ಕ್ಯೂಎಸ್‌ ರ್‍ಯಾಂಕಿಂಗ್‌: ಮಾಹೆಗೆ 26ನೇ ಸ್ಥಾನ

Team Udayavani, Oct 25, 2019, 12:33 AM IST

ಡಾ| ವಿನೋದ ಭಟ್‌ ಅವರು ರ್‍ಯಾಂಕಿಂಗ್‌ ಮಾನಪತ್ರವನ್ನು ಕೇಂದ್ರ ಸಚಿವ ಡಾ| ರಮೇಶ್‌ ಪೋಖ್ರಿಯಾಲ್‌ ಅವರಿಂದ ಸ್ವೀಕರಿಸಿದರು.

ಉಡುಪಿ: ಮಣಿಪಾಲ ಮಾಹೆ ವಿಶ್ವವಿದ್ಯಾನಿಲಯವು ಕ್ಯೂಎಸ್‌ (ಕ್ವಾಕರೆಲಿ ಸೈಮಂಡ್ಸ್‌) ಇಂಡಿಯಾ ಯುನಿವರ್ಸಿಟಿ ರ್‍ಯಾಂಕಿಂಗ್ಸ್‌ 2020ರಲ್ಲಿ ಖಾಸಗಿ ವಿ.ವಿ.ಗಳ ವಿಭಾಗದಲ್ಲಿ ಮೂರನೆಯ ರ್‍ಯಾಂಕ್‌ ಮತ್ತು ಒಟ್ಟಾರೆ 26ನೆಯ ಸ್ಥಾನವನ್ನು ಪಡೆದುಕೊಂಡಿದೆ. ಇದರಿಂದ ಮಾಹೆ ಕಳೆದ ವರ್ಷದ ಸ್ಥಾನವನ್ನು ಉಳಿಸಿಕೊಂಡಿದೆ.

ಮಾಹೆ ವಿ.ವಿ. ಕುಲಪತಿ ಡಾ| ಎಚ್‌. ವಿನೋದ ಭಟ್‌ ಅವರು, ಕೇಂದ್ರ ಮಾನವ ಸಂಪದಭಿವೃದ್ಧಿ ಸಚಿವ ಡಾ| ರಮೇಶ್‌ ಪೋಖ್ರಿಯಾಲ್‌ ನಿಶಾಂಕ್‌ ಅವರಿಂದ ರ್‍ಯಾಂಕಿಂಗ್‌ ಪ್ರಮಾಣಪತ್ರವನ್ನು ಗೋವಾದಲ್ಲಿ ನಡೆದ ಕ್ಯೂಎಸ್‌ ಇಂಡಿಯಾ ಸಮಾವೇಶದಲ್ಲಿ ಸ್ವೀಕರಿಸಿದರು. ನಿರ್ದೇಶಕ (ಗುಣಮಟ್ಟ) ಡಾ| ಕ್ರಿಸ್ಟೋಫ‌ರ್‌ ಸುಧಾಕರ್‌ ಉಪಸ್ಥಿತರಿದ್ದರು.

ಶೈಕ್ಷಣಿಕ ಮಟ್ಟ, ಮಾಲಕರ ವರ್ಚಸ್ಸು, ಬೋಧಕರು- ವಿದ್ಯಾರ್ಥಿಗಳ ಅನುಪಾತ, ಸಾಧನೆಗಳ ಮಾನದಂಡದಲ್ಲಿ ರ್‍ಯಾಂಕಿಂಗ್‌ ನೀಡಲಾಗಿದೆ. ಸಂಸ್ಥೆಯ ಹಿರಿತನ, ವಿಶಾಲ ಸ್ತರದ ಕೋರ್ಸುಗಳು, ಖಾಸಗಿಯಾದರೂ ಲಾಭ ಉದ್ದೇಶವಿಲ್ಲದ ಸ್ಥಾನಮಾನ, ಉನ್ನತ ದರ್ಜೆಯ ಸಂಶೋಧನೆ, ಸಮಗ್ರ ವಿಷಯವಾರು ಕ್ಷೇತ್ರಗಳು, ಅಂತಾರಾಷ್ಟ್ರೀಯ ವಿದ್ಯಾರ್ಥಿಗಳು, ಬೋಧಕರು- ವಿದ್ಯಾರ್ಥಿಗಳ ಸೂಚಕದಲ್ಲಿಯೂ ಪ್ರತ್ಯೇಕ ವಿಶಿಷ್ಟ ಸ್ಥಾನವನ್ನು ಮಾಹೆ ಪಡೆದುಕೊಂಡಿದೆ. ಈ ವರ್ಷ 100 ವಿ.ವಿ.ಗಳನ್ನು ರ್‍ಯಾಂಕಿಂಗ್‌ಗೆ ಪರಿಗಣಿಸಲಾಗಿತ್ತು.