ಮಲ್ಪೆ ಕಿನಾರೆ: ಜೆಲ್ಲಿ  ಫಿಶ್‌ ದಾಳಿ

Team Udayavani, Oct 23, 2018, 10:23 AM IST

ಮಲ್ಪೆ: ಸಮುದ್ರದ ನೀರಿನಲ್ಲಿ ಸ್ನಾನ ಮಾಡುತ್ತಿದ್ದ ಆರು ಮಂದಿ ಸೋಮವಾರ ಜೆಲ್ಲಿ ಫಿಶ್‌ (ತೊಜ್ಜು) ದಾಳಿಗೆ ಒಳಗಾದರು. ಅವರಿಗೆ ಸ್ಥಳದಲ್ಲಿಯೇ ಚಿಕಿತ್ಸೆ ನೀಡಿ ಅನಂತರ ಯಾರೂ ಕಡಲಿಗೆ ಇಳಿಯದಂತೆ ಎಚ್ಚರ ವಹಿಸಲಾಯಿತು. ಸರಣಿ ರಜೆಯ ಹಿನ್ನೆಲೆಯಲ್ಲಿ ಕೆಲವು ದಿನಗಳಿಂದ ಮಲ್ಪೆ ಬೀಚ್‌ನಲ್ಲಿ ಭಾರೀ ಜನಸಂದಣಿ ಇತ್ತು.

ಮೈಕ್‌ನಲ್ಲಿ ಎಚ್ಚರಿಕೆ
ಜೆಲ್ಲಿ ಫಿಶ್‌ ದಾಳಿ ಮಾಡುತ್ತಿದ್ದಂತೆ ಯಾರೂ ಸಮುದ್ರಕ್ಕೆ ಇಳಿಯದಂತೆ ಮೈಕ್‌ ಮೂಲಕ ಎಚ್ಚರಿಕೆ ನೀಡಲಾಯಿತು. ಜೆಲ್ಲಿ ಫಿಶ್‌ ಮೈಗೆ ತಾಗಿಕೊಂಡು ಹೋದರೆ ಆ ಪ್ರದೇಶದಲ್ಲಿ ಉರಿ, ದಪ್ಪಗಾಗುವುದು, ಗೀರಿದಂತೆ ಗಾಯ ಆಗುತ್ತದೆಂದು ಸಿಬಂದಿ ತಿಳಿಸಿದ್ದಾರೆ.

2-3 ದಿನ ಇರುವ ಸಾಧ್ಯತೆ
ಕೆಲವೊಮ್ಮೆ ಜೆಲ್ಲಿ ಫಿಶ್‌ ಮತ್ತು ತೊರಕೆ ಮೀನಿನ ಮರಿಗಳು ಕಿನಾರೆಗೆ ಬಂದಾಗ ಈ ರೀತಿ ದಾಳಿ ನಡೆಸುತ್ತವೆ. ಅವುಗಳು ಒಮ್ಮೆ ಬಂದರೆ 2-3 ದಿನ ಇರುವುದೂ ಇದೆ. ಜೆಲ್ಲಿ ಫಿಶ್‌ ರವಿವಾರ ಗೋಕರ್ಣ ಬೀಚ್‌ನಲ್ಲಿ ದಾಳಿ ನಡೆಸಿದ್ದು, ಕೆಲವರಿಗೆ ಗಾಯವಾಗಿತ್ತು. 

ಜೆಲ್ಲಿ ಫಿಶ್‌ನಲ್ಲಿ ಎರಡು ರೀತಿ ಇದ್ದು, ಒಂದು ಬಿಳಿಯದು, ಇನ್ನೊಂದು ನಸು ಕೆಂಪಾಗಿರುತ್ತದೆ. ಕೆಂಪು ಜೆಲ್ಲಿ ಫಿಶ್‌ ಸ್ಪರ್ಶಿಸಿದರೆ ಉರಿ ಹೆಚ್ಚು. ಮಲ್ಪೆ ಸೈಂಟ್‌ ಮೆರೀಸ್‌ ದ್ವೀಪದ ಒಂದು ಬದಿಯಲ್ಲಿ ಈ ರೀತಿಯ ಮೀನು ಸಾಮಾನ್ಯ. ಆ ಪ್ರದೇಶಕ್ಕೆ ಯಾರೂ ಹೋಗದಂತೆ ತಡೆಯಲಾಗುತ್ತಿದೆ. ಬೀಚ್‌ನಲ್ಲಿ ಆ್ಯಂಬುಲೆನ್ಸ್‌ ಸೇವೆ ಇದೆ ಎಂದು ಬೀಚ್‌ ಅಭಿವೃದ್ಧಿ ಸಮಿತಿಯ ಸಂದೇಶ್‌ ಶೆಟ್ಟಿ ತಿಳಿಸಿದ್ದಾರೆ. ಪಣಂಬೂರು ಕಿನಾರೆಯಲ್ಲೂ ಜೆಲ್ಲಿ ಫಿಶ್‌ ಕಂಡುಬಂದಿದೆ, ಆದರೆ ಯಾರೂ ಗಾಯಗೊಂಡಿಲ್ಲ.