ತಿಂಗಳೆಯಲ್ಲಿ ಶ್ರೀನಿವಾಸ ಕಲ್ಯಾಣೋತ್ಸವ

Team Udayavani, Mar 15, 2019, 12:30 AM IST

ಹೆಬ್ರಿ: ಹೆಬ್ರಿ ತಾಲೂಕಿನ ಇತಿಹಾಸ ಪ್ರಸಿದ್ಧ ತಿಂಗಳೆಯಲ್ಲಿ ತಿರುಪತಿ ವೆಂಕಟೇಶಮೂರ್ತಿ ಅವರ ಧಾರ್ಮಿಕ ನೇತೃತ್ವದಲ್ಲಿ ನಡೆದ ವೈಭವದ ಶ್ರೀನಿವಾಸ ಕಲ್ಯಾಣ ಕಾರ್ಯಕ್ರಮ ಸೇರಿದ ಸಹಸ್ರ ಭಕ್ತ ಜನಸಾಗರ ಸಾಕ್ಷಿಯಾಯಿತು.

ಆಕರ್ಷಕವಾದ ಭವ್ಯ ವೇದಿಕೆಯಲ್ಲಿ ನಿರ್ಮಾಣವಾದ ತಿರುಪತಿ ದೇವಸ್ಥಾನದ ರಚನೆ ಭಕ್ತರ ಮನಸೂರೆಗೊಂಡಿದ್ದು, ವಿವಿಧ ಧಾರ್ಮಿಕ ಕಾರ್ಯಕ್ರಮಗಳೊಂದಿಗೆ ಶ್ರೀನಿವಾಸ ಕಲ್ಯಾಣ ಮಹೋತ್ಸವದ ವಿವಿಧ ವಿಧಿವಿಧಾನಗಳು ಭಜನೆ, ನಾಮ ಸ್ಮರಣೆ ಹಾಗೂ ಆಚರಣೆಯ ಮಹತ್ವದ ಕುರಿತು ವಿವರವಾದ ವಿವರಣೆಯೊಂದಿಗೆ ನಡೆದವು. ಧಾರ್ಮಿಕ ಕಾರ್ಯಕ್ರಮದ ವಿಧಿವಿಧಾನಗಳಲ್ಲಿ ಸಂಸದೆ ಶೋಭಾ ಕರಂದ್ಲಾಜೆ, ಗೌರಿಗದ್ದೆ ವಿನಯ ಗುರೂಜಿ, ಬೈಂದೂರು ಶಾಸಕ ಬಿ.ಎಂ. ಸುಕುಮಾರ್‌ ಶೆಟ್ಟಿ, ಗುರ್ಮೆ ಸುರೇಶ್‌ ಶೆಟ್ಟಿ ತೊಡಗಿಕೊಂಡದ್ದು ಗಮನ ಸೆಳೆಯಿತು. ಸೇರಿದ ಎಲ್ಲ ಭಕ್ತರಿಗೂ ತಿರುಪತಿ ಪ್ರಸಾದ ಮಂತ್ರಾಕ್ಷತೆ, ಅನ್ನಪ್ರಸಾದ ವಿತರಿಸಲಾಯಿತು.

ಕಾರ್ಯಕ್ರಮದಲ್ಲಿ ಡಾ| ವೀಣಾ ಬನ್ನಂಜೆ, ಶಿವಮೊಗ್ಗ  ಲೋಕಸಭಾ ಸದಸ್ಯ ಬಿ.ವೈ. ರಾಘವೇದ್ರ, ಹಿರಿಯ ಸಾಹಿತಿ ಅಂಬಾತನಯ ಮುದ್ರಾಡಿ, ಮಂದಾರ್ತಿ ದೇವಸ್ಥಾನದ ಆಡಳಿತ ಧರ್ಮದರ್ಶಿ ಧನಂಜಯ ಶೆಟ್ಟಿ, ತಿಂಗಳೆ ವಿಕ್ರಮಾರ್ಜುನ ಹೆಗ್ಡೆ, ಸುಪ್ರಸಾದ್‌ ಶೆಟ್ಟಿ, ಮನೋಜ್‌ ಕುಮಾರ್‌, ಡಾ| ಕೆಳಚಾವಡಿ ಅಣ್ಣಪ್ಪ ಶೆಟ್ಟಿ, ತಿಂಗಳೆ ಶೌರಿ ಶಂಕರ ಶೆಟ್ಟಿ, ಕೆಳಚಾವಡಿ ಪ್ರಕಾಶ್‌ ಶೆಟ್ಟಿ  ಉಪಸ್ಥಿತರಿದ್ದರು.