ಟೋಲ್‌ ಗೇಟ್‌ ಬಗ್ಗೆ ದಿಕ್ಕುತಪ್ಪಿಸುವ ಹೇಳಿಕೆ: ಬಿಜೆಪಿ ಆರೋಪ

Team Udayavani, Oct 27, 2018, 6:00 AM IST

ಬೆಳ್ಮಣ್‌: ಇಲ್ಲಿ ಪ್ರಾರಂಭಿಸಲುದ್ದೇಶಿಸಲಾದ ಟೋಲ್‌ಗೇಟ್‌ನ ಬಗ್ಗೆ ಪಕ್ಷಾತೀತವಾಗಿ ವ್ಯಾಪಕ ಪ್ರತಿಭಟನೆ ನಡೆಯುತ್ತಿದ್ದರೂ ಕಾರ್ಕಳದ  ಮಾಜಿ ಶಾಸಕ ಗೋಪಾಲ ಭಂಡಾರಿ ವಿನಾ ರಾಜಕೀಯ ಬಳಸಿ ಹೋರಾಟದ ದಿಕ್ಕು ತಪ್ಪಿಸುತ್ತಿದ್ದಾರೆ ಎಂದು ಬಿಜೆಪಿ ಜಿಲ್ಲಾ ಉಪಾಧ್ಯಕ್ಷ ಬೋಳ ಸದಾಶಿವ ಶೆಟ್ಟಿ ಆರೋಪಿಸಿದ್ದಾರೆ.

ಗುರುವಾರ ಕೆದಿಂಜೆಯಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸದಾಶಿವ ಶೆಟ್ಟಿ, ಟೋಲ್‌ಗೇಟ್‌ ವಿರುದ್ಧದ ಹೋರಾಟದಲ್ಲಿ ಕಾರ್ಕಳ ಬಿಜೆಪಿ ಸಂಪೂರ್ಣವಾಗಿ ಬೆಂಬಲ ವ್ಯಕ್ತಪಡಿಸಿದ್ದು ಈ ಬಗ್ಗೆ ಗೋಪಾಲ ಭಂಡಾರಿಯವರು ನೀಡಿದ್ದ ಹೇಳಿಕೆಯಲ್ಲಿ 2010ರಲ್ಲಿಯೇ ಬಿಜೆಪಿ ಸರಕಾರ ಒಪ್ಪಂದ ಮಾಡಿಕೊಂಡಿದೆ ಎಂದು ಮಾಡಿರುವ ಆರೋಪ ಸತ್ಯಕ್ಕೆ ದೂರವಾಗಿದೆ ಎಂದಿದ್ದಾರೆ.

ಕಾರ್ಕಳ ಬಿಜೆಪಿ ಟೋಲ್‌ ವಿರುದ್ಧ ಹೋರಾಟವನ್ನು ಕಳೆದ ಡಿಸೆಂಬರ್‌ಗೂ ಮೊದಲೇ ಆರಂಭಿಸಿದ್ದು  ಬೆಳ್ಮಣ್‌ ಜಿಲ್ಲಾ ಪಂಚಾಯತ್‌ ವ್ಯಾಪ್ತಿಯ  ಬಿಜೆಪಿ ಬೆಂಬಲಿತ ಎಲ್ಲಾ ಗ್ರಾ.ಪಂ.,ತಾಲೂಕು ಪಂಚಾಯತ್‌ಗಳಲ್ಲಿ ಯೋಜನೆಯ ವಿರುದ್ಧ ನಿರ್ಣಯ ಕೈಗೊಳ್ಳಲಾಗಿತ್ತು ಎಂದು ಜಿಲ್ಲಾ ಪಂಚಾಯತ್‌ ಸದಸ್ಯೆ ರೇಷ್ಮಾ ಉದಯ ಶೆಟ್ಟಿ ಹೇಳಿದರು.

ರಸ್ತೆ ಕಾಮಗಾರಿ ಪ್ರಾರಂಭವಾದ 8 ವರ್ಷಗಳ ಬಳಿಕ ಟೋಲ್‌ ಅಳವಡಿಸುವ ರಾಜ್ಯದ ನಿರ್ಧಾರದ ಹಿಂದೆ ಜನರನ್ನು ಲೂಟಿ ಮಾಡಿ ರಾಜ್ಯ ಸರಕಾರದ ಖಜಾನೆ ತುಂಬಿಸುವ ಉದ್ದೇಶ ಇದಾಗಿದ್ದು ಕಾರ್ಕಳ-ಪಡುಬಿದ್ರಿ ಹೆದ್ದಾರಿಯ ಯಾವುದೇ ಭಾಗದಲ್ಲಿ ಟೋಲ್‌ ಅಳವಡಿಸಿದರೂ ಬಿಜೆಪಿ ಪ್ರತಿಭಟಿಸಲಿದೆ ಎಂದ ಬಿಜೆಪಿ ಜಿಲ್ಲಾ ಕೈಗಾರಿಕಾ ಪ್ರಕೋಷ್ಠದ ಸಂಚಾಲಕ ಇನ್ನಾ ಉದಯ ಕುಮಾರ್‌ ಶೆಟ್ಟಿ, ಪ್ರತಿಭಟನೆಗೆ ಸೂಕ್ತ ಉತ್ತರ ಸಿಗದೇ ಹೋದಲ್ಲಿ ಹೋರಾಟ ಉಗ್ರ ಸ್ವರೂಪ ಪಡೆಯಲಿದ್ದು ಮುಂದೆ ನಡೆಯುವ ಪರಿಣಾಮಗಳಿಗೆ ಸರಕಾರ ಹಾಗೂ ಜಿಲ್ಲಾಡಳಿತ ಹೊಣೆಯಾಗಲಿದೆ ಎಂದರು.

ಕಾರ್ಕಳ ತಾಲೂಕು ಪಂಚಾಯತ್‌ ಉಪಾಧ್ಯಕ್ಷ ಗೋಪಾಲ ಮೂಲ್ಯ, ಬಿಜೆಪಿ ಪ್ರಮುಖ ಸೂರ್ಯಕಾಂತ ಶೆಟ್ಟಿ,ಎಪಿಎಂಸಿ ಸದಸ್ಯ ಮೋಹನದಾಸ ಶೆಟ್ಟಿ, ಕಾರ್ಕಳ ಬಿಜೆಪಿ ಯುವಮೋರ್ಚಾ ಕಾರ್ಯದರ್ಶಿ ಕಿರಣ್‌ ಶೆಟ್ಟಿ, ನಂದಳಿಕೆ ಗ್ರಾಮ ಪಂಚಾಯತ್‌ ಸದಸ್ಯ ಸತೀಶ್‌ ಮಾಡ, ನಂದಳಿಕೆ ಬಿಜೆಪಿ ಗ್ರಾಮ ಸಮಿತಿ ಅಧ್ಯಕ್ಷ ಪ್ರಸಾದ್‌ ಶೆಟ್ಟಿ, ಮುಂಡ್ಕೂರು ಗ್ರಾಮ ಪಂಚಾಯತ್‌ ಉಪಾಧ್ಯಕ್ಷ ರವೀಂದ್ರ ಶೆಟ್ಟಿ ಮತ್ತಿತರರು ಸುದ್ದಿಗೋಷ್ಠಿಯಲ್ಲಿ ಪಾಲ್ಗೊಂಡಿದ್ದರು.