ಅಭ್ಯರ್ಥಿ ಗೊಂದಲ ಇಲ್ಲ : ಮಠಂದೂರು

Team Udayavani, Feb 26, 2019, 1:00 AM IST

ಪುತ್ತೂರು: ಲೋಕಸಭಾ ಚುನಾವಣೆಯಲ್ಲಿ ದಕ್ಷಿಣ ಕನ್ನಡ ಕ್ಷೇತ್ರದ ಅಭ್ಯರ್ಥಿಯಾಗಿ ಹಾಲಿ ಸಂಸದ ನಳಿನ್‌ ಕುಮಾರ್‌ ಕಟೀಲು ಅವರೇ ಸ್ಪರ್ಧಿಸಲಿದ್ದಾರೆ, ಪಕ್ಷದಲ್ಲಿ ಈ ಬಗ್ಗೆ ಗೊಂದಲಗಳಿಲ್ಲ ಎಂದು ಬಿಜೆಪಿ ಜಿಲ್ಲಾಧ್ಯಕ್ಷ, ಶಾಸಕ ಸಂಜೀವ ಮಠಂದೂರು ಹೇಳಿದ್ದಾರೆ.

ಸೋಮವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, 5 ವರ್ಷದಲ್ಲಿ ನಳಿನ್‌ ಕುಮಾರ್‌ ಕಟೀಲು ನಡೆಸಿದ ಅಭಿವೃದ್ಧಿ ಕಾರ್ಯ, ಸಾಮಾಜಿಕ ಕಾರ್ಯದಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಹಿನ್ನೆಲೆಯಲ್ಲಿ ನಂ. 1 ಸಂಸದ ಎಂದು ಗುರುತಿಸಿಕೊಂಡಿದ್ದಾರೆ. ಇಲ್ಲಿ ಅಭ್ಯರ್ಥಿಯಗಲು ಬೇರೆ ಆಕಾಂಕ್ಷಿಗಳೂ ಇಲ್ಲ ಎಂದರು.

ನರೇಂದ್ರ ಮೋದಿ ಪ್ರಧಾನಿಯಾಗಿ, ಅಮಿತ್‌ ಶಾ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷರಾದ ಬಳಿಕ ಬಿಜೆಪಿಯ ನಿಯಮಾವಳಿಗಳು ಬದಲಾಗಿಲ್ಲ. ಹಿಂದೆ ಅನುಸರಿಸಲಾಗುತ್ತಿದ್ದ ಮಾದರಿಯಲ್ಲೇ ಈ ಬಾರಿಯೂ ಅಭ್ಯರ್ಥಿಗಳ ಆಯ್ಕೆ ನಡೆಯಲಿದೆ. ರಾಷ್ಟ್ರೀಯ ಅಧ್ಯಕ್ಷ ಹಾಗೂ ರಾಜ್ಯಾಧ್ಯಕ್ಷರು ಅಂತಿಮ ಮಾಡುವ ಅಭ್ಯರ್ಥಿಯನ್ನೇ ಜಿಲ್ಲಾಧ್ಯಕ್ಷನಾಗಿ ನಾನು ಅನುಮೋದಿಸುತ್ತೇನೆ. ಪಾರದರ್ಶಕ, ಪ್ರಜಾಸತ್ತಾತ್ಮಕ ರೀತಿಯಲ್ಲಿ ಅಭ್ಯರ್ಥಿಯ ಆಯ್ಕೆ ನಡೆಯಲಿದೆ. ರಾಜಕೀಯ ವಿರೋಧಿಗಳಿಗೆ ಬೇರೆ ಯಾವ ವಿಚಾರವೂ ಸಿಗದೇ ಹೋದಾಗ ಅಪಪ್ರಚಾರದ ಕಾರ್ಯಕ್ಕೆ ಕೈ ಹಾಕುತ್ತಾರೆ. ಇದು ಹೊಸದಲ್ಲ ಎಂದರು.

ಏಳು ಶಾಸ ಕರು, ಓರ್ವ ಸಂಸದರು, ಸ್ಥಳೀಯಾಡಳಿತದ ಪ್ರತಿನಿಧಿ ಶೀನಿವಾಸ ಪೂಜಾರಿ, ಜಿ.ಪಂ., ತಾ.ಪಂ., ಜಿಲ್ಲೆಯ 232 ಗ್ರಾ.ಪಂ.ಗಳ ಪೈಕಿ 132 ಕ್ಷೇತ್ರಗಳಲ್ಲಿ ಬಿಜೆಪಿ ಪ್ರಾಬಲ್ಯ ಹೊಂದಿದೆ ಎಂದರು.