Kapu ಹಾಡಹಗಲೇ ಮನೆಗೆ ನುಗ್ಗಿ ಚಿನ್ನಾಭರಣ ಕಳವು

Team Udayavani, Aug 18, 2023, 9:55 PM IST

ಕಾಪು: ಉದ್ಯಾವರ ಬೊಳ್ಜೆ ನಿವಾಸಿ ಅನಿತಾ ಡಿ’ಸಿಲ್ವಾ ಅವರ ಮನೆಗೆ ನುಗ್ಗಿದ ಕಳ್ಳರು ಸುಮಾರು 5.50 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಾಭರಣಗಳನ್ನು ಕಳವುಗೈದ ಘಟನೆ ಗುರುವಾರ ಮಧ್ಯಾಹ್ನ ನಡೆದಿದ್ದು, ಸಂಜೆ ವೇಳೆಗೆ ಬೆಳಕಿಗೆ ಬಂದಿದೆ.

ಅನಿತಾ ಡಿ’ಸಿಲ್ವ ಅವರು ಆ. 17ರಂದು ಬೆಳಗ್ಗೆ ಕೆಲಸಕ್ಕೆ ಹೋಗಿದ್ದು, ಅವರ ಮಗ ಶಾಲೆಗೆ ಹೋಗಿದ್ದ. ಮಗಳು ಸ್ವೀಡಲ್‌ ಮನೆಯಲ್ಲಿಯೇ ಇದ್ದು, ಮಧ್ಯಾಹ್ನ 1 ಗಂಟೆಗೆ ಮನೆಗೆ ಬಾಗಿಲು ಹಾಕಿ ಕಂಪ್ಯೂಟರ್‌ ಕ್ಲಾಸ್‌ಗೆಂದು ಉಡುಪಿಗೆ ಹೋಗಿದ್ದಳು. ಸಂಜೆ 5 ಗಂಟೆಗೆ ಮನೆಗೆ ಮರಳಿದ ವೇಳೆ ಮನೆಯ ಬೆಡ್‌ ರೂಂನಲ್ಲಿದ್ದ ಕಪಾಟಿನ ಬಾಗಿಲು ಮುರಿದು ಬಟ್ಟೆಗಳು ಚೆಲ್ಲಾಪಿಲ್ಲಿಯಾಗಿದ್ದವು. ಬಳಿಕ ಈ ವಿಚಾರವನ್ನು ತಾಯಿಗೆ ತಿಳಿಸಿದ್ದು, ಅವರು ಮನೆಗೆ ಬಂದು ನೋಡುವಾಗ ಕಪಾಟಿನ ಲಾಕರ್‌ ಅನ್ನು ಮುರಿದು ಚಿನ್ನಾಭರಣ ಇಟ್ಟಿದ್ದ ಪೆಟ್ಟಿಗೆಯನ್ನೇ ಕಳ್ಳರು ಕದ್ದೊಯ್ದಿರುವ ವಿಚಾರ ಬೆಳಕಿಗೆ ಬಂದಿದೆ.

ಕದ್ದ ಪೆಟ್ಟಿಗೆಯಲ್ಲಿ ಐದು ಪವನ್‌ ತೂಕದ ಚಿನ್ನದ ಮಾಂಗಲ್ಯ ಸರ, ನಾಲ್ಕು ಪವನ್‌ ತೂಕದ ಚಿನ್ನದ ಬಳೆಗಳು -3, ಐದು ಪವನ್‌ ತೂಕದ 5 ಚಿನ್ನದ ಸರಗಳು, ಎರಡು ಪವನ್‌ ತೂಕದ 9 ಚಿನ್ನದ ಉಂಗುರಗಳು, 2 ಪವನ್‌ ತೂಕದ 4 ಜತೆ ಚಿನ್ನದ ಬೆಂಡೋಲೆ ಹಾಗೂ ಅವುಗಳ ಜತೆಯಲ್ಲಿದ್ದ ಬೆಳ್ಳಿಯ ಆಭರಣಗಳಾದ ಸೊಂಟದ ನೇವಳ, ಬೆಳ್ಳಿಯ ಸರ, ಬೆಳ್ಳಿಯ ಗೆಜ್ಜೆಗಳಿದ್ದು ಮೌಲ್ಯ 5. 50 ಲಕ್ಷ ರೂಪಾಯಿ ಆಗಿರುತ್ತದೆ ಎಂದು ಮನೆಯೊಡತಿ ಅನಿತಾ ಡಿ’ಸಿಲ್ವಾ ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.

ಗುರುವಾರ ಮಧ್ಯಾಹ್ನ 1 ಗಂಟೆಯಿಂದ 5 ಗಂಟೆಯ ನಡುವೆ ಕಳ್ಳತನ ನಡೆದಿದ್ದು, ಘಟನ ಸ್ಥಳಕ್ಕೆ ಶ್ವಾನದಳ, ಬೆರಳಚ್ಚು ತಜ್ಞರು ಮತ್ತು ಹಿರಿಯ ಪೊಲೀಸ್‌ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಕಾಪು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.