ತೋಡುಗಳಲ್ಲಿ ಮಣ್ಣಿನ ರಾಶಿ; ನೀರು ಹೋಗೋದೆಲ್ಲಿ? 

Team Udayavani, May 24, 2018, 6:00 AM IST

ಉಡುಪಿ: ರಾಷ್ಟ್ರೀಯ ಹೆದ್ದಾರಿ 66 ಹಾದು ಹೋಗುವ ಉಡುಪಿ ನಗರಸಭೆಯ ಅಂಬಲಪಾಡಿ ವಾರ್ಡ್‌ ಮತ್ತದರ ಸುತ್ತಮುತ್ತ ಮಳೆ ನೀರು ಹರಿಯುವ ಪ್ರಮುಖ ತೋಡುಗಳಲ್ಲಿ ಮಣ್ಣಿನ ರಾಶಿ ಕಂಡುಬಂದಿದೆ. ಕೆಲವೆಡೆಗಳಲ್ಲಿ ತೋಡೇ ಮಾಯವಾಗಿದೆ!

ಅಂಬಲಪಾಡಿ-ಕರಾವಳಿ ಜಂಕ್ಷನ್‌ ಮಧ್ಯೆ ರಾ.ಹೆ. 66ರಲ್ಲಿ ಅಭಿನಂದನ್‌ ಪೆಟ್ರೋಲ್‌ ಬಂಕ್‌ ಇದೆ. ಇದರ ಮುಂಭಾಗ ಪೂರ್ವಭಾಗದಲ್ಲಿ ತಾಲೂಕು ಕಚೇರಿ, ಪೊಲೀಸ್‌ ಅಧೀಕ್ಷಕರ ಕಚೇರಿ ಸಂಪರ್ಕಿಸುವ ಪ್ರಮುಖ ರಸ್ತೆ ಇದೆ. ಸುಮಾರು 300 ಮೀ. ಉದ್ದಕ್ಕೆ ಇರುವ ಈ ರಸ್ತೆಯ ಇಕ್ಕೆಲದಲ್ಲಿದ್ದ ತೋಡು ಮಾಯವಾಗಿದೆ.  ಹೆದ್ದಾರಿ ಸಂಧಿಸುವ ಭಾಗದಲ್ಲಿ 50 ಮೀ.ನಷ್ಟು ಉದ್ದಕ್ಕೆ ಮಾತ್ರ ತೋಡು ಇದ್ದು, ಇದು ಕೂಡ ಸಮರ್ಪಕವಾಗಿಲ್ಲ.

ರಸ್ತೆಯೂ ಹಾಳು; ತೋಡೂ ಹಾಳು
ತಾಲೂಕು ಕಚೇರಿಯಿಂದ ಹೆದ್ದಾರಿ ಸಂಪರ್ಕಿತ ಪ್ರಮುಖ ರಸ್ತೆಯ ಮಧ್ಯಭಾಗವನ್ನು ಅಗೆದು ಒಳಚರಂಡಿ ಕಾಮಗಾರಿಯನ್ನು ವರ್ಷದ ಹಿಂದೆ ನಡೆಸಲಾಗಿದೆ. ಈ ಕಾಮಗಾರಿ ನಡೆಸಿದವರು ಮಣ್ಣನ್ನು ರಸ್ತೆ ಪಕ್ಕದ ತೋಡಿಗೆ ಹಾಕಿ ಹೋಗಿದ್ದಾರೆ. ಇದರಿಂದ ಡಾಮರು ರಸ್ತೆಯೂ ಹಾಳಾಗಿದೆ. ತೋಡನ್ನೂ ಹಾಳು ಮಾಡಿದ್ದಾರೆ. ಇನ್ನು ಮಳೆ ಬಂದಾಗ ನೀರೆಲ್ಲ ಅಗೆದು ಹಾಕಿರುವ ರಸ್ತೆ ಮೇಲೆಯೇ ಸಾಗಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿದೆ. ಇಲ್ಲಿನ ಈ ಪರಿಸ್ಥಿತಿಯಿಂದ ತೋಡು ಮತ್ತು ರೋಡು ಎರಡೂ ಹಾಳಾಗಿದೆ ಎಂದು ಸ್ಥಳೀಯರು ಹೇಳಿದ್ದಾರೆ.

ಮೃತ್ಯುಹೊಂಡ !
ಕರಾವಳಿ ಜಂಕ್ಷನ್‌ನಿಂದ ಅಂಬಲಪಾಡಿ ರಾ.ಹೆ. 66ರ ಹೆದ್ದಾರಿ ಇಕ್ಕೆಲಗಳಲ್ಲಿ ತೋಡಿನ ಪರಿಸ್ಥಿತಿಯೇ ಚಿಂತಾಜನಕವಾಗಿದೆ. ಇಲ್ಲಿನ ಪೆಟ್ರೋಲ್‌ ಬಂಕ್‌ ಒಂದರ ಮುಂಭಾಗದ ರಸ್ತೆಯ ಪೂರ್ವಭಾಗದ ಹೆದ್ದಾರಿ ಅಂಚಿನಲ್ಲಿ ಮೃತ್ಯು ಹೊಂಡವೊಂದು ಸೃಷ್ಟಿಯಾಗಿದೆ. ಕಾಂಕ್ರೀಟ್‌ ಚರಂಡಿ ಕಾಮಗಾರಿ ಪೂರ್ಣಗೊಳಿಸದ ಕಾರಣ ಬೃಹತ್‌ ಹೊಂಡ ಇಲ್ಲಿ ಸೃಷ್ಟಿಯಾಗಿದೆ. ತ್ಯಾಜ್ಯಗಳು ಈ ಹೊಂಡದಲ್ಲಿ ಶೇಖರಣೆಯಾಗಿದೆ.  ವಾಹನ ಸಾಗುವ, ಜನರು ನಡೆದಾಡುವ ಸರ್ವಿಸ್‌ ರಸ್ತೆಯಂಚಿನಲ್ಲೇ ಈ ಹೊಂಡವಿದೆ. ಗಿಡಗಂಟಿಗಳು ಬೆಳೆದ ಕಾರಣ ನಡೆದಾಡುವವರೂ ಎಡವಿ ಗುಂಡಿಗೆ ಬೀಳುವ ಸಾಧ್ಯತೆ ಇದೆ.

ಅಲ್ಲಲ್ಲಿ  ಸ್ಲಾéಬ್‌ ಓಪನ್‌
ಹೆದ್ದಾರಿ ಕಾಮಗಾರಿ ಸಂದರ್ಭ ಚರಂಡಿ ಕಾಮಗಾರಿಯನ್ನು ಅಸಮರ್ಪಕವಾಗಿ ಮಾಡಲಾಗಿದೆ. ಅಂಬಲಪಾಡಿ ಭಾಗದಲ್ಲಿ ಚರಂಡಿಯಲ್ಲಿ ಅರೆಬರೆ ಕಾಂಕ್ರೀಟ್‌ ಚರಂಡಿ ಕಾಮಗಾರಿ ನಡೆದಿದೆ. ಅದರಲ್ಲೂ ಅಲ್ಲಲ್ಲಿ ಚರಂಡಿ ಸ್ಲಾéಬ್‌ಗಳನ್ನು ಹಾಕಿಲ್ಲ. ಕೆಲವೆಡೆ ಸ್ಲಾéಬ್‌ಗಳು ತೆರೆದುಕೊಂಡಿವೆ. ಚರಂಡಿಯೊಳಗೆ ಗಿಡಗಂಟಿಗಳು ಬೆಳೆದಿವೆ. 

ಗಮನ ಹರಿಸುತ್ತೇವೆ
ಅಂಬಲಪಾಡಿ ವಾರ್ಡ್‌ನಲ್ಲಿ ಚರಂಡಿ ಹೂಳೆತ್ತುವ ಕೆಲಸವನ್ನು ಕಳೆದೆರಡು ತಿಂಗಳಿನಿಂದ ನಡೆಸಲಾಗಿದೆ. ಕೆಲವೆಡೆಗಳಲ್ಲಿ ಹೆದ್ದಾರಿ ಕಾಮಗಾರಿಯ ಚರಂಡಿ ನಿರ್ಮಿಸುವವರು ಸಮಸ್ಯೆ ತಂದೊಡ್ಡಿದ್ದಾರೆ. ಈ ಬಗ್ಗೆ ನಗರಸಭೆ ಎಂಜಿನಿಯರ್‌ ಅವರಿಗೆ ತಿಳಿಸಲಾಗಿದೆ. ಸಭೆಯಲ್ಲೂ ವಿಷಯ ಪ್ರಸ್ತಾವವಾಗಿದೆ. ಸಮಸ್ಯೆ ಬಗ್ಗೆ ಗಮನ ಹರಿಸಿ ನಗರಸಭೆ ಮೂಲಕ ಚರಂಡಿಯಲ್ಲಿರುವ ಮಣ್ಣನ್ನು ತೆರವುಗೊಳಿಸಲಾಗುವುದು.
– ವಸಂತಿ ಶೆಟ್ಟಿ, ನಗರಸಭಾ ಸದಸ್ಯರು, ಅಂಬಲಪಾಡಿ

– ಚೇತನ್‌ ಪಡುಬಿದ್ರಿ