ಹೈಟೆಕ್‌ ಮೀನು ಮಾರುಕಟ್ಟೆ ನಿರ್ಮಾಣಕ್ಕಾಗಿ ಅಂಗಡಿ ತೆರವಿಗೆ ಯತ್ನ

Team Udayavani, Mar 13, 2017, 2:20 PM IST

ಕೋಟ: ಐರೋಡಿ ಗ್ರಾ.ಪಂ. ವ್ಯಾಪ್ತಿಯ ಸಾಸ್ತಾನ ಪೇಟೆಯಲ್ಲಿ  ನಿರ್ಮಾಣವಾಗುತ್ತಿರುವ ಸುಮಾರು 2 ಕೋಟಿ ರೂ. ವೆಚ್ಚದ ಹೈಟೆಕ್‌ ಮೀನುಮಾರುಕಟ್ಟೆಗಾಗಿ ಪಂಚಾಯತ್‌ನಿಂದ  ಈ ಹಿಂದೆ ಬಾಡಿಗೆ ನೀಡಲಾದ ಅಂಗಡಿ ಕೋಣೆಗಳನ್ನು ಐರೋಡಿ ಗ್ರಾ.ಪಂ.ವತಿಯಿಂದ ರವಿವಾರ ತೆರವು
ಗೊಳಿಸಲು ಮುಂದಾಗಲಾಯಿತು. ಈ ಸಂದರ್ಭ ಬಾಡಿಗೆದಾರರು, ಸ್ಥಳೀಯರು ವಿರೋಧ ವ್ಯಕ್ತಪಡಿಸಿದ ಘಟನೆ ನಡೆಯಿತು.

ನ್ಯಾಯಾಲಯದ ಆದೇಶದ 
ತನಕ ತೆರವು ಸರಿಯಲ್ಲ 
ಅಂಗಡಿ ಕೋಣೆಯನ್ನು ತೆರವುಗೊಳಿಸದಂತೆ ಬಾಡಿಗೆದಾರರಾದ ನಾವು ನ್ಯಾಯಾಲಯದ ಮೊರೆ ಹೋಗಿದ್ದು, ನ್ಯಾಯಾಲಯದಿಂದ ಸ್ಪಷ್ಟ ಆದೇಶ ಬರುವ ತನಕ ಅಂಗಡಿ ಕೋಣೆಯನ್ನು ಯಾವುದೇ ಕಾರಣಕ್ಕೆ ತೆರವುಗೊಳಿಸಬಾರದು ಹಾಗೂ ಸಮಸ್ಯೆ ಮಾಡಬಾರದು ಎಂದು ಬಾಡಿಗೆದಾರರು ಪಂಚಾಯತ್‌ ವಿರುದ್ಧ ಆಕ್ರೋಶ  ವ್ಯಕ್ತಪಡಿಸಿದರು. ಈ ಸಂದರ್ಭ ಕೆಲವು ಮಂದಿ ಸ್ಥಳೀಯರು ಪಂಚಾಯತ್‌ ಕ್ರಮದ ಬಗ್ಗೆ ಆಕ್ಷೇಪವ್ಯಕ್ತಪಡಿಸಿ ಬಾಡಿಗೆದಾರರ ಪರ ವಾದಿಸಿದರು.

ಮೀನುಗಾರ ಮಹಿಳೆಯರಿಂದ 
ತರಾಟೆ 
ಈ ಸಂದರ್ಭ ಇಲ್ಲಿ ಮೀನು ಮಾರಾಟ ಮಾಡುವ ಮಹಿಳೆಯರು,  ಸಾಸ್ತಾನದ ಮೀನು ಮಾರುಕಟ್ಟೆ ಅವ್ಯವಸ್ಥೆಯ ಆಗರವಾಗಿದ್ದು, ಇದೀಗ ನಮ್ಮ ಸಮಸ್ಯೆಗೆ ಪರಿಹಾರವೆಂಬಂತೆ ಹೆ„ಟೆಕ್‌ ಮಾರುಕಟ್ಟೆಯ ನಿರ್ಮಾಣಕ್ಕೆ ಮುಂದಾಗಲಾಗಿದೆ. ಇದಕ್ಕೆ  ಅಡ್ಡಿ ಪಡಿಸುವುದು ಸರಿಯಲ್ಲ ಎಂದು ಬಾಡಿಗೆದಾರರು ಹಾಗೂ ಅಡ್ಡಿಪಡಿಸಿದ  ಸ್ಥಳೀಯರ ವಿರುದ್ಧ ಆಕ್ಷೇಪ ವ್ಯಕ್ತಪಡಿಸಿದರು.

ಘಟನಾ ಸ್ಥಳಕ್ಕೆ ವರದಿ ಮಾಡಲು ತೆರಳಿದ ಮಾಧ್ಯಮದವರನ್ನು ಪಂಚಾಯತ್‌ ಸದಸ್ಯರು ಹಾಗೂ ಮೀನುಗಾರ ಮಹಿಳೆಯರು ತಡೆಯಲು ಮುಂದಾದರು. ಸಾರ್ವಜನಿಕ ಸಮಸ್ಯೆಗೆ  ಸಂಬಂಧಿಸಿದಂತೆ ವರದಿ ಮಾಡುವುದು ನಮ್ಮ ಕರ್ತವ್ಯವಾಗಿದೆ. ಆದ್ದರಿಂದ  ನಮ್ಮ ಕರ್ತವ್ಯಕ್ಕೆ ಅಡ್ಡಿಪಡಿಸದಂತೆ  ಪತ್ರಕರ್ತರು ವಿನಂತಿಸಿದ ಮೇರೆಗೆ ತೆರವು ಕಾರ್ಯಚರಣೆ ನಡೆಯುತ್ತಿರುವಲ್ಲಿಗೆ ಬಿಡಲಾಯಿತು.

ಅಭಿವೃದ್ಧಿ ಸಹಿಸದವರ ಕೈವಾಡ 
ಐರೋಡಿ ಗ್ರಾ.ಪಂ. ವ್ಯಾಪ್ತಿಯಲ್ಲಿ ನಡೆಯುವ ಅಭಿವೃದ್ಧಿ ಕಾರ್ಯಗಳನ್ನು ಸಹಿಸದ ಕೆಲವೊಂದು ಹಿತಾಸಕ್ತಿಗಳು ಅಂಗಡಿ ತೆರವಿಗೆ ಅಡ್ಡಿಪಡಿಸುತ್ತಿದ್ದಾರೆ ಹಾಗೂ ಸಕಾರಣವಿಲ್ಲದೆ ನ್ಯಾಯಾಲಯದ ಮೊರೆ ಹೋಗಿದ್ದಾರೆ. ಹೈಟೆಕ್‌ ಮೀನುಮಾರುಕಟ್ಟೆಯ ಜತೆಗೆ ಸಂತೆ ಮಾರುಕಟ್ಟೆ, ಅಂಗಡಿ ಕೋಣೆಗಳು  ನಿರ್ಮಾಣವಾಗುವುದರಿಂದ ಯಾರಿಗೂ ಸಮಸ್ಯೆಯಾಗುವುದಿಲ್ಲ. ಆದ್ದರಿಂದ ಸ್ಥಳೀಯರು ಈ ಕುರಿತು ತಲೆಕೆಡಿಸಿಕೊಳ್ಳದೆ ಅಭಿವೃದ್ಧಿಗೆ ಸಹಕಾರ ನೀಡಬೇಕು ಎಂದು ಐರೋಡಿ ಗ್ರಾ.ಪಂ.ಅಧ್ಯಕ್ಷ ಮೋಸೆಸ್‌ ರೋಡಿಗ್ರಸ್‌ ಮನವಿ ಮಾಡಿದರು.

ಈ ಸಂದರ್ಭ ಐರೋಡಿ ಗ್ರಾ. ಅಧ್ಯಕ್ಷ ಮೋಸೆಸ್‌ ರೋಡ್ರಿಗಸ್‌, ಸದಸ್ಯರಾದ ಆನಂದ ಗಾಣಿಗ, ಶಿವರಾಮ ಶ್ರೀಯಾನ್‌, ರಾಮ, ದೂರುದಾರರಾದ ಚಂದ್ರಮೋಹನ್‌, ರಾಘವೇಂದ್ರ,ಥೋಮಸ್‌ ರೋಡಿಗ್ರಸ್‌ ಮುಂತಾದವರು ಉಪಸ್ಥಿತರಿದ್ದರು.

ತಹಶೀಲ್ದಾರರಿಂದ ಯಥಾಸ್ಥಿತಿ ಕಾಪಾಡಲು ಸೂಚನೆ 
ಸ್ಥಳಕ್ಕೆ ಭೇಟಿ ನೀಡಿದ ಬ್ರಹ್ಮಾವರ ವಿಶೇಷ  ತಹಶೀಲ್ದಾರ ಪ್ರದೀಪ್‌ ಕುರುಡೇಕರ್‌ ಅವರು, ಇಲ್ಲಿನ ಅಂಗಡಿ ಕೋಣೆಯವರು ನ್ಯಾಯಾಲಯದ ಮೊರೆ ಹೋಗಿರುವುದರಿಂದ ಎ. 5ರ ತನಕ ಯಥಾ ಸ್ಥಿತಿ ಕಾಪಾಡಲು ನ್ಯಾಯಾಲಯ ತಿಳಿಸಿದೆ ಹಾಗೂ  ಮಾ.27ರೊಳಗೆ ವರದಿ ನೀಡುವಂತೆ 
ಗ್ರಾ.ಪಂ.ಗೆ ತಿಳಿಸಿದೆ. ಹೀಗಾಗಿ ಅಲ್ಲಿಯವರೆಗೆ ಅಂಗಡಿ ಕೋಣೆಯನ್ನು ತೆರವುಗೊಳಿಸದಿರಲು ಗ್ರಾ.ಪಂ.ಗೆ ಸೂಚಿಸಲಾಗಿದೆ. ಮುಂದೆ ನ್ಯಾಯಾಲಯದ ನಿರ್ದೇಶನದಂತೆ ಕ್ರಮಕೈಗೊಳ್ಳಲಾಗುವುದು ಎಂದು ಬ್ರಹ್ಮಾವರ ವಿಶೇಷ ತಹಶೀಲ್ದಾರ್‌ ಪ್ರದೀಪ್‌ ಕುರುಡೇಕರ್‌  ಮಾಧ್ಯಮಕ್ಕೆ ತಿಳಿಸಿದ್ದಾರೆ.