ಲೈಟ್‌ ಫಿಶಿಂಗ್‌ ಆರೋಪ: ಗಂಗೊಳ್ಳಿಯಲ್ಲಿ  2 ಬೋಟು ವಶ; ಎಚ್ಚರಿಕೆ

Team Udayavani, Feb 3, 2019, 12:30 AM IST

ಗಂಗೊಳ್ಳಿ: ಕರಾವಳಿಯಲ್ಲಿ ಬೆಳಕು ಮೀನುಗಾರಿಕೆ (ಲೈಟ್‌ ಫಿಶಿಂಗ್‌)ಮಾಡುತ್ತಿದ್ದಾರೆ ಎನ್ನುವ ನಾಡದೋಣಿ ಮೀನುಗಾರರ ಆರೋಪದ ಮಧ್ಯೆ ಮೀನುಗಾರಿಕಾ ಇಲಾಖೆಯ ಅಧಿಕಾರಿ ಗಳು ಶನಿವಾರ ಗಂಗೊಳ್ಳಿಯಲ್ಲಿ 2 ಬೋಟುಗಳನ್ನು ವಶಕ್ಕೆ ಪಡೆದು ಮೀನುಗಾರಿಕೆಗೆ ತಡೆಯೊಡ್ಡಿದ್ದಾರೆ.

ಮೀನುಗಾರಿಕಾ ಇಲಾಖೆಯ ಅಧಿಕಾರಿಗಳು ಹಾಗೂ ಕರಾವಳಿ ಕಾವಲು ಪಡೆಯ ಪೊಲೀಸರು ಜಂಟಿ ಕಾರ್ಯಾಚರಣೆ ನಡೆಸಿದಾಗ ಲೈಟ್‌ ಅಳವಡಿಸಿದ್ದ 2 ಬೋಟುಗಳು ಪತ್ತೆ ಯಾದವು. ಅವುಗಳ ಮಹಜರು ನಡೆಸಿ,ಮುಂದಿನ ಕ್ರಮಕ್ಕಾಗಿ ಇಲಾಖೆಯ ಜಿಲ್ಲಾ ಜಂಟಿ ನಿರ್ದೇಶಕರಿಗೆ ವರ್ಗಾ ಯಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಇಲಾಖೆಯ ಹಿರಿಯ ಮೇಲ್ವಿಚಾರಕ ದಿವಾಕರ್‌ ಹಾಗೂ ಸಹಾಯಕ ನಿರ್ದೇಶಕ ಚಂದ್ರಶೇಖರ್‌, ಗಂಗೊ ಳ್ಳಿಯ ಕರಾವಳಿ ಕಾವಲು ಪಡೆ ಪೊಲೀಸರು ಕಾರ್ಯಾಚರಣೆಯಲ್ಲಿ ಭಾಗ ವಹಿಸಿದ್ದರು.

ಸಂಧಾನ ಸಭೆ
ಈ ಬಗ್ಗೆ ಶನಿವಾರ ಗಂಗೊಳ್ಳಿ ಬಂದ ರಿನ ಇಲಾಖಾಧಿಕಾರಿಗಳ ಕಚೇರಿಯಲ್ಲಿ ನಾಡದೋಣಿ ಮೀನುಗಾರರು ಹಾಗೂ ಪರ್ಸಿನ್‌ ಮೀನುಗಾರರ ಜಂಟಿ ಸಭೆ ನಡೆಸಿದ್ದು, ಅಲ್ಲಿ ಎರಡೂ ಕಡೆಯವ ರಿಗೂ ಸಮನ್ವಯದಿಂದ ಇರುವಂತೆ ತಿಳಿಸಲಾಗಿದೆ ಎಂದು ಮೀನುಗಾರಿಕಾ ಅಧಿಕಾರಿಗಳು ತಿಳಿಸಿದ್ದಾರೆ. 

ಆ ಬೋಟುಗಳಲ್ಲಿ ಮೀನುಗಾರಿಕೆ ಮಾಡುತ್ತಿರಲಿಲ್ಲ. ಅದರ ಲೈಟ್‌ಗಳನ್ನು ತೆಗೆದಿರಲಿಲ್ಲ ಅಷ್ಟೇ. ಆ ಲೈಟ್‌ಗಳನ್ನು ಶೀಘ್ರ ತೆಗೆಯಲಾಗುವುದು. ಈ ಬಗ್ಗೆ ಅಧಿಕಾರಿಗಳಿಗೆ ಮನವರಿಕೆ ಮಾಡಿದ್ದೇವೆ.
– ರಮೇಶ್‌ ಕುಂದರ್‌,ಅಧ್ಯಕ್ಷ,ಗಂಗೊಳ್ಳಿ ಪರ್ಸಿನ್‌ ಮೀನುಗಾರರ ಸಂಘ

ವಶಕ್ಕೆ ಪಡೆದ ಬೋಟುಗಳ ಮಾಲಕರಿಗೆ ಮೀನುಗಾರಿಕೆ ಮಾಡದಂತೆ ಎಚ್ಚರಿಕೆ ನೀಡಿದ್ದು, ಒಪ್ಪಿಕೊಂಡಿದ್ದಾರೆ. ಲೈಟ್‌ ಫಿಶಿಂಗ್‌ ವಿಚಾರ ಕೋರ್ಟ್‌ ನಲ್ಲಿರುವುದರಿಂದ ಈಗ ಆ ಮೀನುಗಾರಿಕೆ ಸರಿಯಲ್ಲ ಎಂದು ಮನವರಿಕೆ ಮಾಡಿದ್ದೇವೆ.
 - ಚಂದ್ರಶೇಖರ್‌,  ಸಹಾಯಕ ನಿರ್ದೇಶಕ, ಮೀನುಗಾರಿಕಾ ಇಲಾಖೆ ಕುಂದಾಪುರ