Manipal: ಮಾಹೆ; ಸಿಜಿಎಂಪಿ ಕೇಂದ್ರಕ್ಕೆ ಭಾರತ ಫಾರ್ಮಾ ಪ್ರಶಸ್ತಿ

Team Udayavani, Nov 27, 2024, 11:11 PM IST

ಮಣಿಪಾಲ: ಮಾಹೆ ವಿ.ವಿ.ಯ ಸಿಜಿಎಂಪಿ ಕೇಂದ್ರಕ್ಕೆ ಸತತ ಎರಡನೇ ಬಾರಿಗೆ ಔಷಧೀಯ ಗುಣಮಟ್ಟಕ್ಕೆ ನೀಡಿದ ಗಣನೀಯ ಕೊಡುಗೆಯನ್ನು ಗುರುತಿಸಿ ಪ್ರತಿಷ್ಠಿತ ಇಂಡಿಯಾ ಫಾರ್ಮಾ ಅವಾರ್ಡ್ಸ್‌ 2024 ಅನ್ನು ನೀಡಲಾಗಿದೆ.

ಈ ಕೇಂದ್ರವು ತನ್ನ ಪ್ರವರ್ತಕ ಉಪಕ್ರಮವಾದ ಮಣಿಪಾಲ್‌ ಸಿಜಿಎಂಪಿ ವಸ್ತುಸಂಗ್ರಹಾಲಯಕ್ಕಾಗಿ ಗುಣಮಟ್ಟದಲ್ಲಿ ಉತ್ಕೃಷ್ಟತೆ ವಿಭಾಗದಲ್ಲಿ ವಿಶೇಷ ಮನ್ನಣೆ ಪ್ರಶಸ್ತಿಯನ್ನು ಪಡೆದುಕೊಂಡಿದೆ.

ಇಂಡಿಯಾ ಫಾರ್ಮಾ ಅವಾರ್ಡ್ಸ್‌
2024 ಸಮಾರಂಭ ಸಿಪಿಎಚ್‌ಐ- ಪಿಎಂಇಸಿ ಇಂಡಿ ಯಾದ ಗ್ರೇಟರ್‌ ನೋಯ್ಡಾದ ಇಂಡಿಯಾ ಎಕ್ಸ್‌ಪೋ ಸೆಂಟರ್‌ನಲ್ಲಿ ನಡೆಯಿತು. ಇದರಲ್ಲಿ 2 ಸಾವಿರಕ್ಕೂ ಹೆಚ್ಚು ಪ್ರದರ್ಶಕರು ಮತ್ತು 50 ಸಾವಿರ ಪ್ರತಿನಿಧಿಗಳು ಭಾಗವಹಿಸಿದ್ದರು.

ಕೇಂದ್ರ ಸಂಯೋಜಕ ಡಾ| ಗಿರೀಶ್‌ ಪೈ ಕೆ., ಸಹ-ಸಂಯೋಜಕ ಡಾ| ಮುದುಕೃಷ್ಣ ಬಿ.ಎಸ್‌. ಮಣಿಪಾಲವನ್ನು ಪ್ರತಿನಿಧಿಸಿದರು. 3 ನಿಮಿಷಗಳ ಆಕರ್ಷಕ ಪ್ರಸ್ತುತಿಯನ್ನು ನೀಡಿದರು.

ಇದು ಗುಣಮಟ್ಟ ನಿಯಂತ್ರಣ ವ್ಯವಸ್ಥೆಗಳು, ನಿಯಂತ್ರಕ ಅನುಸರಣೆ, ಆಂತರಿಕ ತರಬೇತಿ ಮತ್ತು ವೆಚ್ಚ ದಕ್ಷತೆಯಂತಹ ಪ್ರಮುಖ ನಿಯತಾಂಕಗಳನ್ನು ಎತ್ತಿ ತೋರಿಸಿತ್ತು. ತೀರ್ಪುಗಾರರ ಸದಸ್ಯರು ಈ ಉಪಕ್ರಮವನ್ನು ಅದರ ನಾವೀನ್ಯ ಮತ್ತು ದೀರ್ಘ‌ಕಾಲೀನ ಸಾಮಾಜಿಕ ಪ್ರಭಾವಕ್ಕಾಗಿ ಶ್ಲಾಘಿಸಿದರು. ಇದು ಔಷಧೀಯ ವಲಯಕ್ಕೆ ಗಮನಾರ್ಹ ಕೊಡುಗೆಯಾಗಿದೆ ಎಂದು ಗುರುತಿಸಿದರು.

ಡಾ| ಗಿರೀಶ್‌ ಪೈ ಕೆ. ಮತ್ತು ಡಾ| ಮುದುಕೃಷ್ಣ ಬಿ.ಎಸ್‌. ಅವರು ಬ್ಲೂ ಕ್ರಾಸ್‌ ಲ್ಯಾಬೋರೇಟರೀಸ್‌ ಲಿ. ಜಂಟಿ ವ್ಯವಸ್ಥಾಪಕ ನಿರ್ದೇಶಕ ಬಾಲಚಂದ್ರ ಬಾರ್ವೆ ಅವರಿಂದ ಉದ್ಯಮ ಕ್ಷೇತ್ರದ ಪ್ರಮುಖರು, ಔಷಧೀಯ ಉದ್ಯಮಿಗಳು ಮತ್ತು ಜಾಗತಿಕ ಫಾರ್ಮಾ ಕಂಪೆನಿಗಳ ಕಾರ್ಯನಿರ್ವಾಹಕರ ಸಮ್ಮುಖದಲ್ಲಿ ಪ್ರಶಸ್ತಿಯನ್ನು ಸ್ವೀಕರಿಸಿದರು.