತ ನೀರು ಬರಲಾರಂಭಿಸಿತು. ಆದ್ದರಿಂದ ಬಾವಿಯ ಯೋಜನೆ ಕೈ ಬಿಟ್ಟಿದ್ದಾರೆ.

ಬೇಗ ಮಾಡಬಹುದಿತ್ತು
ಮಳೆಗಾಲದಲ್ಲಿ ಕಾಮಗಾರಿ ಆರಂಭಿಸುವ ಬದಲು ಮಳೆ ಆರಂಭಕ್ಕೆ ಮುನ್ನವೇ ಕಾಮಗಾರಿ ನಡೆಸಬಹುದಿತ್ತು. ಉಳಿದಂತೆ ಮಳೆಗಾಲದಲ್ಲಿ ನೀರು ನಿಲ್ಲುವ ಆತಂಕದ ಸಮಸ್ಯೆಗಳು ಇಲ್ಲಿ ಇಲ್ಲ.
– ಪ್ರವೀಣ್‌ ಕುಮಾರ್‌ ಟಿ. 

ನೀತಿ ಸಂಹಿತೆಯ ತಡೆ
ಚುನಾವಣಾ ನೀತಿ ಸಂಹಿತೆಯಿಂದಾಗಿ ಕಾಮಗಾರಿ ವಿಳಂಬವಾಗಿದೆ. ಆದಷ್ಟು ಶೀಘ್ರ ಕಾಮಗಾರಿ ಮುಗಿಸಿ ಸಮಸ್ಯೆಯಾಗದಂತೆ ನೋಡಿಕೊಳ್ಳಲಾಗುವುದು.
– ರಾಜೇಶ್‌ ಕಾವೇರಿ, ಪುರಸಭೆ ಉಪಾಧ್ಯಕ್ಷ

— ಲಕ್ಷ್ಮೀ ಮಚ್ಚಿನ