ಶಿರ್ವ: ಮನೆಗೆ ಸಿಡಿಲು ಬಡಿದು ಹಾನಿ

Team Udayavani, Jun 7, 2017, 12:07 PM IST

ಶಿರ್ವ: ಇಲ್ಲಿನ ಬಲ್ಲಾಡಿ ಕಲ್ಲುಮುರ ಗಿರಿಜಾ ಆಚಾರ್ತಿ ಅವರ ಮನೆಗೆ ಸೋಮವಾರ ರಾತ್ರಿ 9.30ರ ವೇಳೆಗೆ ಸಿಡಿಲು ಬಡಿದು ಹಾನಿ ಸಂಭವಿಸಿದೆ.

ಸಿಡಿಲಿನ ರಭಸಕ್ಕೆ ಮನೆಯ ಮಣ್ಣಿನ ಇಟ್ಟಿಗೆಯ ಗೋಡೆಯ ಭಾಗ ಕುಸಿದು ಬಿದ್ದಿದೆ. ಮನೆಯ ಫ್ಯಾನ್‌, ವಿದ್ಯುತ್‌ ಮೀಟರ್‌, ಸರ್ವೀಸ್‌ ವಯರ್‌ ಹಾಗೂ ವಿದ್ಯುತ್‌ ಪಂಪ್‌ ಸುಟ್ಟು ಹೋಗಿದೆ. ಬಚ್ಚಲು ಮನೆಯ ಮಾಡಿನ ಹೆಂಚುಗಳು ಒಡೆದು ಹೋಗಿವೆ. ಮನೆಯ ವಿದ್ಯುತ್‌ ವಯರಿಂಗ್‌ ಸಂಪೂರ್ಣ ಸುಟ್ಟು ಹೋಗಿದ್ದು ವಿದ್ಯುತ್‌ ಉಪಕರಣಗಳು ಪುಡಿ ಪುಡಿಯಾಗಿ ಸುಮಾರು 5 ಲಕ್ಷ ರೂ.ಹಾನಿ ಸಂಭವಿಸಿದೆ. ಮನೆಯಲ್ಲಿ ತಂದೆ, ತಾಯಿ ಮತು ಇಬ್ಬರು ಹೆಣ್ಮಕ್ಕಳು ವಾಸವಿದ್ದು ರಾತ್ರಿ ನೆರೆಮನೆಯಲ್ಲಿ ಆಶ್ರಯ ಪಡೆದರು.

ಮನೆಯ ಕಪಾಟಿನ ಗಾಜುಗಳು ಪುಡಿಯಾಗಿ ಗಾಜಿನ ಚೂರು ತಾಗಿ ಸಣ್ಣ ಪುಟ್ಟ ಗಾಯಗಳಾಗಿವೆ. ಶಿರ್ವ ಜಿ.ಪಂ. ಸದಸ್ಯ ವಿಲ್ಸನ್‌ ರೊಡ್ರಿಗಸ್‌, ಶಿರ್ವ ಗ್ರಾ.ಪಂ. ಅಧ್ಯಕ್ಷೆ ವಾರಿಜಾ ಪೂಜಾರ್ತಿ,ಪಿಡಿಒ ಮಾಲತಿ, ಗ್ರಾಮ ಕರಣಿಕ ವಿಜಯ್‌ ಮನೆಗೆ ತೆರಳಿ ಪರಿಶೀಲನೆ ನಡೆಸಿದ್ದಾರೆ. ಶಿರ್ವ ಗ್ರಾ.ಪಂ.ಸದಸ್ಯರಾದ ರತನ್‌ ಶೆಟ್ಟಿ, ಕೆ.ಆರ್‌.ಪಾಟ್ಕರ್‌, ದೀಪಾ, ಶಿರ್ವ ಸ್ಥಾನೀಯ ಕಾಂಗ್ರೆಸ್‌ ಅಧ್ಯಕ್ಷ ಸುಧೀರ್‌ ಶೆಟ್ಟಿ ಮತ್ತಿತರ ಮುಖಂಡರು ಮನೆಗೆ ಭೇಟಿ ನೀಡಿದ್ದಾರೆ.