ಆತ್ರಾಡಿ ಮುಹಿಯುದ್ದೀನ್‌ ಜುಮ್ಮಾ ಮಸೀದಿ ಉದ್ಘಾಟನೆ

Team Udayavani, Mar 14, 2017, 12:44 PM IST

ಉಡುಪಿ: ನವೀಕೃತ ಆತ್ರಾಡಿಯ ಮುಹಿಯುದ್ದೀನ್‌ ಜುಮ್ಮಾ ಮಸೀದಿಯ ಉದ್ಘಾಟನೆ ನಡೆಯಿತು. ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದ ಶಾಸಕ ವಿನಯ್‌ ಕುಮಾರ್‌ ಸೊರಕೆ ಬೇರೆಯವರಿಂದ ಯಾವುದೇ ದೇಣಿಗೆ ಪಡೆಯದೇ ಇಂತಹ ಬೃಹತ್‌, ಸುಂದರವಾದ ಮಸೀದಿ ನಿರ್ಮಾಣ ಮಾಡಿರುವುದು ಸಂತಸದ ವಿಚಾರ. ಆತ್ರಾಡಿಯಲ್ಲಿ ಶೀಘ್ರ ಸಮುದಾಯ ಭವನ ನಿರ್ಮಾಣಕ್ಕೆ ಚಾಲನೆ ನೀಡಲಾಗುವುದು ಎಂದರು. 

ಖ್ಯಾತ ವಾಗ್ಮಿ ಅಬ್ದುಲ್‌ ರಶೀದ್‌ ಝೈನಿ ಮಾತನಾಡಿ ಯಾವುದೇ ಧರ್ಮ ಕೂಡ ಸಂಘರ್ಷವನ್ನು ಕಲಿಸುವುದಿಲ್ಲ. ಎಲ್ಲ ಧರ್ಮದ ಜನರೂ ಪ್ರಾರ್ಥನಾ ಕ್ರಮಗಳನ್ನು ಅನುಸರಿಸುತ್ತಾರೆ. ಕೆಲವೆಡೆ ಜನರ ತಿಳಿವಳಿಕೆಯ ಕೊರತೆಯಿಂದ ಅನಾಹುತಗಳು ಸಂಭವಿಸುತ್ತವೆ ಎಂದರು. ಈ ಸಂದರ್ಭ ಮಸೀದಿಯ ಅಧ್ಯಕ್ಷ, ನವೀಕೃತ ಮಸೀದಿ ನಿರ್ಮಾಣದ ಉಸ್ತುವಾರಿ ವಹಿಸಿದ್ದ  ಹಾಜಿ ಕೆ. ಅಬೂಬಕ್ಕರ್‌ ಅವರಿಗೆ 90 ನೇ ನ್ಯಾಯರತ್ನ  ಪ್ರಶಸ್ತಿ ನೀಡಿ ಗೌರವಿಸಲಾಯಿತು. 

ಎ. ಪಿ. ಅಬೂಬಕ್ಕರ್‌ ಮುಸ್ಲಿಯಾರ್‌, ಆತ್ರಾಡಿ ಖಾಝಿ ಅಬೂಬಕ್ಕರ್‌ ಮುಸ್ಲಿಯಾರ್‌, ಖತೀಬ್‌ ಉಮರ್‌ ಮದಾನಿ, ಮಂಜುನಾಥ ಉಪಾಧ್ಯ, ಹರೀಶ್‌ ಹೆಗ್ಡೆ, ಜನಾಬ್‌ ಯಾಸೀನ್‌ ಮಲ್ಪೆ, ಹಮೀದ್‌ ಪರ್ಕಳ, ಹಾಜಿ ಕೆ. ಅಬ್ದುಲ್ಲಾ ಪರ್ಕಳ, ಜನಾಬ್‌ ಅಬ್ದುಲ್‌ ಖಾದರ್‌ ಆತ್ರಾಡಿ, ಜನಾಬ್‌ ಇಬ್ರಾಹಿಂ ಮತ್ತಿತರರು ಉಪಸ್ಥಿತರಿದ್ದರು. ಆತ್ರಾಡಿ ಇಸ್ಮಾಯಿಲ್‌ ಸ್ವಾಗತಿಸಿದರು. ನೌಫಾಲ್‌ ಕಾರ್ಯಕ್ರಮ ನಿರ್ವಹಿಸಿದರು.