ಉಡುಪಿ ಜಿಲ್ಲೆಯಲ್ಲಿ ಮೂವರಿಗೆ ಪಾಸಿಟಿವ್ ; ಜಿಲ್ಲಾಡಳಿತ ಏನು ಮಾಡುತ್ತಿದೆ – ಇಲ್ಲಿದೆ ವಿವರ

Team Udayavani, Mar 29, 2020, 6:45 PM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಉಡುಪಿ: ಜಿಲ್ಲೆಯಲ್ಲಿ ಮೊದಲ ಕೋವಿಡ್ 19 ವೈರಸ್ ಪಾಸಿಟಿವ್ ಪ್ರಕರಣ ಪತ್ತೆಯಾದ ನಾಲ್ಕು ದಿನಗಳ ಬಳಿಕ ಇಂದು ಮತ್ತೆ ಎರಡು ಮಂದಿಯಲ್ಲಿ ಈ ಸೋಂಕು ಪಾಸಿಟಿವ್ ವರದಿ ಬಂದಿದೆ. ಇದು ಜಿಲ್ಲೆಯ ಜನತೆಯ ಆತಂಕವನ್ನು ಹೆಚ್ಚಿಸಿದೆ. ಪಕ್ಕದ ದಕ್ಷಿಣ ಕನ್ನಡದಲ್ಲಿ ಕೋವಿಡ್ 19 ಸೋಂಕು ಪೀಡಿತರ ಪ್ರಕರಣಗಳು ಹೆಚ್ಚಾಗುತ್ತಿದ್ದರೂ, ಉಡುಪಿಯಲ್ಲಿ ಮಾತ್ರ ಈ ಮಾಹಾಮಾರಿ ನಿಯಂತ್ರಣದಲ್ಲಿತ್ತು. ಆದರೆ ಇಂದು ಮತ್ತೆ ಎರಡು ಪ್ರಕರಣಗಳು ಪತ್ತೆಯಾಗಿರುವುದು ಸಹಜವಾಗಿಯೇ ಜಿಲ್ಲೆಯ ಜನರ ಆತಂಕವನ್ನು ಹೆಚ್ಚು ಮಾಡಿದೆ.

ಈ ಹಿನ್ನಲೆಯಲ್ಲಿ ಉಡುಪಿ ಜಿಲ್ಲೆಯಲ್ಲಿನ ಇದುವರೆಗಿನ ಕೋವಿಡ್ 19 ಸಂಬಂಧಿತ ಅಪ್ಡೇಟ್ಸ್ ಹೀಗಿದೆ.

– ಜಿಲ್ಲೆಯಲ್ಲಿ ಈತನಕ ಒಟ್ಟು ನಿಗಾ/ತಪಾಸಣೆಗೆ ಒಳಗಾದವರ ಸಂಖ್ಯೆ: 1992

– ಮಾರ್ಚ್ 28ರ ಶನಿವಾರ ಹೋಮ್ ಕ್ವಾರೆಂಟೈನ್ ಗೆ ನೋಂದಣಿ ಮಾಡಿಸಿಕೊಂಡವರ ಸಂಖ್ಯೆ: 106

– 14 ದಿನಗಳ ಹೋಮ್ ಕ್ವಾರೆಂಟೈನ್ ಪೂರ್ಣಗೊಳಿಸಿದವರ ಸಂಖ್ಯೆ: 842

– 28 ದಿನಗಳ ಹೋಮ್ ಕ್ವಾರೆಂಟೈನ್ ಪೂರ್ಣಗೊಳಿಸಿದವರು: 95 ಜನ

– ಮಾರ್ಚ್ 29ರವರೆಗೆ ಆಸ್ಪತ್ರೆಯಲ್ಲಿ ಕ್ವಾರೆಂಟೈನ್ ಗೆ ದಾಖಲುಗೊಂಡವರ ಸಂಖ್ಯೆ: 30

– ಇಲ್ಲಿಯವರೆಗೆ ತಪಾಸಣೆಗೆ ಕಳುಹಿಸಲಾದ ಮಾದರಿಗಳ (ಸ್ಯಾಂಪಲ್) ಸಂಖ್ಯೆ: 128

– ತಪಾಸಣಾ ವರದಿಯಲ್ಲಿ ನೆಗೆಟಿವ್ ವರದಿ ಪಡೆದುಕೊಂಡವರು 122 ಮಂದಿ ಮತ್ತು ಪಾಸಿಟಿವ್ ಕಂಡುಬಂದಿದ್ದು 3 ಮಂದಿಯಲ್ಲಿ. ಇನ್ನೂ 3 ಸ್ಯಾಂಪಲ್ ಗಳ ವರದಿ ಬರಬೇಕಿದೆ.

– ಆಸ್ಪತ್ರೆ ನಿಗಾದಲ್ಲಿರುವವರು: 55 ಜನ

– ಶನಿವಾರದಂದು ಆಸ್ಪತ್ರೆಯ ಐಸೊಲೇಷನ್ ಗೆ ದಾಖಲುಗೊಂಡವರ ಸಂಖ್ಯೆ: 55

– ಇಲ್ಲಿಯವರೆಗೆ ಮನೆ ಮತ್ತು ಆಸ್ಪತ್ರೆ ನಿಗಾದಲ್ಲಿರುವವರ ಒಟ್ಟು ಸಂಖ್ಯೆ: 970

(ಒಟ್ಟು ನಿಗಾ/ ತಪಾಸಣೆಯ 1,992ರಿಂದ 14+28 ದಿನಗಳ ಮನೆ ನಿಗಾ ಪೂರೈಸಿದ 842 + 95 ಮಂದಿಯನ್ನು ಕಳೆದರೆ ಬರುವ 1,055ರಿಂದ ಆಸ್ಪತ್ರೆಯ ಕ್ವಾರಂಟೈನಿಗೆ ದಾಖಲಾದ 30+ ಆಸ್ಪತ್ರೆ ನಿಗಾದಲ್ಲಿರುವ 55 ಮಂದಿ ಸಹಿತ ಒಟ್ಟು 85ಮಂದಿಯನ್ನು ಕಳೆದರೆ ಬರುವ ಉತ್ತರವೇ 970).

ಇನ್ನು ಜಿಲ್ಲಾಡಳಿತವು ಜಿಲ್ಲೆಯಲ್ಲಿ ಲಾಕ್ ಡೌನ್ ಆದೇಶವನ್ನು ಇನ್ನಷ್ಟು ಕಟ್ಟುನಿಟ್ಟಾಗಿ ಪಾಲಿಸಲು ಮಾರ್ಚ್ 29ರಿಂದ ನಿರ್ಧರಿಸಿದೆ. ಈ ಪ್ರಕಾರವಾಗಿ ಜನರಿಗೆ ಅಗತ್ಯ ವಸ್ತುಗಳ ಖರೀದಿಗೆ ಬೆಳಿಗ್ಗೆ 7 ಗಂಟೆಯಿಂದ 11 ಗಂಟೆಗಳರೆಗೆ ಮಾತ್ರವೇ ಅವಕಾಶ ನೀಡಲಾಗಿದೆ. ಮೆಡಿಕಲ್, ಚಿಕಿತ್ಸಾಲಯಗಳನ್ನು ಹೊರತುಪಡಿಸಿ ಉಳಿದೆಲ್ಲಾ ಅಂಗಡಿಗಳು ಈ ನಿರ್ಧಿಷ್ಟ ಸಮಯದಲ್ಲಿ ಮಾತ್ರವೇ ತೆರೆದಿರಬೇಕೆಂಬ ಕಟ್ಟುನಿಟ್ಟಿನ ಆದೇಶವನ್ನು ಜಿಲ್ಲಾಧಿಕಾರಿಯವರು ಮಾಡಿದ್ದಾರೆ.

ಇಷ್ಟು ಮಾತ್ರವಲ್ಲದೇ ಜಿಲ್ಲೆಯ ಎಲ್ಲಾ ಗಡಿ ಭಾಗಗಳನ್ನು ಮುಚ್ಚಲಾಗಿದ್ದು ತುರ್ತು ಸೇವಾ ಸಂಚಾರವನ್ನು ಹೊರತುಪಡಿಸಿ ಜಿಲ್ಲೆಯಿಂದ ಹೊರಗೆ ಹೋಗುವ ಮತ್ತು ಒಳಗೆ ಬರಲು ಯಾರಿಗೂ ಅವಕಾಶ ಇಲ್ಲದಂತಾಗಿದೆ.