ಶಿರ್ವಮಟ್ಟಾರು: ಮನೆಗೆ ಸಿಡಿಲು ಬಡಿದು 2 ಮನೆಗಳಿಗೆ ಹಾನಿ

Team Udayavani, Apr 14, 2022, 3:17 PM IST

ಶಿರ್ವ: ಕಾಪು ತಾಲೂಕು ಶಿರ್ವ ಗ್ರಾಮದ ಮಟ್ಟಾರು ಕಡಂಬು ಲಕ್ಷ್ಮೀ ಶೆಟ್ಟಿ ಮತ್ತು ಶ್ರೀನಿವಾಸ ನಾಯಕ್‌ ಎಂಬವರ ಮನೆಗೆ ಎ. 13ರ ರಾತ್ರಿ 11 ಗಂಟೆಗೆ ಸಿಡಿಲು ಬಡಿದು ಹಾನಿ ಸಂಭವಿಸಿದೆ.

ಸಿಡಿಲಿನ ರಭಸಕ್ಕೆ ಲಕ್ಷ್ಮೀ ಶೆಟ್ಟಿಯವರ ಮನೆಯ ಗೋಡೆ ಒಡೆದು ಬಿರುಕು ಬಿಟ್ಟಿದ್ದು, ಮನೆಯ ಮಾಡಿನ ಹೆಂಚುಗಳೆಲ್ಲ ಪುಡಿಯಾಗಿದೆ. ವಿದ್ಯುತ್‌ ಮೀಟರ್‌ ಸಹಿತ ವಯರಿಂಗ್‌ ಸಂಪೂರ್ಣ ಸುಟ್ಟು ಹೋಗಿದ್ದು ಸುಮಾರು 1.5ಲ. ರೂ.ಹಾನಿ ಸಂಭವಿಸಿದೆ.

ಇಬ್ಬರು ಸಣ್ಣ ಮಕ್ಕಳ ಸಹಿತ ಮನೆಯಲ್ಲಿದ್ದವರಿಗೆ ಯಾವುದೇ ಅನಾಹುತ ಸಂಭವಿಸಿಲ್ಲ. ಮನೆಯ ಹಿಂಬದಿಯ ಸಾಗುವಾನಿ ಮರಕ್ಕೆ ಸಿಡಿಲು ಬಡಿದು ಸೀಳು ಸೀಳಾಗಿದ್ದು, ಬಚ್ಚಲು ಮನೆ ಸಂಪೂರ್ಣ ಹಾನಿಯಾಗಿದೆ. ವಾರದ ಹಿಂದೆಯಷ್ಟೇ ಬಡ ಕುಟುಂಬದ ಮನೆಯನ್ನು ದಾನಿಗಳ ಸಹಕಾರದೊಂದಿಗೆ ದುರಸ್ತಿ ಮಾಡಲಾಗಿತ್ತು. ಇದೀಗ ಸಿಡಿಲಿನ ಆಘಾತದಿಂದ ಕುಟುಂಬ ಕಂಗಾಲಾಗಿದೆ.

ಪಕ್ಕದ ಮನೆಗೂ ಹಾನಿ

ಸಿಡಿಲಿನ ರಭಸಕ್ಕೆ ಮನೆಯ ಅನತಿ ದೂರದಲ್ಲಿರುವ ಶ್ರೀನಿವಾಸ ನಾಯಕ್‌ ಅವರ ಮನೆಯ ವಿದ್ಯುತ್‌ ಮೀಟರ್‌ ಕಿತ್ತು ಹೋಗಿ, ಗೋಡೆ ಬಿರುಕು ಬಿಟ್ಟು ಸುಮಾರು 30 ಸಾವಿರ ರೂ. ಹಾನಿ ಸಂಭವಿಸಿದೆ. ಶ್ರೀನಿವಾಸ ನಾಯಕ್‌ ಅವರು ಸಂಬಂಧಿಕರ ಮನೆಗೆ ತೆರಳಿದ್ದು, ಘಟನೆಯ ವೇಳೆ ಮನೆಯಲ್ಲಿ ಯಾರೂ ಇರಲಿಲ್ಲ.

ಶಿರ್ವ ಗ್ರಾಮ ಪಂಚಾಯತ್‌ ಅಧ್ಯಕ್ಷ ಕೆ.ಆರ್‌. ಪಾಟ್ಕರ್‌, ಗ್ರಾ.ಪಂ. ಸದಸ್ಯೆ ರೇವತಿ ಆಚಾರ್ಯ ಮತ್ತಿತರ ಮುಖಂಡರು ಮನೆಗೆ ಭೇಟಿ ನೀಡಿದ್ದಾರೆ. ಶಿರ್ವ ಗ್ರಾಮ ಕರಣಿಕ ವಿಜಯ್‌ ಮನೆಗೆ ತೆರಳಿ ಪರಿಶೀಲನೆ ನಡೆಸಿ ಕಾಪು ತಹಶೀಲ್ದಾರ್‌ ಅವರಿಗೆ ವರದಿ ಸಲ್ಲಿಸಿದ್ದಾರೆ.