ಜೇನುಹುಳದಂತಿರಬೇಕೋ? ನೊಣದಂತಿರಬೇಕೋ?

Team Udayavani, Dec 23, 2021, 5:50 AM IST

ಉಡುಪಿ: ಬದುಕಿದರೆ ಜೇನು ಹುಳುವಿನಂತೆ ಬದುಕಬೇಕು, ನೊಣಗಳಂತೆ ಬದುಕಬಾರದು. ಹೇಗೆ ಬದುಕಬೇಕು ಎಂಬುದನ್ನು ನಾವೇ ನಿರ್ಧರಿಸಬೇಕಾಗಿದೆ ಎಂದು ಶಿಕ್ಷಣ ತಜ್ಞ ಗುರುರಾಜ ಕರ್ಜಗಿ ಹೇಳಿದರು.

ಶ್ರೀಕೃಷ್ಣ ಮಠ ಪರ್ಯಾಯ ಅದಮಾರು ಮಠದ ವತಿಯಿಂದ ಬುಧವಾರ ರಾಜಾಂಗಣದಲ್ಲಿ “ವಿಶ್ವಾರ್ಪಣಮ್‌’ ಕಾರ್ಯಕ್ರಮದಲ್ಲಿ ಅವರು ವಿಶೇಷ ಉಪನ್ಯಾಸ ನೀಡಿದರು.

2,000 ಹೂವುಗಳನ್ನು ಸಂಪರ್ಕಿಸಿ
ಒಂದು ಚಮಚ ಜೇನುತುಪ್ಪ ಉತ್ಪಾದನೆಯಾಗುತ್ತದೆ. ಜೇನುಹುಳು ಹೂವಿನ ಬಣ್ಣ, ರೂಪ, ಕೋಮಲತೆ ಯನ್ನು ಮುಟ್ಟುವುದಿಲ್ಲ, ಕೇವಲ ಒಂದು ಹನಿರಸ ವನ್ನು ಪಡೆಯುತ್ತದೆ. ಒಂದು ಪ್ರಾಣಿ ಸತ್ತು ಬಿದ್ದಿದ್ದರೆ ಜೇನು ಹುಳು ಅಲ್ಲಿಗೆ ಹೋಗುವುದಿಲ್ಲ. ನೊಣಗಳು ಮಾತ್ರ ಹೂವಿನ ಹತ್ತಿರ ಹೋಗದೆ ಸತ್ತ ಪ್ರಾಣಿಯ ಬಳಿ ಹೋಗುತ್ತವೆ. ಒಳ್ಳೆಯದನ್ನು ಪಡೆಯುವ ಗುಣ ಇರಬೇಕು. ಇದು ಮತಗಳಿಗಾಗಲೀ, ಮಾರುಕಟ್ಟೆಯ ನಾನಾ ಬಗೆಯ ತರಕಾರಿ ಗಾಗಲೀ ಅನ್ವಯ. ಒಳ್ಳೆಯ ಸ್ನೇಹಿತರು, ಗ್ರಂಥಗಳನ್ನು ಪಡೆದುಕೊಳ್ಳಿ. ನಿನ್ನ ಜೀವ ಸ್ವಂತಧ್ದೋ ಬಾಡಿಗೆ   ಯಧ್ದೋ? ನಿಮ್ಮ ಮನೆ ನಿರ್ಮಿಸುವಾಗ ಮಾಡುವ ಕಾಳಜಿ ಸ್ವಂತಕ್ಕೆ ಅನ್ವಯಿಸಬೇಡವೇ ಎಂದು ತಮ್ಮ ಅಜ್ಜ ಹೇಳಿದ ಮಾತನ್ನು ಕರ್ಜಗಿ ಉಲ್ಲೇಖಿಸಿದರು.

ಶಿಲೆ ಒಂದು ಪ್ರಕೃತಿಯಾಗಿದೆ. ಶಿಲ್ಪಿಯೊಬ್ಬ ಸಿಕ್ಕಿ ಅದು ವಿಗ್ರಹವಾಗಿ ಸಂಸ್ಕೃತಿಯಾಯಿತು. ಅಕ್ಕಿ ಪ್ರಕೃತಿ ಅನ್ನ ಸಂಸ್ಕೃತಿ, ಕೈ ಪ್ರಕೃತಿ ಚಿತ್ರ ಸಂಸ್ಕೃತಿ, ಕಾಲು ಪ್ರಕೃತಿ ನೃತ್ಯ ಸಂಸ್ಕೃತಿ. ಮಗುವೊಂದು ಪ್ರಕೃತಿ, ಅದನ್ನು ಸುಸಂಸ್ಕೃತನನ್ನಾಗಿ ಮಾಡುವುದು ಶಿಕ್ಷಣ. ಇದು ಪದವಿಯಲ್ಲ. ಮನೆಯಲ್ಲಿ ಸಂಸ್ಕೃತಿ ಇಲ್ಲವಾ ದರೆ ಬೇರೆಡೆ ಸಿಗುವುದೆ? ನಾವು ನಡೆದಂತೆ ಮಕ್ಕಳು ನಡೆಯುತ್ತಾರೆ ವಿನಾ ಹೇಳಿದಂತೆ, ಬರೆದಂತೆ ನಡೆಯುವುದಿಲ್ಲ ಎಂಬ ಮಾತು ನೆನಪಿನಲ್ಲಿಟ್ಟುಕೊಳ್ಳಿ ಎಂದು ಕರ್ಜಗಿ ಕಿವಿಮಾತು ನುಡಿದರು.

ಇದನ್ನೂ ಓದಿ:ಡೀಮ್ಡ್ ಫಾರೆಸ್ಟ್‌ ಅವೈಜ್ಞಾನಿಕ : ಆರ್‌. ಅಶೋಕ್‌

ಅದಮಾರು ಮಠದ ಶ್ರೀ ಈಶ ಪ್ರಿಯತೀರ್ಥ ಶ್ರೀಪಾದರು ಅಧ್ಯಕ್ಷತೆ ವಹಿಸಿದ್ದರು. ಮಾಣಿಲ ಶ್ರೀಧಾಮ ಶ್ರೀ ಮೋಹನದಾಸ ಪರಮಹಂಸ ಸ್ವಾಮೀಜಿ ಆಶೀರ್ವಚನ ನೀಡಿದರು.

ಸಮ್ಮಾನ
ಬೆಳಗಾವಿಯ ವಿದ್ವಾಂಸ ಗುರು ರಾಜ ಜೋಶಿ, ದಂತ ವೈದ್ಯ ಡಾ|ವಿಜಯೇಂದ್ರ ವಸಂತ್‌, ಪಿಪಿಸಿ ನಿವೃತ್ತ ಪ್ರಾಂಶುಪಾಲ, ಇತಿಹಾಸ ತಜ್ಞ ಡಾ| ಜಗದೀಶ ಶೆಟ್ಟಿ, ಉಡುಪಿ ಡಾ| ಟಿಎಂಎ ಪೈ ಆಸ್ಪತ್ರೆಯ ವೈದ್ಯಕೀಯ ಅಧೀಕ್ಷಕ ಡಾ| ಶಶಿಕಿರಣ್‌ ಉಮಾ ಕಾಂತ್‌ ಅವರನ್ನು ಸಮ್ಮಾನಿಸಲಾಯಿತು. ಮಠದ ವ್ಯವಸ್ಥಾಪಕ ಗೋವಿಂದರಾಜ್‌ ಸ್ವಾಗತಿಸಿದರು.