ಶ್ರೀ ಕ್ಷೇತ್ರ ಚೋನಮನೆಯಿಂದ ಧಾರ್ಮಿಕ ಕ್ಷೇತ್ರಗಳಿಗೆ ಬಸ್‌ ಸಂಚಾರ

Team Udayavani, Mar 31, 2017, 11:38 AM IST

ಸಿದ್ದಾಪುರ : ಕುಂದಾಪುರ ತಾಲೂಕಿನ ಧಾರ್ಮಿಕ ಕ್ಷೇತ್ರಗಳಲ್ಲಿ ಒಂದಾದ ಆಜ್ರಿ ಚೋನಮನೆ ಶ್ರೀ ಶನೀಶ್ವರ ದೇವಸ್ಥಾನದಿಂದ ಶ್ರೀ ಕ್ಷೇತ್ರ ಮಂದಾರ್ತಿ ಹಾಗೂ ಶ್ರೀ ಕ್ಷೇತ್ರ ಕೊಲ್ಲೂರು ದರ್ಶನಕ್ಕೆ ಭಕ್ತರಿಗೆ ಅನುಕೂಲವಾಗಲು ಬಸ್ಸು ಸಂಚಾರಕ್ಕೆ ಶ್ರೀ ಕ್ಷೇತ್ರ ಚೋನಮನೆಯಲ್ಲಿ ಉದ್ಯಮಿ ಪ್ರಣಯ್‌ ಕುಮಾರ್‌ ಶೆಟ್ಟಿ ಅವರು ಚಾಲನೆ ನೀಡಿದರು.

ಬಸ್‌ ಮಾಲಕ ಹಾಗೂ ಶ್ರೀ ಕ್ಷೇತ್ರ ಚೋನಮನೆ ಶ್ರೀ ಶನೀಶ್ವರ ದೇವಸ್ಥಾನದ ಧರ್ಮದರ್ಶಿ ಅಶೋಕ ಶೆಟ್ಟಿ ಮಾತನಾಡಿ, ಕ್ಷೇತ್ರಗಳಿಗೆ ಆಗಮಿಸುವ ಭಕ್ತಾದಿಗಳಿಗೆ ಅನುಕೂಲವಾಗುವಂತೆ ಶ್ರೀ ಕ್ಷೇತ್ರ ಚೋನಮನೆಯಿಂದ ಶ್ರೀ ಕ್ಷೇತ್ರ ಮಂದಾರ್ತಿ ಹಾಗೂ ಶ್ರೀ ಕ್ಷೇತ್ರ ಕೊಲ್ಲೂರಿಗೆ ಬಸ್‌ ಸಂಚರಿಸಲಿದೆ. ಆಜ್ರಿ, ಯಳಬೇರು, ಹಳ್ಳಿಹೊಳೆ, ಮೂದುರು, ಕೊಲ್ಲೂರು ಹಾಗೂ ಅದೇ ಮಾರ್ಗವಾಗಿ ಸಿದ್ದಾಪುರ, ಅಮಾಸೆಬೈಲು, ಹೆಂಗವಳ್ಳಿ, ತೊಂಬತ್ತು, ಗೋಳಿಯಂಗಡಿ, ವಂಡಾರು, ಶಿರೂರುಮೂರುಕೈ, ಮಂದರ್ತಿಗೆ ಬಸ್‌ ಹೋಗಲಿದೆ. ಈ ಮಾರ್ಗಗಳ ಬಸ್‌ಗಳ ಸಂಚಾರ ತೀರ ವಿರಳವಾಗಿರುವುದರಿಂದ ಯಾತ್ರಿಕರಿಗೆ, ಶಾಲಾ ವಿದ್ಯಾರ್ಥಿಗಳಿಗೆ, ಕೂಲಿ ಕಾರ್ಮಿಕರಿಗೆ ಅನುಕೂಲವಾಗಲಿದೆ ಎಂದು ಹೇಳಿದರು.

ಈ ಸಂದರ್ಭದಲ್ಲಿ ತಾ.ಪಂ. ಸದಸ್ಯ ದೇವದಾಸ್‌ ಶೆಟ್ಟಿ, ಗೋಪಾಲ ಶೆಟ್ಟಿ ವಂಡ್ಸೆ, ಮಂಜುನಾಥ ಪೂಜಾರಿ, ಶ್ಯಾಮಲ್‌ ಎ. ಶೆಟ್ಟಿ, ಸವಿತಾ  ಇನ್ನಿತರರು ಉಪಸ್ಥಿತರಿದ್ದರು.