ಬಟ್ಟೆ ದಾಸ್ತಾನು ಭಾರ ಇಳಿಸಬೇಕಿದ್ದರೆ ಇವರಿದ್ದಾರೆ!

Team Udayavani, Apr 14, 2018, 6:15 AM IST

ಉಡುಪಿ: ಬೀರುವಿನಲ್ಲಿ ಬಟ್ಟೆಗಳು ತುಂಬಿವೆ. ಅವುಗಳನ್ನು ಏನು ಮಾಡೋದು ಎನ್ನುವುದು ಹಲವರಿಗೆ ಪ್ರಶ್ನೆಯಾಗಿ ಕಾಡಿರಬಹುದು. ಆದರೆ ಕಾರ್ಕಳ ಫ‌ುಲ್ಕೇರಿಯ ಸುನಿಲ್‌ ಅವರನ್ನು ಸಂಪರ್ಕಿಸಿದರೆ, ಈ ಸಮಸ್ಯೆಗೆ ಪರಿಹಾರ ಸರಳ. ಜತೆಗೆ ಬಟ್ಟೆ ದಾನ ಮಾಡಿದ ಪುಣ್ಯವೂ ಬರಬಹುದು. ಬಟ್ಟೆಗಳನ್ನು ಪಡೆದು, ಅಗತ್ಯವಿದ್ದವರಿಗೆ ಹಂಚುವ ಸುನಿಲ್‌ ಅವರು ತಮ್ಮ ಕಾರ್ಯದಿಂದಾಗಿ ಇತರರಿಗೆ ಮಾದರಿಯಾಗಿದ್ದಾರೆ. 

ಅಕ್ಷಯ ತೃತೀಯ ಸಂದರ್ಭ ವಿವಿಧೆಡೆಗಳಿಂದ ಬಟ್ಟೆಗಳನ್ನು ಸಂಗ್ರಹಿಸಿ ದೀನರಿಗೆ ನೀಡುವ  ಕಾರ್ಯವನ್ನು ಅವರು ಆರಂಭಿಸಿದ್ದು, ಅದನ್ನೀಗ ದೊಡ್ಡ ಮಟ್ಟದ ಯೋಜನೆಯನ್ನಾಗಿಸಿದ್ದಾರೆ. ಕಳೆದ ವರ್ಷವೂ ಅವರು  ಸ್ನೇಹಿತರಿಂದ ಬಟ್ಟೆಗಳನ್ನು ಸಂಗ್ರಹಿಸಿ ಅಗತ್ಯವುಳ್ಳವರಿಗೆ  ನೀಡಿದ್ದಾರೆ. 
 
ಗಾಂಧೀಜಿಯವರು ಉಡುಪಿಗೆ ಬಂದಿದ್ದಾಗ ಅವರಿಗೆ  ಚಿನ್ನ  ದಾನ ಮಾಡಿದ್ದ 10 ವರ್ಷದ ಬಾಲಕಿ  ಪಾಂಗಾಳದ ನಿರುಪಮಾ ನಾಯಕ್‌ ಅವರ “ಸಿರಿವಂತಿಕೆಯನ್ನು ಪ್ರದರ್ಶಿಸ ಬಾರದು. ಅದು ಇತರರಿಗೆ ಮತ್ಸರ ಪಡುವಂತಿರಬಾರದು’ ಎಂಬ ಮಾತು ಗಳನ್ನು ಆದರ್ಶವಾಗಿ ಪರಿಗಣಿಸಿ, ಬಟ್ಟೆ ಹಂಚುವ ಕಾಯಕವನ್ನು ಸುನಿಲ್‌ ಅವರು ಮುಂದುವರಿಸಿದ್ದಾರೆ. ಅಕ್ಷಯ ತದಿಗೆಯಂದು ಸುನಿಲ್‌ ಅವರು ಮನೆಗಳಿಗೆ ಹೋಗಿ ಬಟ್ಟೆ ಸಂಗ್ರಹಿಸುತ್ತಾರೆ. ಬಳಿಕ ತಮ್ಮ ಕಾರಿನಲ್ಲಿ ಅವುಗಳನ್ನು ತುಂಬಿ ದಾರಿ ಮಧ್ಯೆ ಅಗತ್ಯವಿದ್ದವರಿಗೆ ಮುಕ್ತವಾಗಿ ಹಂಚುತ್ತಾರೆ. ಅವರ ಈ ಕಾರ್ಯಕ್ಕೆ ಬೆಂಬಲವಾಗಿ ಹಲವರು ಬಟ್ಟೆಗಳನ್ನು ನೀಡಿದ್ದಾರೆ. ಜತೆಗೆ ಅವರ ಬೆಂಬಲವಾಗಿಯೂ ನಿಂತಿದ್ದಾರೆ. 

ಸುನಿಲ್‌ ಅವರು ಪುಲ್ಕೇರಿಯಲ್ಲಿ ಗ್ಯಾರೇಜ್‌ ನಡೆಸುತ್ತಿದ್ದು ಜಿಲ್ಲೆಯಲ್ಲಿ ತಿರುಗಾಟದ ವೇಳೆ ಬಟ್ಟೆ ಹಂಚುತ್ತಾರೆ. ಬಟ್ಟೆ ಇದ್ದವರು, ದೀನರಿಗೆ ನೆರ ವಾಗಬೇಕು ಎನ್ನುವವರು ಸುನಿಲ್‌ ಅವರ 9845957408 ಮೊಬೈಲ್‌ ಸಂಖ್ಯೆಗೆ ಕರೆ ಮಾಡಿದರೆ, ಕಪಾಟಿನಲ್ಲಿದ್ದ ಬಟ್ಟೆಯ ಭಾರವೂ ಇಳಿಯಬಹುದು! 

ದೂರವಾಣಿ ಕರೆ ಬರುತ್ತಿದೆ
“ಹೋದ ವರ್ಷ ನನಗೆ ಬರುತ್ತಿದ್ದ ದೂರವಾಣಿ ಕರೆಗಳು ಈಗಲೂ ಬರುತ್ತಿವೆ.  ಜನರು ತುಂಬ ಸಂತೋಷದಿಂದ ತಮ್ಮ ಹೆಚ್ಚುವರಿ ಬಟ್ಟೆಗಳನ್ನು ಕೊಡುತ್ತಿದ್ದಾರೆ. ಇದನ್ನು ಅಗತ್ಯದ ಜನರಿಗೆ ಮುಟ್ಟಿಸುವಲ್ಲಿ ಅತೀವ ಸಂತೃಪ್ತಿ ಇದೆ. ಬಟ್ಟೆಯನ್ನು ಕೊಟ್ಟಾಗ ಅದರ ಅಗತ್ಯದವರಿಗೆ ಆಗುವ ಆನಂದಕ್ಕೆ ಬೆಲೆ ಕಟ್ಟಲಾಗದು’ .
– ಸುನಿಲ್‌