Udupi; ಗೀತಾರ್ಥ ಚಿಂತನೆ 154: ವೈಯಕ್ತಿಕ ಸುಖ ಬೇಡ, ಲೋಕ ಸುಖ ಬೇಕು

Team Udayavani, Jan 12, 2025, 10:25 PM IST

ರಾಮ ವನವಾಸಕ್ಕೆ ಹೋಗುವಾಗ ಕೌಸಲ್ಯೆ”ನೀನು ಹೋಗುತ್ತಿರುವುದು ಪಿತೃವಾಕ್ಯ ಪರಿಪಾಲನೆಗಾಗಿ. ನೀನು ಹೋಗುವುದು ಬೇಡ. ಮಾತೃವಾಕ್ಯ ಪರಿಪಾಲನೆ ಮಾಡು’ ಎನ್ನುತ್ತಾಳೆ. “ಮಗನಿಗೆ ಆದೇಶ ಕೊಡಲು ತಂದೆಗೆ ಹಕ್ಕಿದೆ. ಗಂಡನಿಗೆ ಆದೇಶ ಕೊಡಲು ಹೆಂಡತಿಗೆ ಹಕ್ಕಿಲ್ಲ. ಮೇಲಾಗಿ ದಶರಥ ರಾಜ. ರಾಜಾಜ್ಞೆ ಎಲ್ಲಕ್ಕಿಂತ ಮೇಲು. ಆದ್ದರಿಂದ ವನವಾಸಕ್ಕೆ ಹೋಗಿಯೇ ತೀರುತ್ತೇನೆ’ ಎನ್ನುತ್ತಾನೆ ರಾಮ. ಧೃತರಾಷ್ಟ್ರ ಕುರುಡನೇ ಇರಬಹುದು. ಆತ ರಾಜ. ಆದ್ದರಿಂದ ಭೀಷ್ಮ, ದ್ರೋಣಾದಿಗಳು ಅವನ ಆದೇಶಕ್ಕೆ ಬೆಲೆ ನೀಡಿದರು. ನ್ಯಾಯಾಲಯದ ತೀರ್ಪು ತಪ್ಪೆನಿಸಿದರೂ ನಿಂದಿಸುವ ಅಧಿಕಾರವಿಲ್ಲ. ಒಂದು ಕಾರನ್ನು ಇನ್ನೊಂದು ಕಾರು ಫಾಲೋ ಮಾಡುತ್ತಿತ್ತು ಎಂದಿಟ್ಟುಕೊಳ್ಳಿ. ಮುಂದಿನ ಕಾರು ದಾರಿ ತಪ್ಪಿ ಹೋಗುತ್ತಿತ್ತು. ಹಿಂದಿನ ಕಾರಿನವರಿಗೆ ಸರಿಯಾದ ದಾರಿ ಗೊತ್ತಿದೆ. ಮುಂದಿನ ಕಾರಿನವರಿಗೆ ತಿಳಿಸಿ ಸರಿಯಾದ ದಾರಿಯಲ್ಲಿ ಹೋಗಲು ಮಾರ್ಗದರ್ಶನ ನೀಡಬೇಕು. ಅವರನ್ನು ಬಿಟ್ಟು ಸರಿಯಾದ ದಾರಿಗೆ ತಾನು ಮಾತ್ರ ಹೋಗುವುದೂ ತಪ್ಪು. ವ್ಯವಸ್ಥೆಯನ್ನು ಹಾಳುಮಾಡುವ ಅಧಿಕಾರ ಯಾರಿಗೂ ಇಲ್ಲ. ವೈಯಕ್ತಿಕ, ಸಾರ್ವತ್ರಿಕ ವಿಚಾರ ಬೇರೆ. ವೈಯಕ್ತಿಕ ಸುಖವನ್ನು ತ್ಯಾಗ ಮಾಡಬೇಕು. ವೈಯಕ್ತಿಕ ಸುಖದುಃಖ ತ್ಯಾಗವೇ ಕರ್ಮಫ‌ಲ ತ್ಯಾಗ. ಆತ್ಯಂತಿಕ ಫ‌ಲವನ್ನು ಬಿಡುವುದಲ್ಲ. ಕಾಮ್ಯಾನಾಮ್‌ ಕರ್ಮಣಮ್‌ ತ್ಯಾಗಂ… ವೈಯಕ್ತಿಕ ಸುಖದುಃಖದ ಉದ್ದೇಶ ಬೇಡವೆಂದಂತೆ ಲೋಕಕಲ್ಯಾಣಾರ್ಥ ಉದ್ದೇಶವೂ ಬೇಡವೆ? ಅದು ಬೇಕೇ ಬೇಕು.

– ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು,
ಪರ್ಯಾಯ ಶ್ರೀಪುತ್ತಿಗೆ ಶ್ರೀಕೃಷ್ಣಮಠ, ಉಡುಪಿ
-ಕೋಟಿ ಗೀತಾ ಲೇಖನ ಯಜ್ಞದಲ್ಲಿ ಪಾಲೊಳ್ಳಿ
ಗೀತಾ ಮಂದಿರ, ಉಡುಪಿ ಸಂಪರ್ಕ ಸಂಖ್ಯೆ: 8055338811