ಲೋಕ ಅದಾಲತ್‌ 437 ಪ್ರಕರಣ ವಿಲೇ, 1.77 ಕೋ. ರೂ. ಪರಿಹಾರ

Team Udayavani, Mar 14, 2017, 11:46 AM IST

ಉಡುಪಿ: ರಾಜಾದ್ಯಂತ ಪ್ರತಿ ತಿಂಗಳ 2ನೇ ಶನಿವಾರ ಪ್ರತಿ ನ್ಯಾಯಾಲಯಗಳಲ್ಲೂ ಲೋಕ ಅದಾಲತ್‌ ನಡೆಸಿ ನಾನಾ ರೀತಿಯ ಪ್ರಕರಣಗಳನ್ನು ರಾಜಿ ಸಂಧಾನದ ಮೂಲಕ ಇತ್ಯರ್ಥಗೊಳಿಸಲಾಗುತ್ತಿದೆ. ಉಡುಪಿ ಜಿಲ್ಲೆಯ ವಿವಿಧ ನ್ಯಾಯಾಲಯಗಳಲ್ಲಿ ವಿಲೇವಾರಿಗೆ ಬಾಕಿ ಇರುವ ಮುಖ್ಯವಾಗಿ ಮೋಟಾರು ವಾಹನ ಅಪಘಾತ ಹಕ್ಕೊತ್ತಾಯ ಹಾಗೂ ಇತರ ಪ್ರಕರಣಗಳಲ್ಲಿ ಒಟ್ಟು 547 ಪ್ರಕರಣಗಳನ್ನು ರಾಜಿ ಸಂಧಾನಕ್ಕೆ ಪಡೆದು 437 ಪ್ರಕರಣಗಳನ್ನು ವಿಲೇವಾರಿ ಮಾಡಲಾಯಿತು. ಇದಕ್ಕೆ 1.77 ಕೋ.ರೂ. ಪರಿಹಾರ ನೀಡಲು ಆದೇಶಿಸಲಾಯಿತು.

6 ಪ್ರಕರಣಗಳಲ್ಲಿ ಸ್ಥಳದಲ್ಲೇ ಪಲಾನುಭವಿಗಳಿಗೆ ಪರಿಹಾರದ ಹಣವನ್ನು ಚೆಕ್‌ ಮೂಲಕ ಪ್ರಧಾನ ಹಿರಿಯ ಸಿವಿಲ್‌ ನ್ಯಾಯಾಧೀಶ ಮತ್ತು ಮುಖ್ಯ ನ್ಯಾಯಿಕ ದಂಡಾಧಿಕಾರಿ ಶಿವರಾಂ ಕೆ. ವಿತರಿಸಿದರು. ಸ್ಥಳೀಯ ನ್ಯಾಯಾಧೀಶರು, ನ್ಯಾಯವಾದಿ, ವಿಮಾ ಕಂಪೆನಿ ಅಧಿಕಾರಿಗಳು ಹಾಗೂ ಕ‌ಕ್ಷಿದಾರರು ಪಾಲ್ಗೊಂಡಿದ್ದರು. 

ಸಾರ್ವಜನಿಕರು ಇನ್ನೂ ಹೆಚ್ಚಿನ ಪ್ರಕರಣಗಳನ್ನು ಲೋಕ ಅದಾಲತ್‌ಗಳಲ್ಲಿ ವಿಲೇವಾರಿ ಮಾಡಿಕೊಳ್ಳಲು ಮನವಿ ಮಾಡಲಾಗಿದೆ.