ಕೊಕ್ಕರ್ಣೆ: ಬೆಂಕಿ ಆಕಸ್ಮಿಕಕ್ಕೆ ಮನೆ ನಾಶ

Team Udayavani, Dec 17, 2017, 11:16 AM IST

ಬ್ರಹ್ಮಾವರ: ಕೊಕ್ಕರ್ಣೆ ಕೆಳಪೇಟೆಯ ಶೋಭಾ ಉಮೇಶ್‌ ನಾಯಕ್‌ ಅವರ ಮನೆಗೆ ಶುಕ್ರವಾರ ರಾತ್ರಿ ಆಕಸ್ಮಿಕವಾಗಿ ಬೆಂಕಿ ತಗುಲಿ ನಾಶವಾಗಿದೆ. ಪ್ರಾರಂಭದಲ್ಲಿ ದೇವರ ಕೋಣೆಯಲ್ಲಿ ಬೆಂಕಿ ಹತ್ತಿಕೊಂಡು ನಂತರ ಬೇರೆಡೆಗೆ ವ್ಯಾಪಿಸಿತು. ಗೈಂಡರ್‌, ಗ್ಯಾಸ್‌ ಗೀಜರ್‌, ಫ್ರಿಜ್‌, ಗೋದ್ರೆಜ್‌, ಮಂಚ, ಬೆಳ್ಳಿ ವಸ್ತುಗಳು, ಬೆಲೆ ಬಾಳುವ ಸೀರೆಗಳು ಬೆಂಕಿಗೆ ಆಹುತಿಯಾಗಿವೆ.

ಘಟನೆ ಸಂದರ್ಭ ಶೋಭಾ ನಾಯಕ್‌ ಒಬ್ಬರೇ ಮನೆಯಲ್ಲಿದ್ದು, ಅಡುಗೆ ಕೋಣೆಯಲ್ಲಿ ಊಟ ಮಾಡುತ್ತಿದ್ದರು. ಅವರು ಅಪಾಯದಿಂದ ಪಾರಾಗಿದ್ದಾರೆ.ಅಗ್ನಿಶಾಮಕ ದಳ ಹಾಗೂ ಸ್ಥಳೀಯರು ಬೆಂಕಿ ಯನ್ನು ನಂದಿಸಿದರು.  ಘಟನೆಯಿಂದ 4 ಲಕ್ಷ ರೂ. ನಷ್ಟ ಅಂದಾಜಿಸಲಾಗಿದೆ.

ಸಚಿವ ಪ್ರಮೋದ್‌ ಮಧ್ವರಾಜ್‌ ಭೇಟಿ ನೀಡಿ ಪರಿಹಾರದ ಭರವಸೆ ನೀಡಿದರು. ಜಿ.ಪಂ. ಸದಸ್ಯರಾದ ಪ್ರತಾಪ್‌ ಹೆಗ್ಡೆ, ಸುಧಾಕರ ಶೆಟ್ಟಿ, ತಾ.ಪಂ. ಸದಸ್ಯರಾದ ಡಾ| ಸುನೀತಾ ಡಿ. ಶೆಟ್ಟಿ, ಭುಜಂಗ ಶೆಟ್ಟಿ, ಪಂಚಾಯತ್‌ ಜನಪ್ರತಿನಿಧಿಗಳು ಭೇಟಿ ನೀಡಿದರು.