ಕುರ್ಕಾಲು : ಕಾಪು ವಿ.ಸಭಾ ಕ್ಷೇತ್ರದ ಪಿಂಕ್‌ ಮತಗಟ್ಟೆ ಇಲ್ಲಿದೆ

Team Udayavani, May 8, 2018, 7:15 AM IST

ಕಟಪಾಡಿ: ಕಾಪು ವಿಧಾನ ಸಭಾ ಕ್ಷೇತ್ರದ ಏಕೈಕ ಮಹಿಳಾ ಅಧಿಕಾರಿಗಳನ್ನೊಳಗೊಳ್ಳಲಿರುವ ಪಿಂಕ್‌ ಮತಗಟ್ಟೆ ಕುರ್ಕಾಲು ಗ್ರಾಮ ಪಂಚಾಯತ್‌ ಕಚೇರಿಯ ಕಟ್ಟಡದಲ್ಲಿದೆ.

ಭಾಗ ಸಂಖ್ಯೆ 94 ರಲ್ಲಿ 4 ಮತ್ತು 5ನೇ ವಾರ್ಡು ಮತದಾರರಿಗೆ ನೂತನವಾಗಿ ಮಹಿಳಾ ಅಧಿಕಾರಿಗಳೇ ನಿಭಾಯಿಸುವ ಮತಗಟ್ಟೆಯಲ್ಲಿ ಮತದಾನದ ಈ ಅವಕಾಶ ಸಿಗುತ್ತಿದೆ. ಈ ಮತ ಗಟ್ಟೆಯಲ್ಲಿ 648 ಮಹಿಳಾ ಮತದಾರರು ಮತ್ತು 554 ಪುರುಷ ಮತದಾರರ ಸಹಿತ 1202 ಮತದಾರರು ಮತದಾನ ಮಾಡಲು ವಿಶೇಷವಾಗಿ ಪಿಂಕ್‌ ಬೂತ್‌ ಸಿದ್ಧಗೊಳ್ಳಲಿದೆ.ಮತದಾನ ಪ್ರಕ್ರಿಯೆಯಲ್ಲಿ ಮತದಾರರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳಲು ಪ್ರತಿ ವಿ.ಸ. ಕ್ಷೇತ್ರದಲ್ಲಿ ಪಿಂಕ್‌ ಬೂತ್‌ಪ್ರಯೋಗ ಪ್ರಥಮ ಬಾರಿಗೆ ಕಾಣಲಿದ್ದೇವೆ.

ಪಿಂಕ್‌ ಬಣ್ಣ ಬಳಿದ ಮತಗಟ್ಟೆ, ಪರಿಕರ ಸೇರಿದಂತೆ, ಪಿಂಕ್‌ ಶೇಡ್‌ ಇರುವ ವಸ್ತ್ರವನ್ನು ಧರಿಸಿದ ಮಹಿಳಾ ಅಧಿಕಾರಿಗಳು, ಮಹಿಳಾ ಪೊಲೀಸರು ಮತಗಟ್ಟೆಯ ನಿರ್ವಹಣೆ ಮಾಡುತ್ತಾರೆ. ಆದರೊಂದಿಗೆ ಪಿಂಕ್‌ ಅಲಂಕಾರದ ಮೂಲಕ ಮತಗಟ್ಟೆಯನ್ನು ಆಕರ್ಷಣೀಯವಾಗಿ ಸಿದ್ದ ಗೊಳಿಸಲಾಗುತ್ತಿದೆ.

ಬೇಬಿಕೇರ್‌ ಸೌಲಭ್ಯ
ಮಹಿಳೆಯರೂ ಹೆಚ್ಚು ಮತದಾನದಲ್ಲಿ ಪಾಲ್ಗೊಳ್ಳಬೇಕು. ಲಿಂಗ ತಾರತಮ್ಯವನ್ನು ಹೋಗಲಾಡಿಸುವಲ್ಲಿ ಈ ಪಿಂಕ್‌ ಮತಗಟ್ಟೆ ನೂತನ ಪ್ರಯೋಗವಾಗಿದೆ. ಇದು ಪ್ರಯೋಗ ಯಶಸ್ವಿಯಾಗಲಿದೆ. ಇಲ್ಲಿ ಮತದಾನಕ್ಕೆ ಮಕ್ಕಳೊಂದಿಗೆ ಆಗಮಿಸುವ  ಮತದಾರರ ಮಕ್ಕಳನ್ನು ನೋಡಿಕೊಳ್ಳುವ ಬೇಬಿ ಕೇರ್‌ ಸವಲತ್ತು ಕಲ್ಪಿಸಲಾಗುತ್ತಿದೆ
 - ಕುಮುದಾ ಚುನಾವಣಾ ಅಧಿಕಾರಿ