ಹೊಸಾಡು ಗ್ರಾಮಸ್ಥರಿಗೆ ಕಾಲು ಸಂಕ ಇನ್ನೂ ಕನಸು

Team Udayavani, Jul 15, 2019, 5:30 AM IST

ಬೈಂದೂರು: ಮಳೆಗಾಲದಲ್ಲಿ ಸರ್ಕಸ್‌ ಮಾಡುತ್ತ ಹೊಳೆ ದಾಟುವ ಹೊಸಾಡು ಗ್ರಾಮದ ಜನರಿಗೆ ಈ ವರ್ಷವೂ ಕಾಲುಸಂಕ ನಿರ್ಮಾಣದ ಆಸೆ ಈಡೇರಿಲ್ಲ.

ಕಳೆದ ವರ್ಷ ಇಲಾಖೆ ಅನುದಾನ ಬಿಡುಗಡೆ ಮಾಡಿದ್ದರೂ, ಕಾಮಗಾರಿ ಅನುಷ್ಠಾನಕ್ಕೆ ವಿಳಂಬ ವಾಗಿರುವುದರಿಂದ ಕಾಲ್ತೋಡು ಗ್ರಾ.ಪಂ. ವ್ಯಾಪ್ತಿಯ ಬೋಳಂಬಳ್ಳಿ ಸಮೀಪದ ಹೊಸಾಡು ಜನರು ಆತಂಕದಿಂದಲೇ ಹೊಳೆ ದಾಟಬೇಕಾಗಿದೆ.

10 ಲಕ್ಷ ರೂ. ಅನುದಾನ ಘೋಷಣೆ ಮಾತ್ರ

ಇಲ್ಲಿನ ಸಮಸ್ಯೆ ಬಗ್ಗೆ ಕಳೆದ ವರ್ಷ ಉದಯ ವಾಣಿ ವರದಿ ಮಾಡಿತ್ತು. ವರದಿಗೆ ಸ್ಪಂದಿಸಿದ ಶಾಸಕರು, ಸ್ಥಳಕ್ಕೆ ಭೇಟಿ ನೀಡಿ ಕಾಲುಸಂಕ ನಿರ್ಮಿಸಲು ಅಂದಾಜು ಪಟ್ಟಿ ತಯಾರಿಸಲು ಅಧಿಕಾರಿಗಳಿಗೆ ಸೂಚಿಸಿದ್ದರು. ಜತೆಗೆ ಕಾಮಗಾರಿಗೆ 10 ಲಕ್ಷ ರೂ. ಅನುದಾನವನ್ನು ಶಾಸಕರು ಮೀಸಲಿರಿಸಿದ್ದರು. ಆದರೆ ಇಲಾಖೆಯ ಮಂದಗತಿಯ ಪ್ರಕ್ರಿಯೆಯಿಂದಾಗಿ ಈ ವರೆಗೆ ಕಾಮಗಾರಿ ಶುರುವಾಗಿಲ್ಲ.

ಜನರ ಸಂಕಷ್ಟ

ಈ ಭಾಗದ 40ಕ್ಕೂ ಹೆಚ್ಚು ಕುಟುಂಬಗಳು ಹೊಸಾಡು, ಕಾಡಿನಹೊಳೆ, ಮುತ್ತಣ್ಕಿ, ಕೇಂಜಿ, ಕೂಡಾಲು ಭಾಗದ ಜನರು ಕಾಲ್ತೋಡಿಗೆ ತೆರಳ ಬೇಕಾದರೆ ಹೊಳೆ ದಾಟಿಯೇ ಹೋಗಬೇಕಾಗಿದೆ.

ನಾಲ್ಕು ವರ್ಷಗಳ ಹಿಂದೆ ಇದ್ದ ಕಾಲು ಸಂಕ ನೀರುಪಾಲಾಗಿದ್ದು, ತಾತ್ಕಾಲಿಕವಾಗಿ ಸ್ಥಳೀಯರೇ ಕಾಲು ಸಂಕ ನಿರ್ಮಿಸಿಕೊಂಡಿದ್ದಾರೆ.

ಹೊಸಾಡು -ಬೋಳಂಬಳ್ಳಿ ನಡುವೆ ಹರಿಯುವ ಸುಮನಾವತಿಯ ಉಪನದಿ ಮಳೆಗಾಲದಲ್ಲಿ ತುಂಬಿ ಹರಿಯುವುದರಿಂದ ಜನ ಸಂಚಾರಕ್ಕೆ ಸಮಸ್ಯೆಯಾಗುತ್ತದೆ.

ದೊಡ್ಡ ಮಳೆ ಬಂದರೆ ಮಕ್ಕಳು ಶಾಲೆಗೆ ತೆರಳುವಂತಿಲ್ಲ. ಪ್ರತಿದಿನ ಪಾಲಕರಿಗೆ ಮಕ್ಕಳನ್ನು ಹೊಳೆ ದಾಟಿಸಿ ಬರುವುದೇ ದೊಡ್ಡ ಕೆಲಸವಾಗಿದೆ.