ಕುಸಿತ ಕಂಡ ಮಲ್ಲಿಗೆ ದರ, ಮಾರ್ಕೋಡು ಮಾರುಕಟ್ಟೆ: ಅಟ್ಟೆಗೆ 100 ರೂ.

Team Udayavani, Jul 4, 2019, 5:50 AM IST

ತೆಕ್ಕಟ್ಟೆ: ಶುಭ ಸಮಾರಂಭಗಳು ಕಡಿಮೆ ಯಾಗುತ್ತಿದ್ದಂತೆ ಮಲ್ಲಿಗೆ ದರವೂ ನೆಲಕ್ಕಚ್ಚಿದೆ. ಮಾರ್ಕೋಡು ಮಾರುಕಟ್ಟೆಯಲ್ಲಿ ಮಲ್ಲಿಗೆ ಅಟ್ಟೆ ಒಂದರ ದರ 100 ರೂ. ಗೆ ಬಂದು ನಿಂತಿದೆ. ಇದು ಮಲ್ಲಿಗೆ ಕೃಷಿಕರ ಆತಂಕಕ್ಕೆ ಎಡೆ ಮಾಡಿದೆ.

ಬೇಡಿಕೆ ಇದ್ದ ದಿನಗಳಲ್ಲಿ ಮಲ್ಲಿಗೆ ದರ ಅಟ್ಟೆಗೆ 1500 ರೂ.ವರೆಗೆ ಏರಿದ್ದು, ಬೆಳೆಗಾರರಿಗೆ ಖುಷಿ ತಂದಿತ್ತು. ಆದರೆ ಈಗ ಮಲ್ಲಿಗೆ ಬೆಲೆ ಇಳಿಮುಖವಾಗಿದೆ. ಇದರಿಂದ ಮಲ್ಲಿಗೆ ಸಮೃದ್ಧವಾಗಿ ಬೆಳೆಯಲು ಹಾಕುವ ನೆಲಗಡಲೆ ಹುಡಿ, ಸಾವಯವ ಗೊಬ್ಬರ ಬೆಲೆ ದುಬಾರಿಯಾಗಿ ಕೃಷಿ ನಿರ್ವಹಣೆ ಕಷ್ಟಕರವಾಗಿದೆ ಎನ್ನುವುದು ಬೆಳೆಗಾರರ ಅಭಿಪ್ರಾಯವಾಗಿದೆ.

ಮಾರ್ಕೋಡು ಭಾಗದಲ್ಲಿ ಮಲ್ಲಿಗೆ ಕೃಷಿಕರ ಸಂಖ್ಯೆ ಹೆಚ್ಚಿದ್ದು, ಅದೇ ಜೀವನಾಧಾರವಾಗಿದೆ. ಇಲ್ಲಿನ ಕುಟುಂಬಗಳು ನಿತ್ಯ ಮಲ್ಲಿಗೆ ಮೊಗ್ಗನ್ನು ಕೊಯ್ದು ನಂತರ ಅವುಗಳನ್ನು ನೇಯ್ದು ಮಾರುಕಟ್ಟೆಗೆ ಮುಟ್ಟಿಸುವ ಕಾರ್ಯ ಮಾಡುತ್ತಿವೆ. ಈಗ ದರ ಕಡಿಮೆಯಾಗಿರುವುದು ಸಮಸ್ಯೆಯಾಗಿದೆ.