ಬೋರ್‌ವೆಲ್‌ ರೀಚಾರ್ಜ್‌ ಮಾಡಿದರೆ 25 ವರ್ಷ ನೀರು ಖಾತ್ರಿ

Team Udayavani, May 8, 2019, 6:30 AM IST

ಉಡುಪಿ: ವರ್ಷಕ್ಕೆ ಸುಮಾರು 4,000 ಮಿ.ಮೀ. ಮಳೆಯಾಗುವ ಕರಾವಳಿಯಲ್ಲೂ ಮಳೆನೀರನ್ನು ಕೊಳವೆಬಾವಿಗೆ ಇಂಗಿಸುವ (ಬೋರ್‌ವೆಲ್‌ ರೀಚಾರ್ಜ್‌) ಅಗತ್ಯವನ್ನು ಮಳೆನೀರು ಕೊಯ್ಲು ತಜ್ಞ ಡಾ| ಎನ್‌.ಜಿ.ದೇವರಾಜ ರೆಡ್ಡಿ ಅವರು ಪ್ರತಿಪಾದಿಸಿದ್ದಾರೆ.

ಹೊಸೂರು ಕರ್ಜೆಯಲ್ಲಿ ಕೊಳವೆ ಬಾವಿಗೆ ನೀರು ಇಂಗಿಸುವ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಆಗಮಿಸಿದ ಅವರು ಉದಯವಾಣಿಯೊಂದಿಗೆ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಂಡರು.

– ರೀಚಾರ್ಜ್‌ ಆವಶ್ಯಕತೆ ಯಾಕೆ?
ಇರುವ ಜಲಮೂಲವನ್ನು ಸಂರಕ್ಷಿ ಸುವ ಕೆಲಸ ಮಾಡಿದರೆ ಅವಿಭಜಿತ ದ.ಕ.
ಜಿಲ್ಲೆಯಲ್ಲಿ ಕೊಳವೆ ಬಾವಿಗಳ ಆವಶ್ಯಕತೆ ಇರುವುದಿಲ್ಲ. ಉಡುಪಿ ಜಿಲ್ಲೆಯಲ್ಲಿ ಈಗಾಗಲೇ 60ಕ್ಕೂ ಅಧಿಕ ಕಡೆಗಳಲ್ಲಿ ರೀಚಾರ್ಜ್‌ ಮಾಡಲಾಗಿದೆ ಎಂದರು.

– ರೀಚಾರ್ಜ್‌ ಹೇಗೆ?
8 ಅಡಿ ಅಗಲ 10 ಅಡಿ ಆಳದ ಕೊಳವೆ ಬಾವಿ ಹೊಂಡಕ್ಕೆ ರೀಚಾರ್ಜ್‌ ಮಾಡಬೇಕಿದ್ದರೆ 180 ರಂಧ್ರಗಳಿರುವ ಕೇಸಿಂಗ್‌ ಪೈಪ್‌ ಅಳವಡಿಸಿಕೊಳ್ಳಬೇಕು. ಇದಕ್ಕೆ ಅಕ್ವಾ ಮೆಡ್‌, ನೈಲನ್‌ ಮೆಷ್‌, ಮರಳು ಹೊದಿಕೆಯ ಮೂರು ಫಿಲ್ಟರ್‌ಗಳನ್ನು ಅಳವಡಿಸಲಾಗಿದೆ. 5 ಅಡಿ ಎತ್ತರದಷ್ಟು ದಪ್ಪ ಕಲ್ಲು, 40 ಎಂಎಂ ಜಲ್ಲಿಕಲ್ಲನ್ನು 2 ಅಡಿ ಎತ್ತರಕ್ಕೆ ತುಂಬಬೇಕು. ಇದರ ಮೇಲಾºಗಕ್ಕೆ 20 ಎಂಎಂ ಜಲ್ಲಿಕಲ್ಲನ್ನು 1 ಅಡಿಗಳಷ್ಟು ತುಂಬಬೇಕು. ಮೇಲಾºಗದಲ್ಲಿ ಗೊಜ್ಜುಕಲ್ಲು ತುಂಬ ಬೇಕು. ಅನಂತರ ಮಳೆನೀರನ್ನು (ಮೇಲಿನಿಂದ ಬೀಳುವ ಮತ್ತು ಭೂಮಿ ಮೇಲೆ ಹರಿದು ಬರುವ) ನೇರವಾಗಿ ಇಂಗುಗುಂಡಿಗೆ ತುಂಬಿಸಬಹುದು. ಬಾವಿಗೆ ಮನೆ ಮಾಡಿನ ನೀರನ್ನು ನೇರವಾಗಿ ಇಳಿಸುವಂತೆ ಮಾಡಲು ಕೇವಲ 500-1,000 ರೂ. ಸಾಕು.

– ಎಷ್ಟು ವಿಧಾನಗಳಿವೆ?
ಕೊಳವೆಬಾವಿಯನ್ನು ರೀಚಾರ್ಜ್‌ ಮಾಡುವುದರಿಂದ ಸುತ್ತಲಿನ 1 ಕಿ.ಮೀ. ವ್ಯಾಪ್ತಿಯ ಅಂತರ್ಜಲ ಮಟ್ಟ ವೃದ್ಧಿಯಾಗುತ್ತದೆ. ಇದರಲ್ಲಿ 15 ಪ್ರಕಾರದ ಮಾದರಿಗಳಿವೆ. 20ರಿಂದ 40ಸಾವಿರ ರೂ. ವೆಚ್ಚ ತಗಲುತ್ತದೆ. ಒಂದು ಬಾರಿ ರೀಚಾರ್ಜ್‌ ಪ್ರಕ್ರಿಯೆಯನ್ನು ನಿರ್ಮಿಸಿದರೆ ಅದು 25 ವರ್ಷ ಬಾಳಿಕೆ ಬರುತ್ತದೆ.

– ಚಿತ್ರದುರ್ಗ ಮುಂದೆ
ಕೊಳವೆ ಬಾವಿ ರೀಚಾರ್ಜ್‌ ಮಾಡು ವುದರಲ್ಲಿ ಚಿತ್ರದುರ್ಗ ಪ್ರಥಮ ಸ್ಥಾನದ ಲ್ಲಿದೆ. ಉದ್ಯೋಗ ಖಾತರಿ ಯೋಜನೆ ಮೂಲಕ 2015ರಲ್ಲಿ 5 ಸಾವಿರ ನಿರ್ಜೀವ ಕೊಳವೆ ಬಾವಿಗಳಿಗೆ ಪುನರ್ಜನ್ಮ ನೀಡಲಾ ಗಿದೆ. ಕರ್ನಾಟಕ, ಆಂಧ್ರಪ್ರದೇಶ, ಮಹಾರಾಷ್ಟ್ರ, ತೆಲಂಗಾಣ, ತಮಿಳುನಾಡು, ಕೇರಳ, ಗುಜರಾತ್‌ಗಳಲ್ಲಿ ಕೊಳವೆ ಬಾವಿ ರೀಚಾರ್ಜ್‌ ಮಾಡಿ ಇವರು ಯಶಸ್ಸು ಕಂಡಿದ್ದಾರೆ.

– ರಕ್ಷಣೆ ಹೇಗೆ?
ಅವಿಭಜಿತ ದ.ಕ. ಜಿಲ್ಲೆಯಲ್ಲಿ ಲಕ್ಷಗಟ್ಟಲೆ ನೀರಿನ ಚಿಲುಮೆಯಿದೆ. ಅದನ್ನು ರಕ್ಷಿಸುವ ಜತೆಗೆ ಪಾರಂಪರಿಕ ಗಿಡಗಳ ಸಹಿತ ಅರಣ್ಯ ಬೆಳೆಸುವ ಕಾರ್ಯವೂ ನಡೆಯಬೇಕು. ನೀರಿನ ಒರತೆ ಹೆಚ್ಚಿಸಬೇಕು. ನದಿ, ತೋಡು ಇಂಗಿಸಬಾರದು. ಖಾಸಗಿ ಜಾಗದಲ್ಲಿ ಶೇ. 25ರಷ್ಟು ಜಾಗವನ್ನು ಅರಣ್ಯಕ್ಕೆ ಮೀಸಲಿರಿಸಬೇಕು. ಮನೆಯಲ್ಲಿ ಒಮ್ಮೆ ಬಳಸಿದ ನೀರನ್ನು 3ನೇ ಬಾರಿ ಬಳಸುವಂತೆ ಮಾಡಬೇಕು. ಉದಾಹರಣೆಗೆ ಸ್ನಾನ ಮಾಡಿದ, ಬಟ್ಟೆ ಒಗೆದ ನೀರನ್ನು ಗಿಡಗಳಿಗೆ, ವಾಹನ ತೊಳೆಯಲು ಬಳಸಬಹುದು.

ಎಕ್ರೆ ಜಾಗದಲ್ಲಿ ಕೋಟಿ ಲೀ. ನೀರು!
ಉಡುಪಿ ಜಿಲ್ಲೆಯಲ್ಲಿ ವರ್ಷಕ್ಕೆ 1 ಎಕ್ರೆ ಪ್ರದೇಶದಲ್ಲಿ 1 ಕೋಟಿ ಲೀ. ನೀರು ಬೀಳುತ್ತದೆ. ಇದರಲ್ಲಿ ಉಳಿತಾಯವಾಗುವುದು ಶೇ.10 ಮಾತ್ರ. ಉಳಿದ ಶೇ. 90 ನೀರು ಪೋಲಾಗುತ್ತಿದೆ.

-ಡಾ| ಎನ್‌.ಜಿ.ದೇವರಾಜ ರೆಡ್ಡಿ , ಮಳೆ ಕೊಯ್ಲು ತಜ್ಞ