ಸಾಮೂಹಿಕ ಪ್ರಾರ್ಥನೆ, ಜಗತ್ಕಲ್ಯಾಣ ಪೂಜೆ ವೈಜ್ಞಾನಿಕ

Team Udayavani, Jul 19, 2017, 3:05 AM IST

ಉಡುಪಿ: ಸಾಮೂಹಿಕ ಪ್ರಾರ್ಥನೆ ಜಗತ್ತಿನ ಎಲ್ಲ ಭಾಗಗಳಲ್ಲಿಯೂ ನಡೆಯಬೇಕೆಂದಿಲ್ಲ. ಯಾವ ಮೂಲೆಯಲ್ಲಿ ನಡೆದರೂ ಅದರಿಂದ ಫಲ ದೊರೆಯುತ್ತದೆ ಎಂಬುದನ್ನು ವಿಜ್ಞಾನಿಗಳೂ ಒಪ್ಪುತ್ತಾರೆ. ಸಾಮೂಹಿಕ ಪ್ರಾರ್ಥನೆ ಮತ್ತು ಜಗದ ಕಲ್ಯಾಣಕ್ಕಾಗಿ ಸಲ್ಲಿಸುವ ಪೂಜೆ ಜಗತ್ತಿಗೆ ತಲುಪುತ್ತದೆ ಎನ್ನುವುದು ವೈಜ್ಞಾನಿಕವಾಗಿ ತಿಳಿದುಬಂದಿದೆ ಎಂದು ಮೈಸೂರು ಶ್ರೀ ಸುತ್ತೂರು ಮಠದ ಶ್ರೀ ಶಿವರಾತ್ರಿ ದೇಶೀಕೇಂದ್ರ ಸ್ವಾಮೀಜಿ ಹೇಳಿದರು. 

ಶ್ರೀಕೃಷ್ಣ ಮಠಕ್ಕೆ ಮಂಗಳವಾರ ಆಗಮಿಸಿ ದೇವರ ದರ್ಶನ ಪಡೆದ ಬಳಿಕ ಪರ್ಯಾಯ ಶ್ರೀ ಪೇಜಾವರ ಮಠದ ಅಭಿನಂದನೆ ಸ್ವೀಕರಿಸಿ ಮಾತನಾಡಿದ ಅವರು ಸ್ವಧರ್ಮದಲ್ಲಿ ನಿಷ್ಠೆ ಮತ್ತು ಪರಧರ್ಮದಲ್ಲಿ  ಸಹಿಷ್ಣುತೆಯನ್ನು ಕಾಣುವುದು ಅತಿ ಅಗತ್ಯವಾಗಿದೆ ಎಂದರು. 

ಸ್ವಪ್ರತಿಷ್ಠೆಯಿಂದ ಹದಗೆಟ್ಟಿರುವ ಸಮಾಜ, ಜಗತ್ತನ್ನು ಋಷಿಮುನಿಗಳು, ಶರಣರು, ದಾಸರು, ಸಂತರ ಮಾರ್ಗ ದರ್ಶನದಲ್ಲಿ  ಸರಿಪಡಿಸಬಹುದಾಗಿದೆ. ಹಿಂದೂಗಳು ತಮ್ಮ ಸಂಕುಚಿತ ಮನೋಭಾವನೆಯನ್ನು ಬದಿಗಿಟ್ಟು  ಎಲ್ಲರ ಒಳಿತಿಗಾಗಿ ಪ್ರಯತ್ನಿಸಿದರೆ ಉತ್ತಮ ಭವಿಷ್ಯವಿದೆ ಎಂದು ಸ್ವಾಮೀಜಿ ಹೇಳಿದರು. 

ಶ್ರೀಕೃಷ್ಣ ಜಗತøಸಿದ್ಧ. ಶ್ರೀ ವಿಶ್ವೇಶತೀರ್ಥ ಶ್ರೀಪಾದರಿಂದಾಗಿ ಪೇಜಾವರ ಮಠ ಪ್ರಸಿದ್ಧವಾಗಿದೆ. ಇವರು ಮಧ್ವಾಚಾರ್ಯರ ಪ್ರತೀಕವಾಗಿ ಬೆಳಗುತ್ತಿದ್ದಾರೆ, ಸಮುದಾಯದ ಒಳಿತಿಗಾಗಿ, ಹಿಂದೂಗಳ ಒಗ್ಗಟ್ಟಿಗೆ ಧಾರ್ಮಿಕ ಚೌಕಟ್ಟಿನಲ್ಲಿದ್ದು ಶ್ರಮಿಸು ತ್ತಿದ್ದಾರೆಂದು ಸುತ್ತೂರು ಸ್ವಾಮೀಜಿ ಬಣ್ಣಿಸಿದರು. 

ಪೇಜಾವರ ಕಿರಿಯ ಶ್ರೀಗಳು ಸುತ್ತೂರು ಸ್ವಾಮೀಜಿಯವರ ಕೊಡುಗೆಗಳನ್ನು ಬಣ್ಣಿಸಿ ಶುಭ ಕೋರಿದರು. ಪ್ರೊ| ಶ್ರೀಪತಿ ತಂತ್ರಿ ಸ್ವಾಗತಿಸಿ ಗುರುಮೂರ್ತಿ ಆಚಾರ್ಯ ಕಾರ್ಯಕ್ರಮ ನಿರ್ವಹಿಸಿದರು.

ಅಭಿವೃದ್ಧಿ -ಶಾಂತಿಗೆ 3 “ಸ’ಕಾರಗಳು
ಸೌಹಾರ್ದ, ಸಹನೆ ಹಾಗೂ ಸಹಕಾರ ಈ ಮೂರು ವಿಚಾರಗಳನ್ನು ಎಲ್ಲ ಧರ್ಮಗಳು ಪಾಲಿ ಸಿದರೆ ದೇಶ ಅಭಿವೃದ್ಧಿ ಹೊಂದುವುದು ಮಾತ್ರ ವಲ್ಲದೆ ಶಾಂತಿ ನೆಲೆಸಲಿದೆ. ಮಧ್ವರು ಮತ್ತು ಬಸವೇಶ್ವರರಿಂದಾಗಿ ಕರ್ನಾಟಕ ದೇಶ ಮತ್ತು ಜಗತ್ತಿಗೆ ಮಹತ್ವದ ಕೊಡುಗೆ ನೀಡಿದೆ. ದಾಸ ಸಾಹಿತ್ಯ ಮತ್ತು  ಶರಣ ಸಾಹಿತ್ಯ ಎರಡು ಕಣ್ಣುಗಳಿದ್ದಂತೆ. ಸುತ್ತೂರು ಸ್ವಾಮೀಜಿ ಯವರು ಶೈಕ್ಷಣಿಕ ಕ್ರಾಂತಿ ಮೂಲಕ ಸಾಮಾಜಿಕ ಕೊಡುಗೆ ಗಳನ್ನು ನೀಡಿದ್ದಾರೆಂದು ಪೇಜಾವರ ಮಠದ ಶ್ರೀ ವಿಶ್ವೇಶತೀರ್ಥ ಶ್ರೀಪಾದರು ನುಡಿದರು.