Udupi: ಗೀತಾರ್ಥ ಚಿಂತನೆ-91: ಸಂತ್ರಸ್ತನಿಂದಲೇ ಸರಿಪಡಿಸುವ ಯುಕ್ತಿ

Team Udayavani, Nov 12, 2024, 12:46 AM IST

ಶ್ರೀಕೃಷ್ಣನ ತಂತ್ರವಿಶೇಷವೆಂದರೆ ಅವರವರ ದೋಷಗಳನ್ನು ಅವರಿಂದಲೇ ಸರಿಪಡಿಸುವುದು. ಅದಕ್ಕಾಗಿಯೇ ನಿನ್ನ ದೌರ್ಬಲ್ಯವನ್ನು ನೀನೇ ಬಿಡಬೇಕು. ನಾವು ಸಹಕರಿಸಬಹುದು ಎನ್ನುತ್ತಾನೆ. ಇಲ್ಲವಾಗಿದ್ದರೆ ಶ್ರೀಕೃಷ್ಣ ಸಾರಥಿಯಾಗಿ “ನೀನು ಯುದ್ಧ ಮಾಡಲೇಬೇಕು’ ಎನ್ನಬಹುದಿತ್ತು.

ಹೀಗೆ ಆದೇಶ ಕೊಟ್ಟಿದ್ದರೆ ಗೀತೆಯೇ ಬೇಡವಾಗಿತ್ತು. ಹಾಗೆ ಮಾಡಲಿಲ್ಲ. ಪರಂತಪ= ಹೆಚ್ಚು ಚಿಂತನೆ ಮಾಡುವುದು. ಚಿಂತನೆಯಿಂದಲೇ ಸರಿಪಡಿಸುವುದು. ಇದಕ್ಕೆ ಮಾನಸಿಕ ಚಿಂತನೆಯೇ ಚಿಕಿತ್ಸೆ ಎಂದರ್ಥ. ಅರ್ಜುನನಿಗೆ ಚಿಂತನೆ ಮಾಡುವ ಶಕ್ತಿ ಇದೆ. ವಾಸ್ತವದಲ್ಲಿ ಚಿಂತನೆ ಎಂದರೆ ಭಗವಂತನ ಕುರಿತಾದ ಚಿಂತನೆ. ಭಗವಂತನ ಚಿಂತಕ, ಶ್ರೇಷ್ಠ ಚಿಂತಕನಾದ ಕಾರಣ ಅವನೇ (ಅರ್ಜುನನೇ) ಉತ್ತರವನ್ನು ಕಂಡುಕೊಳ್ಳುವಂತಾಗಬೇಕು. ವಿದ್ಯಾರ್ಥಿಗಳು ಬೆಳೆಯಬೇಕಾದರೆ ಅವರ ಪ್ರಶ್ನೆಗೆ ಅವರೇ ಉತ್ತರ ಕಂಡುಕೊಂಡು ಉತ್ತರಿಸುವಂತಾಗಬೇಕು, ಶಿಕ್ಷಕರೇ ಉತ್ತರ ಹೇಳಬಾರದು. ಇದು ಆದರ್ಶ ಶಿಕ್ಷಕರ ಕಾರ್ಯವೈಖರಿ.

ಶ್ರೀಕೃಷ್ಣ ಹಾಗೆ ನಡೆದುಕೊಳ್ಳುತ್ತಾನೆ. ಸ್ವಭಾವಸಿದ್ಧವಾದುದನ್ನು ಬಿಡಲು ಆಗುವುದಿಲ್ಲ. ಆಗಂತುಕವಾದುದನ್ನು (ಪ್ರಭಾವಿತ) ತ್ಯಾಗ ಮಾಡಬಹುದು. ಶ್ರೀಕೃಷ್ಣ ಅರ್ಜುನನ ದೋಷವನ್ನು ಹೃದಯ ದೌರ್ಬಲ್ಯ ಎಂದು ಕರೆದನೆ ವಿನಾ ಬುದ್ಧಿ ದೌರ್ಬಲ್ಯ ಎಂದು ಏಕೆ ಕರೆಯಲಿಲ್ಲ? ಅರ್ಜುನ ತನ್ನ ನಿಲುವನ್ನು ಸಮರ್ಥನೆ ಮಾಡಿದ್ದಾನೆ. ಆದ್ದರಿಂದಲೇ ಅದು ಹೃದಯದೌರ್ಬಲ್ಯ.

– ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು,
ಪರ್ಯಾಯ ಶ್ರೀಪುತ್ತಿಗೆ ಶ್ರೀಕೃಷ್ಣಮಠ

– ಕೋಟಿ ಗೀತಾ ಲೇಖನ ಯಜ್ಞದಲ್ಲಿ ಪಾಲೊಳ್ಳಿ ಗೀತಾ ಮಂದಿರ,
ಉಡುಪಿ ಸಂಪರ್ಕ ಸಂಖ್ಯೆ: 8055338811